కర్ణాటకలో ‘ఎస్సీ/ఎస్టీ నిధుల దారి మళ్లింపు

కర్ణాటకలో సిద్ధరామయ్య నేతృత్వంలోని కాంగ్రెస్ ప్రభుత్వం ఎస్సీ/ఎస్టీ వర్గాల అభివృద్ధికి కేటాయించిన నిధులను హామీ పథకాల కోసం మళ్లించిందని ప్రతిపక్ష బీజేపీ తీవ్ర ఆరోపణలు చేసింది. ఈ అంశంపై కాంగ్రెస్ అగ్రనేత రాహుల్ గాంధీ ఎందుకు మౌనంగా ఉన్నారని ప్రశ్నించింది.

ప్రభుత్వం తన “గ్యారంటీ” పథకాలకు నిధులు సమకూర్చుకోవడానికి ఎస్సీ/ఎస్టీ వర్గాలకు కేటాయించిన డబ్బును మళ్లించిందని ప్రతిపక్ష నాయకుడు ఆర్. అశోక రాష్ట్ర అసెంబ్లీలో ఆరోపించారు. ఈ అంశంపై రాహుల్ గాంధీ స్పందించాలన్నారు.

రూ.39వేల కోట్లపై వివాదం..

షెడ్యూల్డ్ కులాల సబ్-ప్లాన్ (SCSP), ట్రైబల్ సబ్-ప్లాన్ (TSP) కింద కేటాయించిన సుమారు రూ.39వేల కోట్లను ప్రభుత్వం ఇతర పథకాల కోసం వాడుతోందని బీజేపీ ఆరోపిస్తోంది. అధికారికంగా కేటాయించిన రూ.42,018 కోట్లలో దాదాపు రూ.35,000 కోట్లు హామీ పథకాలకే మళ్లించారని, ఇక కేవలం రూ.7,000 కోట్లు మాత్రమే మిగిలాయని అశోక తెలిపారు. ఇది తాత్కాలిక ఆర్థిక సర్దుబాటు కాదని, వరుసగా మూడు బడ్జెట్‌లలో ఇలాగే నిధుల దుర్వినియోగం జరుగుతోందని ఆరోపించారు. దళితులు, గిరిజనుల విద్య, ఆరోగ్యం, సాధికారత కోసం చట్టబద్ధంగా కేటాయించిన నిధులను ఇతర అవసరాలకు వాడటం సమంజసం కాదన్నారు.

బడ్జెట్‌లో స్పష్టత కోరిన బీజేపీ..

మార్చి 6న బడ్జెట్ ప్రసంగంలో ముఖ్యమంత్రి ఈ నిధుల మళ్లింపును నిలిపివేస్తామని స్పష్టమైన హామీ ఇవ్వాలని బీజేపీ డిమాండ్ చేసింది. లేకపోతే ప్రజా ఆగ్రహాన్ని ఎదుర్కోవాల్సి వస్తుందని హెచ్చరించింది. 70కుపైగా సంస్థలు ఈ అంశంపై పోరాటానికి సిద్ధంగా ఉన్నాయని అశోక తెలిపారు.

కాంగ్రెస్ స్పందన?

ఈ ఆరోపణలపై కాంగ్రెస్ నుంచి తక్షణ ప్రతిస్పందన రాలేదు. ప్రభుత్వం తరఫున అధికారిక వివరణ కోసం ఎదురుచూస్తున్నారు. ఇదే సమయంలో, ఈ అంశం కర్ణాటక రాజకీయాల్లో ప్రధాన చర్చగా మారింది.