పెట్టుబడుల వేటలో చంద్రబాబు, లోకేష్
నాలుగు రోజుల పాటు జ్యూరిక్/దావోస్ లో పర్యటించనున్నారు.
ఆంధ్రప్రదేశ్ రాష్ట్రానికి భారీ పెట్టుబడులను ఆకర్షించడమే లక్ష్యంగా ముఖ్యమంత్రి నారా చంద్రబాబు నాయుడు, మంత్రి నారా లోకేష్ స్విట్జర్లాండ్లోని జ్యూరిక్ పర్యటనకు వెళ్లారు. ప్రధానంగా ప్రపంచ ఆర్థిక వేదిక (World Economic Forum - WEF) వార్షిక సదస్సులో పాల్గొనడం, అంతర్జాతీయ దిగ్గజ సంస్థల ప్రతినిధులతో భేటీ కావడం ఈ పర్యటన ప్రధాన ఉద్దేశ్యం.
ప్రపంచవ్యాప్తంగా ఉన్న అగ్రశ్రేణి కంపెనీల సీఈఓలు, మంత్రులు, ఆర్థిక నిపుణులు హాజరయ్యే జ్యూరిక్/దావోస్ సదస్సులో ఆంధ్రప్రదేశ్ను ఒక ప్రధాన పెట్టుబడి గమ్యస్థానంగా ప్రదర్శించడం సీఎం లక్ష్యం. స్పీడ్ ఆఫ్ డూయింగ్ బిజినెస్ అనే నినాదంతో ఏపీలో పెట్టుబడులకు ఉన్న అనుకూలతలను ఆయన అంతర్జాతీయ వేదికపై వివరించనున్నారు. మైక్రోసాఫ్ట్, గూగుల్, టెస్లా వంటి అంతర్జాతీయ దిగ్గజ సంస్థల ప్రతినిధులతో సీఎం, లోకేష్ విడివిడిగా సమావేశం కానున్నారు. విశాఖపట్నంలో ఐటీ హబ్, అమరావతిలో నాలెడ్జ్ ఎకానమీ, రాయలసీమలో ఎలక్ట్రానిక్ మ్యాన్యుఫ్యాక్చరింగ్ క్లస్టర్ల ఏర్పాటుపై వీరు చర్చలు జరపనున్నారు. మంత్రి నారా లోకేష్ ప్రధానంగా ఏపీని సెమీకండక్టర్ హబ్గా మార్చాలని లక్ష్యంగా పెట్టుకున్నారు. రాష్ట్రంలో నిరుద్యోగ సమస్యను పరిష్కరించడానికి లక్షలాది ఉద్యోగాల కల్పనే ఈ పర్యటన వెనుక ఉన్న అసలు లక్ష్యం. పెద్ద కంపెనీలు రాష్ట్రానికి వస్తే, అనుబంధ పరిశ్రమలు కూడా అభివృద్ధి చెంది స్థానిక యువతకు ఉపాధి లభిస్తుందని ప్రభుత్వం భావిస్తోంది.
ముఖ్యమంత్రి చంద్రబాబు నాయుడు ఆదివారం రాత్రి గన్నవరం విమానాశ్రయం నుండి ఢిల్లీ మీదుగా బయలుదేరారు. అక్కడ నుంచి జనవరి 19, సోమవారం ఉదయం స్విట్జర్లాండ్లోని జ్యూరిక్ విమానాశ్రయానికి చేరుకున్నారు. మంత్రి నారా లోకేష్ కూడా అదే రోజు (జనవరి 19) జ్యూరిక్ చేరుకున్నారు. వారికి అక్కడ ప్రవాసాంధ్రులు ఘన స్వాగతం పలికారు. ఈ పర్యటన మొత్తం నాలుగు రోజుల పాటు (జనవరి 19 నుండి 22 వరకు) కొనసాగనుంది. జ్యూరిక్ చేరుకోవడం, భారత రాయబారి మృదుల్ కుమార్తో భేటీ, ఎన్ఆర్ఐలతో సమావేశం కానున్నారు. అనంతరం దావోస్లో జరిగే ప్రపంచ ఆర్థిక వేదిక (WEF) సదస్సులో పాల్గొనడం, అంతర్జాతీయ కంపెనీల సీఈఓలతో సమావేశం కానున్నారు. తర్వాత పర్యటన ముగించుకుని ముఖ్యమంత్రి తిరిగి హైదరాబాద్ చేరుకుంటారు.
నాలుగు రోజుల వ్యవధిలో చంద్రబాబు నాయుడు మొత్తం 36 కీలక సమావేశాల్లో పాల్గొననున్నారు. సుమారు 16 మంది గ్లోబల్ సీఈఓలతో వన్-టు-వన్ సమావేశాలు, 9 రౌండ్ టేబుల్ సమావేశాల ద్వారా ఆంధ్రప్రదేశ్కు పెట్టుబడులను ఆకర్షించడమే ఈ పర్యటన ప్రధాన ఎజెండాగా నిర్ణయించుకున్నారు. ఇప్పటికే జ్యూరిక్ ఎయిర్పోర్టులో సింగపూర్ దేశాధ్యక్షుడు థర్మన్ షణ్ముగరత్నం, ప్రపంచ బ్యాంకు ప్రెసిడెంట్ అజయ్ బంగా, అసోం సీఎం హిమంత బిశ్వ శర్మలను ముఖ్యమంత్రి కలిశారు.
