ఏపీలో ఐఏఎస్ అధికారుల భారీ బదిలీలు
ప్రభుత్వ ప్రధాన కార్యదర్శి (CS) కె. విజయానంద్ ఈ మేరకు ఆదేశాలు వెలువరించారు.
ఆంధ్రప్రదేశ్ పరిపాలనా యంత్రాంగంలో భారీ మార్పులు చోటుచేసుకున్నాయి. క్షేత్రస్థాయిలో ప్రభుత్వ పథకాల అమలును వేగవంతం చేస్తూనే, జిల్లాల వారీగా పాలనను పరుగులు పెట్టించేందుకు ప్రభుత్వం 14 మంది ఐఏఎస్ అధికారులను బదిలీ చేసింది. పలు జిల్లాలకు కొత్త జాయింట్ కలెక్టర్లను నియమిస్తూ ప్రభుత్వం తీసుకున్న నిర్ణయం.. అటు మున్సిపల్, ఇటు పౌర సరఫరాల వంటి కీలక శాఖల్లో నూతన జవజీవాలు నింపేలా కనిపిస్తోంది. ప్రభుత్వ ప్రధాన కార్యదర్శి (CS) కె. విజయానంద్ ఈ మేరకు ఆదేశాలు వెలువరించారు.
కీలక శాఖల్లో మార్పులు
రాష్ట్ర పరిపాలనా వ్యవస్థను మరింత సమర్థవంతంగా, సమతుల్యంగా నడిపించేందుకు చేపట్టిన ఈ బదిలీల ఉత్తర్వులను ప్రభుత్వ ప్రధాన కార్యదర్శి (సీఎస్) కె.విజయానంద్ జారీ చేశారు. ఇందులో భాగంగా పౌర సరఫరాల శాఖ డైరెక్టర్గా శ్రీవాస్ నుపుర్ అజయ్ కుమార్ను నియమించారు. గిరిజన కో-ఆపరేటివ్ కార్పొరేషన్ (GCC) ఎండీగా ఎస్.ఎస్. శోబికకు బాధ్యతలు అప్పగించగా, వైద్యారోగ్య , కుటుంబ సంక్షేమ శాఖ జాయింట్ సెక్రటరీగా రోణంకి గోపాలకృష్ణను నియమించారు. ఈ మార్పులు రాష్ట్ర స్థాయి కీలక శాఖల పనితీరును మెరుగుపరుస్తాయని ప్రభుత్వం అంచనా వేస్తోంది.
జిల్లాల వారీగా కొత్త జాయింట్ కలెక్టర్లు:
జిల్లా స్థాయిలో కీలకమైన జాయింట్ కలెక్టర్ల పోస్టింగ్లలో ప్రభుత్వం భారీ మార్పులు చేసింది. విశాఖపట్నం జేసీగా గొబ్బిళ్ల విద్యాధరి, ప్రకాశం జిల్లా జేసీగా కల్పన కుమారి, అనకాపల్లి జేసీగా మల్లవరపు సూర్యతేజ బాధ్యతలు చేపట్టనున్నారు. చిత్తూరు జిల్లాకు ఆదర్శ్ రాజేంద్రన్, అన్నమయ్య జిల్లాకు శివ్ నారాయణ్ శర్మ, పల్నాడు జిల్లాకు వి.సంజనా సింహలను జాయింట్ కలెక్టర్లుగా నియమించారు. అలాగే, అనంతపురం జేసీగా సి. విష్ణు చరణ్, మార్కాపురం జేసీగా పి. శ్రీనివాసులు నియామకమయ్యారు. తిరుపతి జేసీగా బాధ్యతలు చేపడుతున్న ఆర్. గోవిందరావు, తుడా వైస్ ఛైర్మన్గా కూడా వ్యవహరించనున్నారు.
కడపలో భార్యాభర్తలు:
ఈ బదిలీల జాబితాలో అత్యంత ఆసక్తికరమైన అంశం వైఎస్ఆర్ కడప జిల్లా జాయింట్ కలెక్టర్ నియామకం. కడప జేసీగా నియమితులైన నిధి మీనా, ప్రస్తుతం అదే జిల్లాలో ఎస్పీగా విధులు నిర్వహిస్తున్న నచికేత్ విశ్వనాథ్ భార్య కావడం విశేషం. ఒకే జిల్లాలో కీలకమైన రెవెన్యూ, పోలీస్ విభాగాల్లో భార్యాభర్తలు ఉన్నతాధికారులుగా ఉండటం ఇప్పుడు అధికార వర్గాల్లో చర్చనీయాంశంగా మారింది. ఇది జిల్లా పరిపాలనలో సమన్వయాన్ని మరింత పెంచుతుందని భావిస్తున్నారు.
మున్సిపల్, ఇతర పోస్టింగ్లు:
గుంటూరు మున్సిపల్ కార్పొరేషన్ కొత్త కమిషనర్గా కతవాటె మయూర్ అశోక్ను నియమించారు. గతంలో విశాఖ జేసీగా ఉన్న ఆయన ఇప్పుడు గుంటూరు నగర పాలనపై దృష్టి సారించనున్నారు. తాజా బదిలీల ద్వారా క్షేత్రస్థాయిలో అనుభవం ఉన్న యువ అధికారులకు కీలక బాధ్యతలు అప్పగించడం ద్వారా, ప్రభుత్వ ప్రాధాన్యతలను ప్రజలకు మరింత చేరువ చేయడమే లక్ష్యంగా కనిపిస్తోంది.
