కర్ణాటకలో 56,432 ప్రభుత్వ ఉద్యోగాల భర్తీకి ఆమోదం..

కర్ణాటకలో వివిధ ప్రభుత్వ విభాగాల్లో ఖాళీగా ఉన్న 56,432 పోస్టులను భర్తీ చేయడానికి కాంగ్రెస్ ప్రభుత్వం ఆమోదం తెలిపింది. ఈ నిర్ణయంతో నిరుద్యోగుల్లో ఆశలు చిగురించాయి.

రెండు రోజుల క్రితం హుబ్బళ్లిలో నిరుద్యోగులు పెద్ద సంఖ్యలో వీధుల్లోకి వచ్చి ప్రభుత్వంపై ఆగ్రహం వ్యక్తం చేశారు. ముఖ్యమంత్రి సిద్ధరామయ్య వారికి హామీ ఇచ్చారు. అయితే రిజర్వేషన్ల ఖరారు, ఆర్థిక శాఖ ఆమోదం వంటి అంశాలు నియామక ప్రక్రియను అడ్డంకిగా మారాయి.

రిజర్వేషన్ల నేపథ్యం..

2022లో బీజేపీ ప్రభుత్వం షెడ్యూల్డ్ కులాల రిజర్వేషన్లను 15% నుంచి 17%కి, షెడ్యూల్డ్ తెగల రిజర్వేషన్లను 3% నుంచి 7%కి పెంచింది. అయితే హైకోర్టు ఈ 56% రిజర్వేషన్ల అమలుపై మధ్యంతర స్టే ఇచ్చింది. సుప్రీంకోర్టు సూచనల ప్రకారం 50% పరిమితిలో (SC 15%, ST 3%) నియామకాలు నిర్వహించాలని ప్రభుత్వం నిర్ణయించింది.

నియామక ప్రక్రియ ఆలస్యమయ్యే అవకాశం?

స్వాభిమాని మాదిగ ఆర్గనైజేషన్స్ ఫెడరేషన్ కన్వీనర్ కేశవ్ మూర్తి ఫెడరల్ కర్ణాటక ప్రతినిధితో మాట్లాడుతూ.. అంతర్గత వర్గీకరణ వల్ల కొత్త గందరగోళం నెలకొందన్నారు. 56,432 పోస్టుల భర్తీకి సంబంధించి జాబితాలను ఖరారు చేయడం, లోపాలు లేని జాబితాలను తిరిగి సిద్ధం చేయడం, ఆర్థిక శాఖ ఆమోదం పొందడం వంటి కారణాలతో నియామక ప్రక్రియ ఆలస్యమయ్యే అవకాశాలు కనిపిస్తున్నాయి. అంతర్గత రిజర్వేషన్ల అమలు కాకపోవడం, దళిత సంఘాల ఆగ్రహం కొత్త న్యాయ పోరాటానికి దారితీయవచ్చు. ప్రభుత్వ నిర్ణయం 50% రిజర్వేషన్ పరిమితిలో కొనసాగుతున్నప్పటికీ, భవిష్యత్తులో కోర్టు తీర్పుకు అనుగుణంగా మార్పులు అవసరమవుతాయని స్పష్టం చేసింది.

ప్రభుత్వ ఉద్యోగాల భర్తీకి ప్రభుత్వం ద్వారాలు తెరిచినా..రిజర్వేషన్ల చట్టపర సమస్యలు, అంతర్గత వర్గీకరణ అంశాలు నియామక ప్రక్రియను పూర్తిగా సజావుగా జరగకుండా చేస్తాయా? అన్న అనుమానం కలుగుతోంది.