ఒలింపిక్స్ దేవుడెరుగు, ముందు మా బతుకేంటన్న అమరావతి రైతులు!

ఆంధ్రప్రదేశ్ రాజధాని అమరావతిలో రెండో విడత భూ సమీకరణ ప్రక్రియ ఉద్రిక్తతల మధ్య ప్రారంభమైంది. బుధవారం తుళ్లూరు మండలం వడ్డమానులో మంత్రి నారాయణ, ఎమ్మెల్యే తెనాలి శ్రావణ్ కుమార్ ఆధ్వర్యంలో నిర్వహించిన గ్రామసభలో ప్రభుత్వానికి రైతుల నుంచి ఊహించని ప్రతిఘటన ఎదురైంది.

రెండో విడతలో సుమారు 16,666 ఎకరాలను సేకరించడమే లక్ష్యంగా ప్రభుత్వం ఈ ప్రక్రియను చేపట్టింది. ఈ సందర్భంగా మంత్రి నారాయణ మాట్లాడుతూ.. ఈ భూములను అంతర్జాతీయ క్రీడా పోటీలు, ఒలింపిక్ నిర్వహణ కోసం వినియోగిస్తామని, మూడేళ్లలోనే అంతర్జాతీయ విమానాశ్రయం, క్రీడా ప్రాంగణాలు పూర్తి చేస్తామని హామీ ఇచ్చారు.

ముఖ్యంగా రైతులకు ఊరటనిచ్చేలా.. గతంలో ఇచ్చిన హామీ మేరకు రూ.1.50 లక్షల వరకు రుణమాఫీకి సీఎం చంద్రబాబు అంగీకరించారని, కౌలు కూడా పెంచే ఆలోచనలో ఉన్నారని మంత్రి ప్రకటించారు. రాజధాని అభివృద్ధిని గత ప్రభుత్వం అడ్డుకుందని, తాము నిధులు సమీకరించి వేగంగా ముందుకు వెళ్తున్నామని ఎమ్మెల్యే శ్రావణ్ కుమార్ పేర్కొన్నారు.

అయితే, ప్రభుత్వ హామీలపై రైతులు ససేమిరా అన్నారు. మొదటి దశలో భూములు ఇచ్చిన రైతుల పరిస్థితి ఏంటని వారు సూటిగా ప్రశ్నించారు. "తొలి దశలో వేలాది ఎకరాలు ఇస్తే మాకు అరణ్య రోదన మిగిల్చారు. సంచార జాతుల్లా రాష్ట్రం మొత్తం తిరుగుతున్నాం. అప్పట్లో చెప్పిన అభివృద్ధి ఏమైంది? మాకు కేటాయించిన ప్లాట్లను ఎందుకు అభివృద్ధి చేయలేదు?" అంటూ అధికారులను, ప్రజాప్రతినిధులను నిలదీశారు.

ఒకవైపు ప్రభుత్వం రెండో దశ భూ సమీకరణను భవిష్యత్ అభివృద్ధికి కీలకంగా చూపుతుంటే, మరోవైపు తొలి దశ అనుభవాలే రైతుల్లో అనుమానాలు, భయాలు పెంచుతున్నాయి. అమరావతి నిర్మాణం హామీల మీద నడుస్తుందా? లేక అమలు మీద నడుస్తుందా? అన్న ప్రశ్న ఈ గ్రామ సభతో మరింత బలంగా ముందుకు వచ్చింది.

రైతుల ప్రశ్నలతో గ్రామసభలో గందరగోళం నెలకొనగా, ఎమ్మెల్యే శ్రావణ్ కుమార్ స్పందిస్తూ.. అమరావతికి చట్టబద్ధత ఉందని, అభివృద్ధి జరగకపోతే కోర్టుకు వెళ్లే హక్కు ఉంటుందని చెప్పారు. అయినప్పటికీ, తమ డిమాండ్లు అంగీకరించే వరకు అడుగు ముందుకు వేయనిచ్చేది లేదని రైతులు స్పష్టం చేయడంతో రెండో విడత భూ సమీకరణ ప్రక్రియ సవాలుగా మారింది.

ప్రభుత్వం చెబుతున్న ఒలింపిక్స్ స్థాయి కలలు, రైతులు కోరుతున్న నిర్దిష్ట కాలపరిమితితో కూడిన అభివృద్ధి మధ్య నెలకొన్న ఈ ఘర్షణ అమరావతి భవిష్యత్తుపై ఉత్కంఠను రేపుతోంది.