బనారస్ చీరలు, ఆగ్రా లెదర్ ఎగుమతులకు భారీ దెబ్బ..

పశ్చిమాసియాలో కొనసాగుతున్న యుద్ధ పరిస్థితులు ఉత్తరప్రదేశ్ ఎగుమతి రంగాన్ని తీవ్రంగా ప్రభావితం చేస్తున్నాయి. ముఖ్యంగా గల్ఫ్ దేశాలకు ఎగుమతులు చేసే సూక్ష్మ, చిన్న, మధ్య తరహా పరిశ్రమలు (ఎంఎస్ఎంఈలు) ప్రస్తుతం సంక్షోభాన్ని ఎదుర్కొంటున్నాయి. గల్ఫ్ మార్కెట్లలో విలాస వస్తువుల అమ్మకాలు సుమారు 70–80 శాతం వరకు పడిపోయాయి.

యూపీ సంప్రదాయ పరిశ్రమలకు దెబ్బ..

రాష్ట్రానికి గుర్తింపుగా నిలిచిన బనారస్ చీరలు, భదోహి కార్పెట్లు, మోరాదాబాద్ హస్తకళలు, ఆగ్రా లెదర్ ఉత్పత్తులు, కన్నౌజ్ సుగంధ ద్రవ్యాలు వంటి అనేక రంగాలు ప్రస్తుతం తీవ్ర ఇబ్బందులు ఎదుర్కొంటున్నాయి. రవాణా నిలిచిపోవడం, ఆర్డర్లు రద్దు కావడం, రవాణా ఖర్చులు పెరగడం వల్ల వ్యాపారులు నష్టాల్లో కూరుకుపోతున్నారు.

హోర్ముజ్ జలసంధి ప్రభావం..

భారతదేశం, గల్ఫ్ దేశాల మధ్య ముఖ్యమైన సముద్ర మార్గమైన హోర్ముజ్ జలసంధి యుద్ధ ప్రభావంతో ప్రమాదకర ప్రాంతంగా మారింది. దీంతో అనేక సరుకు నౌకలు నిలిచిపోయాయి. బీమా కంపెనీలు బీమా కవరేజీని నిలిపివేయడం లేదా ప్రీమియంను సరుకు విలువలో మూడు శాతం వరకు పెంచడం వ్యాపారులకు భారంగా మారింది. ప్రత్యామ్నాయ మార్గాలు ఉన్నప్పటికీ అవి ఎక్కువ ఖర్చుతో ఉండటం వల్ల ఎగుమతులు మందగించాయి.

యూఏఈ మార్కెట్‌పై ప్రభావం..

యూపీకి అత్యంత ముఖ్యమైన మార్కెట్లలో ఒకటైన యూఏఈకి ఎగుమతులు దాదాపు నిలిచిపోయాయి. రంజాన్ ముందు గల్ఫ్ దేశాల్లో కొనుగోళ్లు ఎక్కువగా జరుగుతాయి. సాధారణంగా ఈ సమయంలో బనారస్ వస్త్రాలు, గృహ అలంకరణ వస్తువులు, లెదర్ ఉత్పత్తులు, సుగంధ ద్రవ్యాలకు భారీ డిమాండ్ ఉంటుంది. కానీ ఈసారి దుబాయ్ వంటి మార్కెట్లలో అమ్మకాలు గణనీయంగా పడిపోయాయి.

బనారసీ వ్యాపారి ముకుంద్ అగర్వాల్ మాట్లాడుతూ.. “రంజాన్‌కు ముందు పంపిన గృహ అలంకరణ వస్తువులు ఇప్పుడు గిడ్డంగుల్లోనే ఉన్నాయి. పాత చెల్లింపులు రావడం లేదు. కొత్త ఆర్డర్లు పూర్తిగా ఆగిపోయాయి,” అని చెప్పారు.

పెరిగిన రవాణా ఖర్చులు..

ఆగ్రాకు చెందిన లెదర్ ఎగుమతిదారుడు చౌధరీ షఫీకుర్రహ్మాన్ ప్రకారం.. షిప్పింగ్ కంపెనీలు రవాణా ధరలను మూడు నుంచి నాలుగు రెట్లు పెంచాయి. “సర్‌చార్జ్ చెల్లించకపోతే సరుకు పంపడం అసాధ్యం. చెల్లించినా కూడా బీమా దొరకడం లేదు,” అని అన్నారు.

ట్రేడ్ నిపుణుడు హర్జిందర్ సింగ్ మాట్లాడుతూ.. “హోర్ముజ్ జలసంధి సమస్యతో పాటు బ్యాంకింగ్ లావాదేవీలపై కూడా ప్రభావం పడుతోంది. చెల్లింపులు జరగకపోతే ఎగుమతులు పూర్తిగా నిలిచిపోతాయి,” అని హెచ్చరించారు.

ప్రభుత్వం జోక్యం చేసుకోవాలి..

ఈ పరిస్థితుల్లో ప్రభుత్వం తక్షణం జోక్యం చేసుకోవాలని ఎగుమతిదారులు కోరుతున్నారు. ఈ సీజన్ ఉత్పత్తి కోసం అనేక ఎంఎస్ఎంఈ యూనిట్లు రుణాలు తీసుకున్నాయి. కానీ చెల్లింపులు నిలిచిపోవడంతో రుణాల చెల్లింపులు కష్టంగా మారాయి.

“ప్రభుత్వం నుంచి కనీసం మార్గదర్శకత్వం వచ్చినా రంగానికి ధైర్యం ఇస్తుంది. లేకపోతే అనేక యూనిట్లు మూతపడే ప్రమాదం ఉంది. వాటిపై ఆధారపడిన లక్షలాది కార్మికులు ఉపాధి కోల్పోతారు,” అని వ్యాపారులు ఆందోళన వ్యక్తం చేస్తున్నారు.