స్కూల్ బూట్లు వేసుకోలేదని మెడలో చెప్పుల దండలు
ఉయ్యూరులో గురువు అమానుషం. విచారణకు ఆదేశం.
విద్యాబుద్ధులు నేర్పించాల్సిన గురువే విచక్షణ మరిచారు. క్రమశిక్షణ పేరుతో పసి హృదయాలను గాయపరిచారు. స్కూల్ బూట్లు వేసుకోలేదన్న చిన్న కారణంతో విద్యార్థుల మెడలో బూట్లు, చెప్పుల దండలు వేసి అవమానించిన ఘటన కృష్ణా జిల్లా ఉయ్యూరులో కలకలం రేపింది. ఈ దారుణానికి సంబంధించిన దృశ్యాలు సోషల్ మీడియాలో వైరల్ కావడంతో విద్యాశాఖ అధికారులు రంగంలోకి దిగారు.
ఏం జరిగింది?
కృష్ణా జిల్లా ఉయ్యూరులోని ఓ ప్రైవేటు పాఠశాలలో శుక్రవారం ఉదయం ఈ ఘటన చోటుచేసుకుంది. పాఠశాల నిబంధనల ప్రకారం బూట్లు వేసుకురావాల్సిన విద్యార్థులు, వర్షాల వల్లనో లేదా ఇతర వ్యక్తిగత కారణాల వల్లనో చెప్పులు ధరించి వచ్చారు. దీనిపై ఆగ్రహంతో ఊగిపోయిన ప్రిన్సిపాల్ లక్ష్మి.. సుమారు పది మంది విద్యార్థులను ఎంపిక చేసి, వారి మెడలో బూట్ల దండలు వేశారు. తోటి విద్యార్థులందరి ముందు వారిని నిలబెట్టి మానసిక క్షోభకు గురిచేశారు.
తల్లిదండ్రుల ఆగ్రహం - అధికారుల విచారణ
విషయం తెలుసుకున్న విద్యార్థుల తల్లిదండ్రులు శనివారం పాఠశాలకు భారీగా చేరుకుని యాజమాన్యాన్ని నిలదీశారు. పిల్లలు తప్పు చేస్తే మందలించాలి లేదా మాకు చెప్పాలి.. అంతేకానీ ఇలా చెప్పుల దండలు వేసి వారిని అవమానిస్తారా? అంటూ మండిపడ్డారు. సోషల్ మీడియాలో ఈ వీడియోలు వైరల్గా మారడంతో విద్యాశాఖ అధికారులు స్పందించారు. ఉయ్యూరు డివిజన్ విద్యాశాఖ అధికారిణి (MEO) పద్మారాణి పాఠశాలకు చేరుకుని ప్రిన్సిపాల్, డైరెక్టర్లను విచారించారు.
విద్యాశాఖ సీరియస్.. బాధ్యులపై చర్యలు తప్పవు
ఈ ఘటనపై సమగ్ర విచారణ జరుపుతున్నామని, విద్యార్థుల పట్ల ఇలాంటి అమానుష చర్యలకు పాల్పడితే ఉపేక్షించేది లేదని అధికారులు స్పష్టం చేశారు. బాధ్యులైన వారిపై కఠిన చర్యలు తీసుకోవాలని విద్యార్థి సంఘాలు, తల్లిదండ్రులు డిమాండ్ చేస్తున్నారు. క్రమశిక్షణ నేర్పాల్సిన పాఠశాలే ఇలాంటి పైశాచిక చర్యలకు వేదిక కావడంపై సర్వత్రా విమర్శలు వెల్లువెత్తుతున్నాయి.
Next Story