అంజనమ్మ పుట్టినరోజున పవన్ కళ్యాణ్ జిరాఫీ దత్తత

650 ఎకరాల విస్తీర్ణంలో ఉన్న జూ పార్కును సందర్శించిన పవన్ కళ్యాణ్, అధికారులతో కలిసి ప్రతి ఎన్‌క్లోజర్‌ను నిశితంగా పరిశీలించారు. బటర్‌ఫ్లై పార్కులో వివిధ రకాల సీతాకోకచిలుకలను వదిలారు. టైగర్ రకం సీతాకోకచిలుకలు ఆయన దుస్తులపై వాలగా, వాటిని ఎంతో సున్నితంగా మొక్కలపైకి పంపారు. ఎలుగుబంట్ల కోసం ఏర్పాటు చేసిన నూతన ఎన్‌క్లోజర్‌ను ప్రారంభించి, వాటికి స్వయంగా ఆహారం అందించారు. ఏనుగుల వద్దకు వెళ్లే ముందు నిబంధనల ప్రకారం శానిటైజ్ చేసుకుని, వాటికి ఆహారం తినిపించారు. జిరాఫీలకు ఇష్టమైన రావి ఆకులు, అరటి పండ్లను తినిపించి వాటి వివరాలు అడిగి తెలుసుకున్నారు.

కంబాలకొండలో కెనోపీ వాక్

జూ సందర్శన అనంతరం కంబాలకొండ ఎకో పార్కులో 50 ఎకరాల విస్తీర్ణంలో అభివృద్ధి చేసిన నగరవనాన్ని ప్రారంభించారు. 400 మీటర్ల పొడవున్న వుడెన్ బ్రిడ్జిపై కెనోపీ వాక్ చేస్తూ ప్రకృతి అందాలను తిలకించారు. వేప, ఇప్ప, మహాగని వంటి వృక్షాల శాస్త్రీయ నామాలు, వాటి ఉపయోగాలు అధికారులను అడిగి తెలుసుకున్నారు. శాంతివనంలో మహాగని మొక్కలను నాటి పర్యావరణ పరిరక్షణ సందేశాన్ని ఇచ్చారు. ఈ కార్యక్రమంలో అటవీ శాఖ ఉన్నతాధికారులు పీసీసీఎఫ్ చలపతిరావు, శాంతిప్రియా పాండే, జూ క్యూరేటర్ మంగమ్మ తదితరులు పాల్గొన్నారు.