అంబటికి రిమాండ్..హైకోర్టులో ఊరట

ఏమిటీ పాత కేసు?

గతంలో మెడికల్ కాలేజీల పీపీపీ విధానానికి వ్యతిరేకంగా వైసీపీ చేపట్టిన ఆందోళన సందర్భంగా పట్టాభిపురం పోలీసులు అంబటిపై కేసు నమోదు చేశారు. పోలీసులతో దురుసుగా ప్రవర్తించారనే ఆరోపణలపై నమోదైన ఈ కేసులో.. పోలీసులు పీటీ వారెంట్‌పై ఆయనను రాజమహేంద్రవరం నుంచి గుంటూరు స్పెషల్ జ్యుడీషియల్ కోర్టుకు తరలించారు. విచారణ అనంతరం న్యాయమూర్తి 14 రోజుల రిమాండ్ విధించడంతో ఆయనను తిరిగి జైలుకు తరలించారు.

8 రోజుల్లో 36 కేసులు.. కక్షసాధింపేనా?

కూటమి ప్రభుత్వం అధికారంలోకి వచ్చిన నాటి నుంచి అంబటి రాంబాబుపై మొత్తం 52 కేసులు నమోదు కాగా, కేవలం గత ఎనిమిది రోజుల్లోనే 36 కేసులు నమోదు చేయడం రాజకీయ వర్గాల్లో చర్చనీయాంశమైంది. పీటీ వారెంట్లు జారీ చేసి రాష్ట్రమంతా తిప్పాలని ప్రభుత్వం కుట్ర చేస్తోందని వైసీపీ శ్రేణులు ఆరోపిస్తున్నాయి. వరుస కేసుల పరంపరతో ఆయనను జైలు నుంచి బయటకు రాకుండా చేసే ప్రయత్నం జరుగుతోందని మద్దతుదారులు విమర్శిస్తున్నారు.

హైకోర్టు కీలక ఆదేశాలు

మరోవైపు, తనపై నమోదైన కేసులను కొట్టివేయాలని (Quash) కోరుతూ అంబటి రాంబాబు హైకోర్టును ఆశ్రయించారు. ఈ పిటిషన్‌పై విచారణ చేపట్టిన ధర్మాసనం పోలీసులకు కీలక ఆదేశాలు జారీ చేసింది. అంబటిపై చర్యలు తీసుకునేటప్పుడు 35 (3) BNSS ప్రొసీజర్‌ను ఖచ్చితంగా పాటించాలని స్పష్టం చేసింది. ఇది అంబటికి కొంత ఊరటనిచ్చే అంశంగా కనిపిస్తోంది.