ఐఏఎస్‌లకు పొడిగింపులు..ప్రొఫెసర్లకు వివక్షా?

ఐఏఎస్‌లకు లేని అభ్యంతరాలు..ప్రొఫెసర్ల విషయంలో ఎందుకు

పదవీ విరమణ చేసిన ఐఏఎస్‌ అధికారులకు ప్రభుత్వంలో కీలక బాధ్యతలు అప్పగిస్తూ పొడిగింపులు ఇస్తున్న విషయాన్ని కోర్టు ప్రత్యేకంగా ప్రస్తావించింది. పరిపాలనా అధికారులకు లేని అభ్యంతరాలు, విద్యాబోధనలో అపార అనుభవం ఉన్న ప్రొఫెసర్ల విషయంలో ఎందుకు వస్తున్నాయని నిలదీసింది. ఆర్థిక శాఖ అంగీకరించడం లేదన్న ప్రభుత్వ వాదనను ఆక్షేపిస్తూ, విద్యావేత్తల విషయంలో హేతుబద్ధత లేని నిర్ణయాలు తీసుకోవడంపై ధర్మాసనం తీవ్ర అసహనం వ్యక్తం చేసింది.

కోర్టుకు తప్పుడు సమాచారం ఇవ్వొద్దు

వయసు పెంపుపై వర్సిటీల నుండి ఎటువంటి సిఫార్సులు రాలేదని ప్రభుత్వం చెప్పడాన్ని జస్టిస్‌ బట్టు దేవానంద్, జస్టిస్‌ మండవ కిరణ్మయిలతో కూడిన ధర్మాసనం తీవ్రంగా తప్పుబట్టింది. వర్సిటీల నుంచి ఇప్పటికే సిఫార్సులు అందాయని, కోర్టుకు తప్పుడు సమాచారం ఇచ్చి తప్పుదోవ పట్టించవద్దని హెచ్చరించింది. ఈ మొత్తం వివక్ష వెనుక ఉన్న కారణాలను స్వయంగా వివరించాలని వ్యవసాయశాఖ ప్రత్యేక ప్రధాన కార్యదర్శి బుడితి రాజశేఖర్‌ను ఆదేశిస్తూ, ఈ నెల 23న కోర్టుకు హాజరుకావాలని సమన్లు జారీ చేసింది.

సింగిల్ జడ్జి తీర్పుపై ధర్మాసనం విచారణ

గతంలో సింగిల్ జడ్జి ఈ పదవీ విరమణ పెంపును ప్రభుత్వ విధానపరమైన నిర్ణయంగా పేర్కొంటూ దాఖలైన పిటిషన్లను కొట్టేశారు. అయితే, దీనిపై నాలుగు నెలల్లో నిర్ణయం తీసుకోవాలని ప్రభుత్వాన్ని ఆదేశించారు. ఈ తీర్పును సవాలు చేస్తూ ఉద్యాన, వెటర్నరీ, అగ్రికల్చర్ వర్సిటీల ప్రొఫెసర్లు, డీన్లు ధర్మాసనం ముందు అప్పీల్ దాఖలు చేశారు. సమానత్వపు హక్కును కాలరాస్తున్నారన్న పిటిషనర్ల వాదనలతో ఏకీభవిస్తూ, తాజా విచారణలో ధర్మాసనం ప్రభుత్వాన్ని గట్టిగా నిలదీసింది.