ఎల్‌నినో తీవ్రత: ఏపీలో వేడి, వర్షాభావం

అంతర్జాతీయ వాతావరణ సంస్థలు విడుదల చేసిన తాజా నివేదికల ప్రకారం 2026లో ఎల్‌నినో అభివృద్ధి చెందే అవకాశం 40 శాతం నుంచి 60 శాతం వరకు ఉంది. మే-జూలై మధ్య ఎల్‌నినో ప్రారంభమయ్యే ప్రభావం పెరుగుతోందని వరల్డ్ మెటియరాలజికల్ ఆర్గనైజేషన్ (WMO) హెచ్చరించింది. ఇది భారతదేశ మాన్సూన్‌పై ప్రతికూల ప్రభావం చూపుతుందని, ముఖ్యంగా ఆంధ్రప్రదేశ్, తెలంగాణ వంటి రాష్ట్రాల్లో వర్షాలు తగ్గి, వేడి పెరిగే అవకాశం ఉందని నిపుణులు అంచనా వేస్తున్నారు. లా నినా నుంచి ఎల్‌నినోకు మార్పు 2026 మధ్యకాలంలో జరిగే అవకాశం 60శాతం ఉందని నేషనల్ ఓషనిక్ అండ్ అట్మాస్ఫెరిక్ అడ్మినిస్ట్రేషన్ (NOAA) తెలిపింది.

ఆంధ్రప్రదేశ్‌లో వ్యవసాయం ఎక్కువగా వర్షాధారితమైనందున ఎల్‌నినో ప్రభావం పంటల ఉత్పత్తిపై తీవ్రంగా పడుతుంది. ఆచార్య ఎన్ జి రంగా అగ్రికల్చరల్ యూనివర్సిటీ వైస్-ఛాన్సలర్ ఆర్ శారదా జయలక్ష్మి దేవి రైతులు ముందుగా సన్నద్ధమవ్వాలని, శాస్త్రీయ వ్యవసాయ పద్ధతులు అనుసరించాలని సూచించారు. మ్యాంగో ఉత్పత్తి వంటి పంటలపై కూడా ఎల్‌నినో ప్రభావం పడుతుందని నిపుణులు హెచ్చరిస్తున్నారు. గత సంవత్సరాల్లో ఎల్‌నినో సమయంలో డ్రాట్ పరిస్థితులు ఏర్పడి, వ్యవసాయ ఉత్పత్తి తగ్గింది. 2026లో కూడా మాన్సూన్ వర్షాలు తక్కువగా పడే అవకాశం ఉండటంతో ఆహార ఉత్పత్తి, ద్రవ్యోల్బణం పెరిగే ప్రమాదం ఉంది.

ప్రభుత్వం ఇప్పటికే అన్ని రకాల చర్యలు తీసుకుంటోంది. జిల్లా కలెక్టర్ల సమావేశంలో బుడితి రాజశేఖర్ మాట్లాడుతూ ‘ఎల్‌నినో తీవ్రతను దృష్టిలో ఉంచుకుని ఇప్పటికే ప్రభుత్వం అన్ని రకాలుగా సన్నద్ధం అవుతోంది. జిల్లాల్లో కలెక్టర్లు కూడా దీన్ని దృష్టిలో ఉంచుకుని ఎలాంటి ఇబ్బందులు లేకుండా ముందస్తు చర్యలు తీసుకోవాలి’ అని సూచించారు. ఏప్రిల్ నాటికి మరిన్ని వివరాలు తెలుస్తాయని వాతావరణ నిపుణులు చెబుతున్నారు.