అమరావతి ఓఆర్‌ఆర్‌కు భూసేకరణ షురూ

ఎన్టీఆర్ జిల్లాలోని కంచికచర్ల, వీరులపాడు, జి.కొండూరు, మైలవరం మండలాల పరిధిలో 1,416.31 హెక్టార్ల భూమిని సేకరించనున్నారు. 18 గ్రామాల పరిధిలోని 1,798 సర్వే నంబర్లలో ఈ భూమి విస్తరించి ఉంది. భూమి యజమానులు ఎవరైనా తమ అభ్యంతరాలను, సూచనలను 21 రోజుల్లోపు ఎన్టీఆర్ జిల్లా జాయింట్ కలెక్టర్‌కు లిఖితపూర్వకంగా అందజేయాలని అధికారులు సూచించారు. ఈ గడువు ముగిసిన తర్వాత నేషనల్ హైవేస్ యాక్ట్ 1956 సెక్షన్ 3(2) ప్రకారం తుది ఉత్తర్వులు జారీ చేస్తారు.

ఇప్పటికే డిసెంబరు 8న గుంటూరు, కృష్ణా జిల్లాలకు సంబంధించిన నోటిఫికేషన్లు విడుదలయ్యాయి.

గుంటూరు జిల్లా: మంగళగిరి, తాడికొండ, మేడికొండూరు, కొల్లిపర, తెనాలి, వట్టిచెరుకూరు సహా పలు మండలాల్లో 4,763 సర్వే నంబర్ల పరిధిలో 2,342.87 హెక్టార్ల సేకరణకు నోటిఫికేషన్ ఇచ్చారు.

కృష్ణా జిల్లా: బాపులపాడు, గన్నవరం, ఉంగుటూరు, కంకిపాడు, తోట్లవల్లూరు మండలాల్లో 2,002 సర్వే నంబర్ల నుంచి 1,111.71 హెక్టార్లను సేకరించనున్నారు.

ఈ భారీ ప్రాజెక్టు ద్వారా రాజధాని అమరావతికి మెరుగైన రవాణా సౌకర్యాలు కలగడమే కాకుండా, పరివాహక ప్రాంతాల్లో పారిశ్రామిక అభివృద్ధికి బాటలు పడతాయని ప్రభుత్వం భావిస్తోంది.