దావోస్‌లో 'చంద్ర' ముద్ర

అంతర్జాతీయ దిగ్గజాలతో ముఖాముఖి భేటీలు

ముఖ్యమంత్రి చంద్రబాబు నాయుడు తన పర్యటనలో భాగంగా ప్రపంచ స్థాయి కంపెనీల అధినేతలతో వరుస భేటీలు జరుపుతున్నారు. ఇందులో భాగంగా తమారా హాస్పిటాలిటీ ఫౌండర్ సృష్టి శిబులాల్, సీఓఓ కుష్భు అవస్థితో సమావేశమై ఆంధ్రప్రదేశ్‌లో పర్యాటక రంగం, హోటల్ పరిశ్రమ విస్తరణపై చర్చించనున్నారు. అలాగే, కాలిబో ఏఐ అకాడెమీ సీఈఓ రాజ్ వట్టికుట్టి బృందంతో భేటీ అయ్యి రాష్ట్రంలో ఆర్టిఫిషియల్ ఇంటెలిజెన్స్ (AI) శిక్షణ కేంద్రాల ఏర్పాటు, సాంకేతిక నైపుణ్యాభివృద్ధిపై చర్చలు జరుపుతారు. అదనంగా, అంతర్జాతీయ ఆలోచనా వేదిక హొరైసిస్ చైర్మన్ ఫ్రాంక్ రిచర్‌తో సమావేశమై అంతర్జాతీయ పెట్టుబడుల ఆకర్షణపై సంప్రదింపులు జరుపుతారు.

కీలక వేదికలపై అంతర్జాతీయ ప్రసంగాలు

సాంకేతికత, పర్యావరణ పరిరక్షణ లక్ష్యంగా ముఖ్యమంత్రి పలు అంతర్జాతీయ సెషన్లలో పాల్గొంటున్నారు. బ్లూమ్‌బెర్గ్ నిర్వహించే "ట్రిలియన్స్ ఆఫ్ డాలర్స్ ఏఐ మూమెంట్" కార్యక్రమంలో ముఖ్య వక్తగా ప్రసంగిస్తూ, ప్రపంచ ఆర్థిక వ్యవస్థను ఏఐ ఎలా మార్చబోతుందో వివరించనున్నారు. ప్రకృతి వ్యవసాయం మరియు ఆహార భద్రతపై ఏపీ సీఎన్ఎఫ్ నిర్వహించే హీలింగ్ ప్లానెట్ త్రో రీజెనరేటివ్ ఫుడ్ సిస్టమ్స్ సెషన్‌లో పాల్గొని, రాష్ట్రంలో అమలు చేస్తున్న ప్రకృతి వ్యవసాయ విధానాలను ప్రపంచానికి పరిచయం చేస్తారు. అలాగే, ప్రకృతికి మేలు చేసే ఆర్థిక వృద్ధిపై నిర్వహించే చర్చా వేదికల్లోనూ తన అభిప్రాయాలను పంచుకుంటారు.

ఏపీ లాంజ్ సందడి.. మౌలిక వసతులపై చర్చ

దావోస్‌లోని ఏపీ లాంజ్ వేదికగా రాష్ట్ర అభివృద్ధి నమూనాను ముఖ్యమంత్రి ప్రదర్శిస్తున్నారు. బిల్డింగ్ ఇండియా ఇన్ఫ్రాస్ట్రక్చర్ కార్యక్రమంలో కేంద్ర మంత్రులతో కలిసి పాల్గొంటూ, అమరావతి రాజధాని నిర్మాణం, రాష్ట్రంలో మౌలిక సదుపాయాల కల్పన వంటి అంశాలపై ప్రజెంటేషన్ ఇచ్చే అవకాశం ఉంది. వాతావరణ మార్పుల నుంచి భూమిని కాపాడుకోవడానికి అవసరమైన ఆర్థిక వనరుల సమీకరణపై నిర్వహించే ఫైనాన్సింగ్ రీజెనరేషన్ కార్యక్రమంలో పాల్గొని, పర్యావరణ హితమైన పెట్టుబడుల ప్రాధాన్యతను ఆయన వివరించనున్నారు.