నందీశ్వర స్వామి సన్నిధిలో జగన్ ప్రత్యేక పూజలు

ఈ మహోత్సవం కోసం వైఎస్‌ జగన్ సంప్రదాయ దుస్తులు ధరించి, అత్యంత భక్తిశ్రద్ధలతో వేడుకలో పాల్గొన్నారు. ఆలయ అర్చకులు, వేద పండితుల ఆధ్వర్యంలో జరిగిన హోమాలు, ప్రత్యేక పూజల్లో ఆయన పాలుపంచుకున్నారు. అనంతరం స్వామివారికి అభిషేకాలు నిర్వహించి, వేద పండితుల నుంచి ఆశీర్వచనాలు, తీర్థప్రసాదాలు స్వీకరించారు.

ఈ సందర్భంగా జగన్ మాట్లాడుతూ.. దేవాలయాలు కేవలం ప్రార్థనా మందిరాలు మాత్రమే కావని, అవి మన దేశ సంస్కృతి, సంప్రదాయాలకు సజీవ ప్రతీకలని అభివర్ణించారు. భక్తి మార్గం ద్వారానే సమాజంలో శాంతి, సౌభ్రాతృత్వం వెల్లివిరుస్తాయి. ముఖ్యంగా గ్రామీణ ప్రాంతాల్లో పాత ఆలయాల పునర్నిర్మాణం, కొత్త ఆలయాల అభివృద్ధి ద్వారా ఆధ్యాత్మిక చైతన్యం మరింత విస్తరిస్తుంది అని ఆయన పేర్కొన్నారు.

నందీశ్వర స్వామివారి విగ్రహ ప్రతిష్ఠా కార్యక్రమాన్ని ఇంత వైభవంగా నిర్వహించడం గ్రామ ప్రజల ఐక్యతకు నిదర్శనమని జగన్ కొనియాడారు. ఈ కార్యక్రమాన్ని విజయవంతం చేసిన ఆలయ కమిటీ చైర్మన్ మారం శ్రీకాంత్ రెడ్డిని, ఇతర సభ్యులను ఆయన ప్రత్యేకంగా అభినందించారు. స్వామివారి కృపాకటాక్షాలు రాష్ట్ర ప్రజలందరిపై ఉండాలని ఆయన ఆకాంక్షించారు.

ఈ కార్యక్రమంలో కడప ఎంపీ వైఎస్‌ అవినాష్‌ రెడ్డితో పాటు వైఎస్సార్‌సీపీ ముఖ్య నాయకులు, స్థానిక ప్రజాప్రతినిధులు పాల్గొన్నారు. తమ అభిమాన నాయకుడిని చూసేందుకు, ఆలయ వేడుకల్లో పాల్గొనేందుకు పరిసర ప్రాంతాల నుంచి భక్తులు పెద్ద సంఖ్యలో తరలివచ్చారు.