రాయలసీమ టూ గ్లోబల్: చంద్రబాబు

ప్రస్తుతం రాయలసీమలో ఉన్న 20 లక్షల హెక్టార్ల ఉద్యానవన సాగును 40 లక్షల హెక్టార్లకు పెంచుతామని ముఖ్యమంత్రి హామీ ఇచ్చారు. ఉద్యాన దిగుబడులను 400 మిలియన్ మెట్రిక్ టన్నుల నుంచి 1000 మిలియన్ మెట్రిక్ టన్నులకు చేర్చడమే లక్ష్యమన్నారు. రూ. 30 వేల కోట్లతో ప్రత్యేక ప్రాజెక్టు, మౌలిక వసతుల కోసం రూ. 70 వేల కోట్లు.. మొత్తంగా లక్ష కోట్ల రూపాయలతో రాయలసీమను గ్లోబల్ హార్టికల్చర్ హబ్‌గా తీర్చిదిద్దుతామన్నారు. వ్యవసాయంలో కృత్రిమ మేధ (AI), డ్రోన్లు మరియు యాంత్రీకరణను జోడించి రైతును లాభాల బాట పట్టిస్తామని వివరించారు.

రాష్ట్రంలోని ప్రతి పేదవాడికి 2029 నాటికి సొంత ఇల్లు లేదా ప్లాటు ఇచ్చి తీరుతామని చంద్రబాబు భరోసా ఇచ్చారు. గృహప్రవేశాల పండుగ: ఈ ఏడాది ఉగాది నాటికి 3 లక్షల ఇళ్లలో, ఏడాది చివరికల్లా మొత్తం 10.6 లక్షల ఇళ్లలో గృహప్రవేశాలు చేయిస్తామని ప్రకటించారు. ఎస్సీ, ఎస్టీ, బీసీ మరియు మైనార్టీల ఇళ్ల నిర్మాణానికి ప్రభుత్వం తరపున అదనపు ఆర్థిక సాయం అందిస్తామని తెలిపారు. గత ప్రభుత్వం కక్షగట్టి నిలిపివేసిన ఇళ్లను కూడా పూర్తి చేసి లబ్ధిదారులకు అందిస్తామని, హౌసింగ్ అక్రమలపై విచారణ జరిపి బాధ్యులను శిక్షిస్తామని హెచ్చరించారు.

ఐదేళ్ల వైఎస్సార్సీపీ పాలనలో వ్యవసాయ రంగం కుదేలైందని ఆవేదన వ్యక్తం చేసిన ముఖ్యమంత్రి.. తమ ప్రభుత్వం పంచసూత్రాల విధానంతో ముందుకు సాగుతోందని చెప్పారు. ప్రకృతి సేద్యం వైపు 40 లక్షల మంది రైతులను మళ్లించడమే తమ తదుపరి లక్ష్యమని, భూగర్భ జలాల పెంపుదలపై రైతులు కూడా భాగస్వాములు కావాలని పిలుపునిచ్చారు.