మార్కాపురంలో హాహాకారాలు, గుండెలు తరుక్కుపోతున్న దృశ్యాలు

ఆంధ్రప్రదేశ్‌లోని మార్కాపురం జిల్లా రాయవరం సమీపంలో గురువారం ఉదయం ఘోర రోడ్డు ప్రమాదం సంభవించింది. తెలంగాణలోని జగిత్యాల నుంచి నెల్లూరు జిల్లా కలికిరి వెళ్తున్న 'హరికృష్ణ ట్రావెల్స్'కు చెందిన ప్రైవేటు స్లీపర్ బస్సు, పలకల క్వారీల వద్ద నిలిచి ఉన్న టిప్పర్‌ను అతివేగంతో ఢీకొట్టింది. ఈ ప్రమాదంలో ఇప్పటివరకు 20 మంది మృతి చెందగా, వారిలో 14 మంది సజీవ దహనమయ్యారు.

ప్రయాణీకులు ఇంకో గంటలో ఇళ్లకు చేరుకుంటున్నారనుకునే దశలో ఈ ఘోరం జరిగింది. ఉదయం 6:00 నుండి 6:30 గంటల మధ్య ఈ దుర్ఘటన జరిగింది. టిప్పర్‌ను బస్సు బలంగా ఢీకొట్టడంతో ఒక్కసారిగా మంటలు చెలరేగి బస్సు, టిప్పర్ రెండు పూర్తిగా దగ్ధమయ్యాయి.

బస్సు పరిస్థితి సరిగా లేదని ప్రయాణికులు ముందే ఆందోళన వ్యక్తం చేశారు. దీంతో యర్రగొండపాలెం వద్ద గంటసేపు మరమ్మతులు చేసిన తర్వాతే బస్సును ముందుకు తీసుకెళ్లారు.

ప్రమాద సమయంలో బస్సులో సుమారు 41 మంది ప్రయాణికులు ఉన్నారు. మంటలు క్షణాల్లో వ్యాపించడంతో వెనుక భాగంలో ఉన్న వారు బయటకు రాలేకపోయారు. మృతుల్లో ఎక్కువ మంది స్లీపర్ బెర్తులపై ఉన్నవారే.

ముందు భాగంలో ఉన్న కొందరు ప్రయాణికులు అద్దాలు పగలగొట్టి దూకి ప్రాణాలు దక్కించుకున్నారు.

ఘటనాస్థలాన్ని జేసీ శ్రీనివాసులు, ఎమ్మెల్యే కందుల నారాయణరెడ్డి పరిశీలించారు. ఏపీ సీఎం చంద్రబాబు నాయుడు మంత్రులతో సమీక్ష నిర్వహించి, బాధితులకు మెరుగైన వైద్యం అందించాలని ఆదేశించారు. తెలంగాణ సీఎం రేవంత్ రెడ్డి కూడా ఈ ఘటనపై దిగ్భ్రాంతి వ్యక్తం చేస్తూ, ఏపీ అధికారులతో సమన్వయం చేసుకోవాలని సీఎస్‌ను ఆదేశించారు.

బాధితుల వివరాల కోసం ప్రభుత్వం ఈ క్రింది నంబర్లను అందుబాటులోకి తెచ్చింది. 6304285613, 9985733999, 7989537285, 9703578434

ఈ ఘటనపై రాష్ట్రపతి ద్రౌపదీ ముర్ము, ప్రధాని నరేంద్ర మోదీ దిగ్భ్రాంతి వ్యక్తం చేశారు. ప్రధాని మోదీ మృతుల కుటుంబాలకు రూ. 2 లక్షలు, గాయపడిన వారికి రూ. 50 వేల చొప్పున ఎక్స్‌గ్రేషియా ప్రకటించారు.