కేరళ హైకోర్టు ‘ది కేరళ స్టోరీ 2’ విడుదలపై స్టే..

‘ది కేరళ స్టోరీ 2’ సినిమా విడుదలపై కేరళ హైకోర్టు కీలక నిర్ణయం తీసుకుంది. సినిమా విడుదలపై 15 రోజుల తాత్కాలిక స్టే విధించింది. సెన్సార్ సర్టిఫికేషన్ యంత్రాంగం పునరాలోచన చేయాలని సీబీఎఫ్‌సీ (సెంట్రల్ బోర్డ్ ఆఫ్ ఫిల్మ్ సర్టిఫికేషన్)ను కోర్టు ఆదేశించింది. ఈ సినిమా ఫిబ్రవరి 27న విడుదల కావాల్సి ఉండగా, కేరళ హైకోర్టు ఈ నిర్ణయం తీసుకుంది. సినిమా సర్టిఫికేషన్‌ను సవాల్ చేస్తూ పిటిషనర్లు కోర్టులో రిట్ పిటిషన్ దాఖలు చేశారు. దీంతో న్యాయమూర్తి బేచు కురియన్ థామస్ మళ్లీ పరిశీలించాలని సీబీఎఫ్‌సీని ఆదేశించారు.

టీజర్ కంటెంట్‌పై కోర్టు అభ్యంతరాలు వ్యక్తం చేసింది. సినిమా ప్రజల అభిప్రాయాలను వక్రీకరించే అవకాశం ఉందని పేర్కొంది. పిటిషనర్లు సినిమా విడుదలను నిలిపివేయాలని కోర్టును కోరారు. కోర్టు ఈ 15 రోజులు సినిమా థియేటర్లలో ప్రదర్శించకూడదని తీర్పు ఇచ్చింది.

సినిమా విడుదలతో ప్రముఖ స్వాతంత్ర్య సమరయోధులు, సామాజిక వివాదాల మధ్య సామాజిక శాంతికి భంగం కలిగే అవకాశం ఉందని పిటిషనర్లు వాదించారు. కాగా నిర్మాతలకు ఈ స్టే పెద్ద ఎదురుదెబ్బ. సినిమా విడుదలకు కేవలం ఒక రోజు మాత్రమే మిగిలి ఉన్న సమయంలో ఈ తీర్పు వచ్చింది. 15 రోజుల తర్వాత కోర్టు స్టే నిలిపివేయడం లేదా పొడిగించడం అనేది కోర్టు నిర్ణయంపై ఆధారపడి ఉంటుంది.