భారత్-అమెరికా డీల్‌పై రాహుల్ సందేహాలు..

భారత్-అమెరికా దేశాల మధ్య వాణిజ్య చర్చల నేపథ్యంలో డేటా సార్వభౌమత్వంపై రాజకీయ చర్చ మొదలైంది. కాంగ్రెస్ నాయకుడు రాహుల్ గాంధీ (Rahul Gandhi) కేంద్ర ప్రభుత్వంపై కొన్ని ప్రశ్నలు లేవనెత్తారు. దేశ డేటా భద్రతపై స్పష్టత ఇవ్వాలని డిమాండ్ చేశారు. ఆరోగ్యం, ఆర్థిక రంగాలు, ప్రభుత్వ డేటాబేస్‌లకు సంబంధించిన కీలక సమాచారం ఎలా ఉపయోగిస్తారో కేంద్రం వెల్లడించలేదన్నారు. భారత్-అమెరికా ఒప్పందంలో “అడ్డంకులను తగ్గించడం” అనే మాటకు డేటా విషయంలో అర్థమేంటో చెప్పాలని రాహుల్ ప్రశ్నించారు.

డేటా జాతీయ ఆస్తి అని లోక్‌సభ ప్రతిపక్ష నేత పేర్కొన్నారు. దేశ ప్రజల డేటా దేశానికే చెందుతుందని, అదే భవిష్యత్తులో ఏఐ (కృత్రిమ మేధ) అభివృద్ధికి కీలకమని చెప్పారు. ఈ డేటా ఆధారంగా కంపెనీలు ఎదగవచ్చు, ఉద్యోగాలు సృష్టించవచ్చని ఆయన అభిప్రాయం వ్యక్తం చేశారు.

డేటా స్థానికీకరణపై కూడా రాహుల్ సందేహాలు వ్యక్తం చేశారు. విదేశీ కంపెనీలు భారతదేశంలోనే డేటాను నిల్వ చేయాల్సిన నిబంధనలు కొనసాగుతాయా? లేదా? అనే విషయంలో స్పష్టత కోరారు. మన డేటా విదేశాలకు వెళ్లే ప్రమాదం ఉందా అని ప్రశ్నించారు.

“ఫ్రేమ్‌వర్క్, బ్యాలెన్స్, ఆటానమీ” వంటి పెద్ద పదాలు తప్ప స్పష్టమైన సమాధానాలు రావడం లేదని ఆయన విమర్శించారు. దేశానికి ఏమి కోల్పోతున్నామో చెప్పకుండా ప్రభుత్వం చర్చలు జరుపుతోందని ఆరోపించారు.

లోక్‌సభలో కూడా ఈ అంశంపై రాహుల్ చాలా ప్రశ్నలు అడిగారు. డేటా ట్రాన్స్‌ఫర్, స్థానిక నిల్వ, డిజిటల్ విధానాల మధ్య సమన్వయం ఎలా ఉంటుందో వివరించాలని కోరారు. ఈ ఒప్పందం భారతదేశ నియంత్రణ అధికారాన్ని తగ్గిస్తుందా? అనే ఆందోళన వ్యక్తం చేశారు.

రాహుల్ వ్యాఖ్యలపై కేంద్రం తరఫున మంత్రి జితిన్ ప్రసాద (Jitin Prasada) స్పందించారు. భారత డిజిటల్ ఆర్థిక వ్యవస్థ బలంగా ఉందని తెలిపారు. డేటాపై దేశానికి పూర్తి నియంత్రణ కొనసాగుతుందని చెప్పారు. అంతేకాక, డిజిటల్ వాణిజ్య భాగస్వామ్యాలను విస్తరించేందుకు భారత్ కట్టుబడి ఉందని స్పష్టం చేశారు.

మొత్తంగా భారత్-అమెరికా వాణిజ్య చర్చల నేపథ్యంలో డేటా భద్రత, సార్వభౌమత్వంపై రాజకీయంగా చర్చ మరింత వేడెక్కుతోంది.