సాయి కృష్ణ కేసు.. కాటికాపరి అరెస్ట్

విజయవాడలో సంచలనం సృష్టించిన గాదే సాయి కృష్ణ అదృశ్యం, మృతి కేసు రోజురోజుకూ కొత్త మలుపులు తిరుగుతోంది. దర్యాప్తు వేగవంతమవుతున్న నేపథ్యంలో పలువురు పోలీసు అధికారులను, సిబ్బందిని విచారిస్తున్నట్లు సమాచారం.

దర్యాప్తులో భాగంగా టాస్క్ ఫోర్స్‌కు చెందిన ఏసీపీ లలిత్ కుమార్‌తో పాటు పలువురు కానిస్టేబుళ్లను అధికారులు ప్రశ్నించినట్లు తెలుస్తోంది. సాయి కృష్ణను ఎక్కడ అదుపులోకి తీసుకున్నారు, ఎక్కడ ఉంచారు, ఎన్ని రోజులు నిర్బంధించారు, ఆ సమయంలో ఏమి జరిగిందనే అంశాలపై స్పష్టతకు ప్రయత్నాలు జరుగుతున్నాయి.

ప్రస్తుతం బయటకు వస్తున్న సమాచారం ప్రకారం, సాయి కృష్ణను మే 8న అదుపులోకి తీసుకున్నారని, మరుసటి రోజు నగరంలోని ఒక హోటల్‌లో ఉంచినట్లు చెబుతున్నారు. అక్కడ అతనిపై తీవ్ర హింస జరిగినట్లు ఆరోపణలు వినిపిస్తున్నాయి. ఆరోగ్య పరిస్థితి విషమించడంతో ఆసుపత్రులకు తరలించే ప్రయత్నం చేసినప్పటికీ, మెడికో-లీగల్ సమస్యల కారణంగా కొందరు వైద్యులు చికిత్సకు నిరాకరించినట్లు సమాచారం.

ఆ తర్వాత తిరిగి హోటల్‌కు తీసుకెళ్లి ఒక ఆర్‌ఎంపీ వైద్యుడితో చికిత్స అందించేందుకు ప్రయత్నించినట్లు చెబుతున్నారు. అయితే అప్పటికే అతని పరిస్థితి విషమించి మరణించినట్లు అనుమానాలు వ్యక్తమవుతున్నాయి.

ఈ ఘటనను అనాధ శవంగా చూపించే ప్రయత్నం జరిగిందన్న ఆరోపణలు కూడా వెలువడుతున్నాయి. దీనికి సంబంధించి కొంతమంది పోలీసు అధికారుల పాత్రపై కూడా అనుమానాలు వ్యక్తమవుతున్నాయి. అయితే ఈ అంశాలపై అధికారిక నిర్ధారణ ఇంకా వెలువడలేదు.

రెండు స్థాయిల్లో దర్యాప్తు

ఈ కేసులో ప్రస్తుతం రెండు వేర్వేరు దర్యాప్తులు కొనసాగుతున్నాయి. శాఖాపరమైన విచారణ కోసం నియమితులైన అధికారులు క్షేత్రస్థాయిలో సమాచారాన్ని సేకరిస్తున్నారు. సీసీటీవీ ఫుటేజీలు, ఆసుపత్రుల వివరాలు, బస్‌స్టాండ్ పరిసరాల సమాచారం తదితర అంశాలను పరిశీలిస్తున్నట్లు తెలుస్తోంది.

ఇక రాష్ట్ర ప్రభుత్వం నియమించిన ప్రత్యేక దర్యాప్తు బృందం కూడా కేసు వెనుక ఉన్న పూర్తి వాస్తవాలను వెలికితీసేందుకు ప్రయత్నిస్తోంది. ఈ రెండు విచారణలు పరస్పరం స్వతంత్రంగా కొనసాగుతున్నట్లు సమాచారం.

అదే సమయంలో పౌర హక్కుల సంఘాలు, న్యాయవాదులు కూడా స్వతంత్రంగా వాస్తవాలను సేకరిస్తున్నారు. దీంతో కేసుకు సంబంధించిన కొత్త విషయాలు వెలుగులోకి వచ్చే అవకాశాలు కనిపిస్తున్నాయి.

కేసులో అత్యంత కీలకమైన పరిణామంగా స్వర్గపురి ఎలక్ట్రికల్ శ్మశానవాటికలో పనిచేసే ఆపరేటర్‌ను పోలీసులు అదుపులోకి తీసుకుని విచారిస్తున్నట్లు తెలుస్తోంది. అనాధ శవాల నమోదు, అనుమతులు, దహన ప్రక్రియలకు సంబంధించిన రికార్డులు అతని వద్ద ఉండటంతో ఈ విచారణకు ప్రాధాన్యం ఏర్పడింది.

బయటకు వస్తున్న వివరాల ప్రకారం, మే 24 తెల్లవారుజామున రెండు అనాధ శవాలను అక్కడ దహనం చేసినట్లు అనుమానాలు వ్యక్తమవుతున్నాయి. సాధారణ నిబంధనల ప్రకారం అనుమతించరాని సమయంలో ఈ ప్రక్రియ ఎలా జరిగిందన్న అంశంపై అధికారులు దృష్టి సారించారు.

ఈ వ్యవహారంలో ఎవరి ఆదేశాలు పనిచేశాయి, నిబంధనలు ఎందుకు పాటించలేదు, సంబంధిత రికార్డులు ఏమి చెబుతున్నాయన్న అంశాలపై సమగ్ర దర్యాప్తు కొనసాగుతోంది. విచారణ పూర్తయిన తర్వాతే పూర్తి వాస్తవాలు వెలుగులోకి వచ్చే అవకాశం ఉంది.