చెవిరెడ్డికి బెయిల్..వైసీపీ సంబరాలు

ఈ కేసులో సిట్ (SIT) మోపిన అభియోగాలు అత్యంత సంచలనంగా మారాయి. మద్యం డిస్టిలరీల నుంచి కొల్లగొట్టిన వేల కోట్ల సొత్తును ప్రధాన నిందితుడు రాజ్ కేసిరెడ్డి ద్వారా చెవిరెడ్డి భాస్కర్ రెడ్డి అందుకున్నారని, ఆ డబ్బే గత ఎన్నికల్లో వైఎస్సార్‌సీపీ అభ్యర్థులకు చేరిందని సిట్ తన చార్జిషీట్‌లో పేర్కొంది. ఈ వ్యవహారంలో చెవిరెడ్డిని కర్త, కర్మ, క్రియగా అభివర్ణిస్తూ ఆయన్ని ఏ-38గా, ఆయన కుమారుడు మోహిత్ రెడ్డిని ఏ-39గా నిందితుల జాబితాలో చేర్చింది.

అయితే, ఈ ఆరోపణలను వైఎస్సార్‌సీపీ అంతే ధీటుగా తిప్పికొట్టింది. అసలు కుంభకోణానికే ఆస్కారం లేని చోట, కేవలం రాజకీయ కక్షతోనే కట్టుకథలు అల్లారని ఆ పార్టీ వాదిస్తోంది. అక్రమంగా కేసులు బనాయించి, తీవ్ర అనారోగ్యంతో ఉన్నప్పటికీ చెవిరెడ్డిని 226 రోజుల పాటు జైల్లో ఉంచి ఇబ్బంది పెట్టారని, ఇదంతా కూటమి ప్రభుత్వం ఆడుతున్న రాజకీయ క్రీడ అని పార్టీ శ్రేణులు మండిపడుతున్నాయి. ఇప్పుడు హైకోర్టు బెయిల్ మంజూరు చేయడంతో, ప్రభుత్వ ఆరోపణలకు న్యాయస్థానంలోనే సమాధానం దొరికిందని వైకాపా నేతలు భావిస్తున్నారు.

నేడు విడుదలయ్యే అవకాశం

హైకోర్టు బెయిల్ మంజూరు చేయడంతో చెవిరెడ్డి అభిమానులు, అనుచరులు హర్షం వ్యక్తం చేస్తున్నారు. బెయిల్ ఉత్తర్వులు జైలు అధికారులకు అందిన తర్వాత ఆయన జైలు నుంచి విడుదల కానున్నారు. సుదీర్ఘ కాలం తర్వాత ఆయనకు ఉపశమనం లభించడంతో చంద్రగిరి నియోజకవర్గంలో వైఎస్సార్‌సీపీ శ్రేణులు సంబరాలు చేసుకుంటున్నారు.