నాదెండ్ల భాస్కరరావు బాగానే ఉన్నారు, పుకార్లు నమ్మకండి!

ఉమ్మడి ఆంధ్రప్రదేశ్ మాజీ ముఖ్యమంత్రి నాదెండ్ల భాస్కరరావు ఆరోగ్యంపై వస్తున్న పుకార్లను ఆయన కుమారుడు నాదెండ్ల మనోహర్ ఖండించారు. ఆయన ఆరోగ్యం క్షీణించిందని, ఆస్పత్రిలో చికిత్స పొందుతున్నారని ప్రచారం జరగడంతో కుటుంబ సభ్యులు వెంటనే స్పందించారు. ఈ వార్తలు పూర్తిగా అవాస్తవమని, భాస్కరరావు క్షేమంగానే ఉన్నారని ఆయన కుమారుడు, ఏపీ మంత్రి నాదెండ్ల మనోహర్ కార్యాలయం స్పష్టం చేసింది. నిర్ధారణలేని సమాచారాన్ని ప్రసారం చేయవద్దని మీడియాను కోరింది.

నాదెండ్ల భాస్కరరావు ఇటీవల హైదరాబాద్ లో అస్వస్థతకు గురయ్యారు. ఓ ప్రైవేటు ఆస్పత్రికి తరలించారు. ఇప్పటికీ ఆయన ఆస్పత్రిలో ఉన్నట్టు సమాచారం. శ్వాసకోస వ్యాధులకు సంబంధించి ఆయన చికిత్సపొందుతున్నారు.

నాదెండ్ల భాస్కరరావు గుంటూరు జిల్లాలోని దోనేపూడి గ్రామంలో జన్మించారు. సాధారణ కుటుంబం నుంచి రాజకీయాల్లోకి అడుగుపెట్టి, తన ప్రతిభతో రాష్ట్ర రాజకీయాల్లో గుర్తింపు పొందారు. న్యాయ విద్యను అభ్యసించిన ఆయన, రాజకీయాల్లో చురుకైన పాత్ర పోషిస్తూ శాసనసభ్యుడిగా, మంత్రిగా బాధ్యతలు నిర్వహించారు.

1984లో ఆంధ్రప్రదేశ్ రాజకీయాల్లో జరిగిన కీలక పరిణామాల మధ్య ఆయన ముఖ్యమంత్రిగా బాధ్యతలు స్వీకరించడం రాష్ట్ర చరిత్రలో పెద్ద మలుపు. ఆ కాలంలో జరిగిన రాజకీయ సంఘటనలు, మార్పులు ఆయన పేరు చుట్టూ ఎక్కువగా చర్చకు దారితీశాయి. తక్కువ కాలం ముఖ్యమంత్రిగా ఉన్నప్పటికీ, రాష్ట్ర రాజకీయాల్లో ఆయన ముద్ర స్పష్టంగా కనిపించింది.

కాలక్రమేణా ప్రత్యక్ష రాజకీయాల నుంచి దూరంగా ఉన్నప్పటికీ, నాదెండ్ల భాస్కరరావు పేరు ఇప్పటికీ ఆంధ్రప్రదేశ్ రాజకీయ చరిత్రలో ఒక ప్రత్యేక అధ్యాయంగా నిలిచింది. ఆయన కుమారుడు నాదెండ్ల మనోహర్ ప్రస్తుతం రాజకీయాల్లో కొనసాగుతూ కుటుంబ వారసత్వాన్ని ముందుకు తీసుకెళ్తున్నారు. ప్రస్తుతం మనోహర్ జనసేనలో ఉన్నారు.

నాదెండ్ల భాస్కరరావు ఆరోగ్యంపై వస్తున్న వదంతులు కలవరపెట్టాయి. దీంతో మనోహర్ కార్యాలయం స్పష్టత ఇచ్చింది. ప్రస్తుతం నాదెండ్ల భాస్కరరావు క్షేమంగా ఉన్నారని, ప్రజలు రూమర్లను నమ్మవద్దని కుటుంబం మరోసారి విజ్ఞప్తి చేసింది.