వడగాల్పుల గుప్పిట్లో 70కి పైగా మండలాలు

శుక్రవారం నాడు రాష్ట్రంలోని ఉత్తరాంధ్ర, కోస్తా జిల్లాలపై ఎండల ప్రభావం అత్యధికంగా ఉండనుంది. రాష్ట్రవ్యాప్తంగా మొత్తం 54 మండలాల్లో తీవ్ర వడగాల్పులు వీచే అవకాశం ఉందని అధికారులు గుర్తించారు. ఇందులో విజయనగరం జిల్లాలో అత్యధికంగా 19 మండలాలు ఉండగా, శ్రీకాకుళంలో 13, పార్వతీపురం మన్యంలో 11, పోలవరంలో 3, అల్లూరి, విశాఖ, అనకాపల్లి, కాకినాడ జిల్లాల్లో రెండేసి మండలాల చొప్పున తీవ్ర ప్రభావం ఉండనుంది. వీటికి అదనంగా మరో 16 మండలాల్లో వడగాల్పులు వీస్తాయని, ప్రజలు అప్రమత్తంగా ఉండాలని విపత్తుల నిర్వహణ సంస్థ సూచించింది.

గత 24 గంటల్లో రాష్ట్రవ్యాప్తంగా ఉష్ణోగ్రతలు ఆందోళనకర స్థాయిలో నమోదయ్యాయి. గురువారం విజయనగరం జిల్లా రాజాంలో అత్యధికంగా 40.6°C ఉష్ణోగ్రత రికార్డైంది. మక్కువ (మన్యం), నిండ్ర (చిత్తూరు) ప్రాంతాల్లో 40°C కు పాదరసం చేరుకుంది. అలాగే ధర్మాజీగూడెం, రేణిగుంట, పోడూరు వంటి ప్రాంతాల్లో 39°C కంటే ఎక్కువ ఉష్ణోగ్రతలు నమోదయ్యాయి. రానున్న రెండు రోజుల్లో ఈ గరిష్ఠ ఉష్ణోగ్రతలు 42°C నుండి 43°C వరకు పెరిగే అవకాశం ఉందని వాతావరణ శాఖ అంచనా వేస్తోంది.

ఎండల తీవ్రత దృష్ట్యా ప్రజలు తగిన జాగ్రత్తలు తీసుకోవాలని విపత్తుల నిర్వహణ సంస్థ మేనేజింగ్ డైరెక్టర్ ప్రఖర్ జైన్ కోరారు. ముఖ్యంగా డీహైడ్రేషన్ బారిన పడకుండా ఉండటానికి మంచి నీరు పుష్కలంగా తాగాలని సూచించారు. శరీరంలోని లవణాల సమతుల్యత కోసం ఓఆర్ఎస్ (ORS), మజ్జిగ, లస్సీ, నిమ్మరసం, కొబ్బరి నీళ్లు వంటి సహజ పానీయాలను తీసుకోవాలని సూచించారు.

మధ్యాహ్నం వేళల్లో ఎండ తీవ్రత ఎక్కువగా ఉంటుంది కాబట్టి, అత్యవసరమైతే తప్ప బయటకు రాకపోవడం ఉత్తమమని అధికారులు స్పష్టం చేశారు. ముఖ్యంగా గర్భిణీలు, చిన్న పిల్లలు, వృద్ధులు వడదెబ్బకు గురయ్యే ప్రమాదం ఎక్కువగా ఉన్నందున వారి విషయంలో ప్రత్యేక శ్రద్ధ తీసుకోవాలని సూచించారు. బయటకు వెళ్లాల్సి వస్తే గొడుగు లేదా తలకు టోపీ వంటివి ధరించడం శ్రేయస్కరం.