అమరావతికి ’మెగా‘ మాస్టర్ ప్లాన్
రాజధానిలో ఇంటర్నేషనల్ ఎయిర్పోర్ట్, వరల్డ్ క్లాస్ స్పోర్ట్స్ సిటీ, అంతర్జాతీయ టెండర్లు జారీ.
నవ్యాంధ్ర రాజధానిని ప్రపంచ పటంలో అగ్రస్థానంలో నిలబెట్టేందుకు ఏపీ ప్రభుత్వం సిద్ధమైంది. అమరావతిలో ప్రతిపాదిత అంతర్జాతీయ విమానాశ్రయం, ప్రపంచ స్థాయి స్పోర్ట్స్ సిటీ నిర్మాణాల కోసం సీఆర్డీఏ (CRDA) తన కార్యాచరణను ముమ్మరం చేసింది. రెండో విడత భూసమీకరణ ద్వారా సేకరించే భూముల్లో అద్భుతమైన మౌలిక సదుపాయాలు కల్పించేలా ఒక ’సమీకృత మాస్టర్ ప్లాన్‘ (Integrated Master Plan) రూపొందించేందుకు శ్రీకారం చుట్టింది.
గ్లోబల్ టెండర్లతో అంతర్జాతీయ కన్సల్టెంట్ల కోసం వేట
రాజధానిలో నిర్మించబోయే ఈ భారీ ప్రాజెక్టులు భవిష్యత్ అవసరాలకు తగ్గట్టుగా, అత్యాధునిక డిజైన్లతో ఉండాలని ప్రభుత్వం భావిస్తోంది. అందుకే, ఈ మాస్టర్ ప్లాన్ రూపకల్పన బాధ్యతను అత్యున్నత అనుభవం కలిగిన అంతర్జాతీయ కన్సల్టెంట్లకు అప్పగించేందుకు గ్లోబల్ టెండర్ నోటిఫికేషన్ను విడుదల చేసింది. రాజధాని ప్రాంతం కేవలం భవనాల సముదాయంలా కాకుండా, ఆర్థిక.. క్రీడా కేంద్రంగా విరాజిల్లాలన్నదే ఈ ప్లాన్ ప్రధాన ఉద్దేశం.
ముఖ్యమైన గడువులు ఇవే
ఈ మెగా ప్రాజెక్టుపై ఆసక్తి కలిగిన అంతర్జాతీయ సంస్థల కోసం సీఆర్డీఏ స్పష్టమైన షెడ్యూల్ను ప్రకటించింది. ఇప్పటికే టెండర్ షెడ్యూల్ డౌన్లోడింగ్ ప్రక్రియ ప్రారంభమైంది. ఈ నెల 28న సీఆర్డీఏ ప్రాజెక్టు కార్యాలయంలో ఆసక్తి గల సంస్థలతో ముందస్తు సమావేశం నిర్వహించి, ప్రాజెక్టు లక్ష్యాలను వివరించనున్నారు. ఆసక్తి గల సంస్థలు ఫిబ్రవరి 6వ తేదీ మధ్యాహ్నం 2 గంటల వరకు తమ టెండర్లను దాఖలు చేసుకునే విధంగా అవకాశం కల్పించారు.
రెండో విడత లక్ష్యం..ఆర్థిక, క్రీడా హబ్గా రాజధాని
రెండో విడత భూసమీకరణ కేవలం విస్తరణ కోసం మాత్రమే కాదు.. ఇది రాజధాని ముఖచిత్రాన్ని మార్చేసే కీలక అడుగు. విమానాశ్రయం రాకతో రాజధానిలో ఆర్థిక కార్యకలాపాలు ఊపందుకోనున్నాయి. మరోవైపు, స్పోర్ట్స్ సిటీ ద్వారా యువతకు అంతర్జాతీయ స్థాయి క్రీడా వేదికను అందుబాటులోకి తీసుకురానున్నారు. ఈ రెండింటినీ అనుసంధానిస్తూ రూపొందే మాస్టర్ ప్లాన్, అమరావతిని ఒక వైబ్రంట్ గ్లోబల్ సిటీగా నిలబెట్టనుంది.
