అమ్మవారి పాదాల చెంత ‘ఆంధ్ర’ పద్దు

శనివారం ఉదయం ప్రిన్సిపల్ ఫైనాన్స్ సెక్రటరీ పీయూష్ కుమార్, ఆర్థిక శాఖ కార్యదర్శి రోనాల్డ్ రోస్ , ఇతర ఉన్నతాధికారులు అమ్మవారిని దర్శించుకున్నారు. ఈ సందర్భంగా బడ్జెట్ ప్రతులను అమ్మవారి పాదాల చెంత ఉంచి, రాష్ట్ర పురోభివృద్ధిని కాంక్షిస్తూ ప్రత్యేక పూజలు నిర్వహించారు. ఆలయ ఈవో శీనా నాయక్ అధికారులకు ఘనస్వాగతం పలికి, బడ్జెట్ ప్రతులకు శాస్త్రోక్తంగా పూజా కార్యక్రమాలు జరిపించారు.

నిర్విఘ్నంగా అమలు కావాలని ప్రార్థన

పూజ అనంతరం వేద పండితులు అధికారులకు వేదాశీర్వచనం అందించి, అమ్మవారి తీర్థప్రసాదాలను అందజేశారు. రాష్ట్రాభివృద్ధిని, ప్రజా సంక్షేమాన్ని దృష్టిలో ఉంచుకుని రూపొందించిన ఈ బడ్జెట్ ఎటువంటి ఆటంకాలు లేకుండా నిర్విఘ్నంగా అమలు కావాలని తాము ప్రార్థించినట్లు అధికారులు ఈ సందర్భంగా తెలిపారు.

నేడే అసెంబ్లీలో ప్రవేశం

అమ్మవారి ఆశీస్సులు తీసుకున్న అనంతరం, ఈ బడ్జెట్ ప్రతులను ఆర్థిక మంత్రి పయ్యావుల కేశవ్‌కు అందజేశారు. దాదాపు రూ. 3.48 లక్షల కోట్ల భారీ అంచనాతో రూపొందించిన ఈ బడ్జెట్‌ను మంత్రి పయ్యావుల నేడు ఉదయం 11:15 గంటలకు అసెంబ్లీలో ప్రవేశపెట్టనున్నారు. అభివృద్ధి, సంక్షేమం సమతుల్యంగా సాగాలని కోరుకుంటూ అమ్మవారి సన్నిధిలో జరిగిన ఈ పూజ ఇప్పుడు అందరి దృష్టిని ఆకర్షించింది.