సంక్రాంతి వేళ ఏపీకి 'సిరుల' పంట

రిజిస్ట్రేషన్లు..గనుల రంగంలో రికార్డు స్థాయి వృద్ధి

రాష్ట్ర ఆదాయ వృద్ధిలో స్టాంపులు - రిజిస్ట్రేషన్లు , గనుల శాఖలు కీలక పాత్ర పోషించాయి. ముఖ్యంగా రిజిస్ట్రేషన్ల విభాగంలో గత ఏడాది తొలి మూడు త్రైమాసికాల్లో రూ. 6,389 కోట్లు రాగా, ప్రస్తుతం అది రూ. 8,082 కోట్లకు చేరుకుంది. అంటే ఈ విభాగంలో ఏకంగా 26% అదనపు ఆదాయం సమకూరింది. అదేవిధంగా గనుల రంగంలో గతేడాది రూ. 1,648 కోట్లు రాగా, ఈ ఏడాది 31% వృద్ధిని నమోదు చేస్తూ రూ. 2,152 కోట్లకు పెరిగింది. ఈ రెండు రంగాల్లో కనిపిస్తున్న జోరు రాష్ట్రంలో పెరుగుతున్న ఆర్థిక కార్యకలాపాలకు నిదర్శనంగా నిలుస్తోంది.

వాణిజ్య పన్నులు.. వాహన పన్నుల ఆదాయ పరిస్థితి

రాష్ట్ర ఆదాయానికి ప్రధాన వనరుగా ఉన్న వాణిజ్య పన్నుల విభాగంలో కూడా స్వల్ప వృద్ధి నమోదైంది. గతేడాది రూ. 37,107 కోట్లు సాధించగా, ఈసారి 3% అదనపు రాబడితో రూ. 38,233 కోట్లు ఖజానాకు చేరాయి. వాహనాల పన్నుల రూపేణా వచ్చే ఆదాయం కూడా గతేడాది రూ. 3,361 కోట్ల నుంచి ఈసారి రూ. 3,558 కోట్లకు పెరిగింది. అయితే, ఎక్సైజ్ రాబడిలో మాత్రం స్వల్ప తగ్గుదల కనిపించింది. గత ఏడాది రూ. 20,375 కోట్లు రాగా, ప్రస్తుతం అది రూ. 19,868 కోట్లకు పరిమితమై 2% మేర తగ్గుదలను నమోదు చేసింది.

ముగింపు దశలో లక్ష్యాల వేట

ప్రస్తుత ఆర్థిక సంవత్సరంలో ఆదాయ లక్ష్యాలను ప్రభుత్వం భారీగా పెంచింది. 2023-24లో లక్ష్యాల పెరుగుదల కేవలం 3% లోపే ఉండగా, ఈసారి ఏకంగా 30% మేర లక్ష్యాలను నిర్దేశించుకోవడం గమనార్హం. డిసెంబరు నెలలో నిర్దేశించిన లక్ష్యం కంటే 10% అధికంగా రాబడి రావడం విశేషం. అక్టోబరులో పండుగల కారణంగా వ్యాపారాలు ఎక్కువ ఉన్నా లక్ష్యం కంటే రాబడి తగ్గగా, నవంబరు మరియు డిసెంబరు నెలలు ఆ లోటును భర్తీ చేశాయి. ఇక మిగిలిన చివరి మూడు నెలల్లో ఫలితాలు ఎలా ఉండబోతున్నాయన్నది రాష్ట్ర ఆర్థిక భవిష్యత్తుకు అత్యంత కీలకం కానుంది.