గాలి మోటార్ ఎక్కడం ఇక గగనమే! హైదరాాబాద్ టు ఢిల్లీకి ఎంత అవుతుందంటే!

ఇరాన్-అమెరికా యుద్ధం భారత్‌ లో సామాన్యులు విమానం ఎక్కకుండా చేసేలా ఉంది. విమానాల్లో వినియోగించే ఇంధన ధరలు భారీగా పెరిగాయి. దీంతో సామాన్యులు విమానం ఎక్కడం ఇక గగనమే కానుంది. అంతర్జాతీయంగా చమురు ధరలు భగ్గుమనడంతో, దేశీయంగా విమాన ఇంధనం (ATF) ధర చరిత్రలో ఎన్నడూ లేని విధంగా రూ. 2 లక్షల మార్కును దాటింది. బుధవారం సవరించిన ధరల ప్రకారం, కిలో లీటర్ ఏటీఎఫ్ ధర ఏకంగా 114.5 శాతం మేర పెరగడం విమానయాన రంగాన్ని కుదిపేస్తోంది.

సాధారణంగా ప్రతి నెలా ఒకటో తేదీన చమురు కంపెనీలు ధరలను సవరిస్తుంటాయి. అయితే, ఈసారి పెరిగిన ధరలు అందరినీ దిగ్భ్రాంతికి గురిచేస్తున్నాయి.

కేవలం ఒక్క నెలలోనే రూ. 1,10,703 మేర పెరగడం గమనార్హం.

విమానయాన సంస్థల మొత్తం నిర్వహణ వ్యయంలో (Operating Cost) దాదాపు 40 శాతం ఒక్క ఇంధనం కోసమే వెచ్చించాల్సి ఉంటుంది. ఇప్పుడు ఇంధన ధర ఏకంగా రెట్టింపు కావడంతో, విమాన టికెట్ల ధరలు 30 నుంచి 50 శాతం మేర పెరిగే అవకాశం ఉందని మార్కెట్ నిపుణులు అంచనా వేస్తున్నారు. ఈ లెక్కన షార్ట్ రూట్స్ (హైదరాబాద్ - బెంగళూరు/విజయవాడ)లో ప్రస్తుతం ఉన్న ధరల కంటే రూ. 1,500 నుంచి రూ. 2,500 వరకు పెరగొచ్చు.

విమానయాన సంస్థలు ఇప్పటికే రెండు వైపుల నుంచి ఒత్తిడిని ఎదుర్కుంటున్నాయి. పశ్చిమాసియాలో ఉద్రిక్తతల వల్ల అంతర్జాతీయ విమానాలు చుట్టూ తిరిగి గమ్యస్థానాలకు పోవాల్సి వస్తోంది. దీనివల్ల ప్రయాణ సమయంతో పాటు ఇంధన వినియోగం కూడా పెరిగింది. పెరిగిన భారాన్ని తగ్గించుకోవడానికి ఇప్పటికే కొన్ని సంస్థలు 'ఫ్యూయెల్ సర్‌ఛార్జ్'ను విధిస్తున్నాయి. తాజా ధరల పెరుగుదలతో ఈ సర్‌ఛార్జ్ మరింత పెరగనుంది.

కేవలం విమాన ఇంధనమే కాకుండా, వాణిజ్య గ్యాస్ సిలిండర్ ధరలు కూడా భారీగా పెరగడంతో హోటల్, కేటరింగ్ రంగాలపై కూడా ప్రభావం పడనుంది. ఇది పరోక్షంగా సామాన్యుడి ఆహార ఖర్చులను కూడా పెంచనుంది.

పశ్చిమాసియా యుద్ధం 33వ రోజుకు చేరిన వేళ, ప్రపంచవ్యాప్తంగా సరఫరా గొలుసు దెబ్బతినడం భారత్ వంటి దేశాలపై తీవ్ర ప్రభావం చూపుతోంది. విమాన ప్రయాణం ఇప్పుడు కేవలం అవసరం మాత్రమే కాదు, ఒక ఖరీదైన భారంగా మారబోతోంది.

జర్నలిస్ట్ నోట్: విమానయాన సంస్థలు అధికారికంగా ధరల పెంపును ప్రకటించకపోయినప్పటికీ, ప్రస్తుత ATF ధరల ప్రకారం టికెట్ బుకింగ్స్ ఇప్పుడే చేసుకోవడం ఉత్తమమని నిపుణులు సూచిస్తున్నారు.