స్త్రీ శక్తి' మ్యాజిక్: ఉచిత బస్సుతో తగ్గుతున్న రోడ్డు ప్రమాదాలు!

ఉచిత బస్సు పథకంతో రోడ్డు ప్రమాదాలు తగ్గాయా? అంటే అవుననే చెబుతున్నారు జిల్లా కలెక్టర్లు. కూటమి ప్రభుత్వం ప్రతిష్టాత్మకంగా అమలు చేస్తున్న 'సూపర్ సిక్స్' పథకాల్లో ఒకటి.. మహిళలకు ఉచిత బస్సు ప్రయాణం (స్త్రీ శక్తి). ఈ పథకం కేవలం మహిళల ఆర్థిక భారాన్ని తగ్గించడమే కాకుండా, రాష్ట్రంలో రోడ్డు ప్రమాదాల నివారణలోనూ కీలక పాత్ర పోషిస్తోందని తాజా గణాంకాలు వెల్లడిస్తున్నాయి. ప్రకాశం జిల్లాలో జరిగిన ఒక అధ్యయనం ఈ ఆసక్తికరమైన విషయాన్ని వెలుగులోకి తెచ్చింది.

మంగళవారం రాజధాని అమరావతి నుంచి ముఖ్యమంత్రి నారా చంద్రబాబు నాయుడు ప్రకాశం జిల్లా ఉన్నతాధికారులతో వర్చువల్‌గా సమీక్ష నిర్వహించారు. ఈ సందర్భంగా జిల్లా ఎస్పీ హర్షవర్థన్ రాజు ఒక కీలక నివేదికను సీఎంకు సమర్పించారు. 'స్త్రీ శక్తి' పథకం అమలులోకి రాకముందు ఆరు నెలలు, అమలులోకి వచ్చిన తర్వాత ఆరు నెలల గణాంకాలను విశ్లేషించగా.. జిల్లాలో రోడ్డు ప్రమాద మరణాల సంఖ్య గణనీయంగా తగ్గినట్లు తేలింది.

పథకం అమలు తర్వాత మరణాల రేటు 19 శాతం తగ్గింది.

గతంతో పోల్చితే జిల్లాలో ఓవరాల్‌గా 10 శాతం మేర రోడ్డు ప్రమాద మృతుల సంఖ్య తగ్గుముఖం పట్టింది.

సాధారణంగా గ్రామీణ మరియు పట్టణ ప్రాంతాల్లో మహిళలు ప్రైవేట్ వాహనాలు లేదా ద్విచక్ర వాహనాలపై ప్రయాణించేటప్పుడు ప్రమాదాలకు గురయ్యే అవకాశం ఎక్కువగా ఉండేది. అయితే, ఉచిత బస్సు పథకం అందుబాటులోకి రావడంతో మెజారిటీ మహిళలు సురక్షితమైన ఆర్టీసీ (RTC) బస్సుల వైపు మొగ్గు చూపుతున్నారు. దీనివల్ల రహదారులపై ద్విచక్ర వాహనాల రద్దీ తగ్గడం, నిపుణులైన డ్రైవర్లు నడిపే బస్సుల్లో ప్రయాణించడం వల్ల ప్రమాదాలు తగ్గుతున్నాయని అధికారులు విశ్లేషిస్తున్నారు.

ప్రకాశం జిల్లా నివేదికపై ముఖ్యమంత్రి చంద్రబాబు నాయుడు సంతృప్తి వ్యక్తం చేశారు. ఒక ప్రజా సంక్షేమ పథకం పరోక్షంగా ప్రజల ప్రాణాలను కాపాడటం హర్షించదగ్గ విషయమని ఆయన పేర్కొన్నారు. కేవలం ఒక జిల్లాకే పరిమితం కాకుండా, రాష్ట్రవ్యాప్తంగా అన్ని జిల్లాల్లోనూ ఇదే తరహా అధ్యయనం నిర్వహించి సమగ్ర నివేదిక ఇవ్వాలని ఉన్నతాధికారులను సీఎం ఆదేశించారు.

'స్త్రీ శక్తి' పథకం మహిళల జేబుకే కాకుండా, వారి ప్రాణాలకు కూడా భరోసానిస్తోందని ఈ అధ్యయనం నిరూపిస్తోంది.