హైకోర్టుకు కోటి సంతకాల పోరాటం..ప్రభుత్వానికి కీలక నోటీసులు

వైసీపీ ప్రధాన కార్యదర్శి లేళ్ల అప్పిరెడ్డి హైకోర్టులో పిల్ (PIL) దాఖలు చేశారు. 17 మెడికల్ కాలేజీలను ప్రభుత్వమే నిర్వహించాలని, ప్రైవేట్ వ్యక్తుల జోక్యం ఉండకూడదని కోరారు. పేద ప్రజలకు మెరుగైన వైద్యం ఉచితంగా అందించడమే లక్ష్యంగా ఈ కాలేజీలు ఏర్పాటయ్యాయని, ప్రైవేటీకరణ వల్ల ఆ లక్ష్యం దెబ్బతింటుందని పేర్కొన్నారు. మెడికల్ కాలేజీల నిర్వహణ ప్రభుత్వానికి భారం కాకుండా గత ప్రభుత్వం అప్పట్లోనే స్పష్టమైన మార్గదర్శకాలు రూపొందించిందని కోర్టుకు తెలిపారు. కొన్ని సీట్లను డొనేషన్ పద్ధతిలో కేటాయించి, ఆ నిధులను ఆసుపత్రుల అభివృద్ధికి వాడే విధానం ఉందని గుర్తు చేశారు. ప్రస్తుతం కూటమి ప్రభుత్వం చేపట్టిన టెండర్ల ప్రక్రియను వెంటనే నిలిపివేయాలని కోరుతూ మధ్యంతర ఉత్తర్వుల కోసం అనుబంధ పిటిషన్‌ను కూడా దాఖలు చేశారు. ఈ సందర్భంగా ప్రభుత్వ నిర్ణయానికి వ్యతిరేకంగా తాము సేకరించిన కోటి సంతకాలను ప్రజాభిప్రాయంగా కోర్టు దృష్టికి తీసుకెళ్లారు.

ఈ పిటిషన్‌పై విచారణ జరిపిన హైకోర్టు, గతంలో ఇదే అంశంపై దాఖలైన ఇతర పిటిషన్లతో కలిపి విచారిస్తామని స్పష్టం చేసింది. ఈ వ్యవహారంపై సమగ్ర వివరణతో కూడిన కౌంటర్ దాఖలు చేయాలని రాష్ట్ర ప్రభుత్వాన్ని ఆదేశించింది. తదుపరి విచారణను ఆరు వారాల పాటు వాయిదా వేసింది. ఈ కేసులో రాష్ట్ర ప్రభుత్వం, ఏపీఎంఎస్‌ఐడీసీ, నేషనల్ మెడికల్ కౌన్సిల్‌ లను ప్రతివాదులుగా చేర్చారు.