రాజమండ్రి పులి ప్రయాణం..15 రోజులు..600 కిలోమీటర్లు

అలసట లేని పరుగు..15 రోజుల్లో 600 కి.మీ

సాధారణంగా పులులు తమ ఆవాస ప్రాంతాల్లోనే తిరుగుతుంటాయి. కానీ, ఈ పులి శైలి వేరు. కేవలం 15 రోజుల్లో ఏకంగా 600 కిలోమీటర్లు ప్రయాణించిందని సీసీఎఫ్ మూర్తి వెల్లడించడం అధికారులను సైతం ఆశ్చర్యానికి గురిచేస్తోంది. కాకినాడ నుంచి మొదలై.. ఇప్పుడు రాజమహేంద్రవరం పొలిమేరల వరకు ఈ పులి సాగించిన సుదీర్ఘ ప్రయాణం ఒక రికార్డు అనే చెప్పాలి. ఇంత వేగంగా అది ఎలా ప్రయాణిస్తుందనేది ఇప్పుడు నిపుణుల మధ్య చర్చనీయాంశమైంది.

రాజమహేంద్రవరం శివార్లలో అలజడి

మంగళవారం రాత్రి దివాన్‌చెరువు నుంచి బయలుదేరిన పులి.. బీజాపూర్ టౌన్‌షిప్, శ్రీరాంపురం మీదుగా రఘునాథపురం చేరుకుంది. ఈ క్రమంలో ఒక గేదెను వేటాడి తన పంజా పవర్ చూపించింది. బుధవారం ఉదయం అంకాలమ్మ తల్లి కొండ సమీపంలో పాదముద్రలు లభించడంతో, పులి ప్రస్తుతం అక్కడి జీడిమామిడి తోటల్లో ఆగి ఉండవచ్చని అధికారులు భావిస్తున్నారు. దట్టమైన పొదలు, తోటలు దానికి సురక్షితమైన స్థావరాలుగా మారాయి.

దేశవ్యాప్త నిపుణులతో ఆపరేషన్ టైగర్

పులిని బంధించేందుకు అటవీశాఖ అత్యున్నత స్థాయి వ్యూహాన్ని అమలు చేస్తోంది. దీని కోసం కేవలం స్థానిక బృందాలే కాకుండా, దేశ రాజధాని ఢిల్లీ, మహారాష్ట్రలోని పూణే నుండి ప్రత్యేక నిపుణుల బృందాలను రప్పించారు. మొత్తం 12 బృందాలు నిరంతరం గాలింపు చర్యలు చేపడుతున్నాయి. పులి కదలికలను కనిపెట్టేందుకు థర్మల్ డ్రోన్లు, ట్రాప్ కెమెరాలను వాడుతున్నారు.

లక్ష్యం.. సురక్షితమైన బంధనం

స్టేట్‌ ప్రిన్సిపల్‌ చీఫ్‌ కన్జర్వేటర్‌ పి.వి.చలపతిరావు ఆదేశాల మేరకు పులిని పట్టుకోవడానికి అన్ని అనుమతులు సిద్ధమయ్యాయి. పులికి ఎటువంటి హాని కలగకుండా మత్తు మందు (Tranquilization) ఇచ్చి బంధించేందుకు ట్రాంక్విలైజర్ గన్లతో నిపుణులు సిద్ధంగా ఉన్నారు. ఇప్పటికే కీలక ప్రాంతాల్లో భారీ బోనులను ఏర్పాటు చేశారు. పులిని పట్టుకున్న వెంటనే దానిని సురక్షితంగా దట్టమైన అటవీ ప్రాంతంలో విడిచిపెట్టేందుకు ఏర్పాట్లు పూర్తయ్యాయి.