నెల్లూరు జిల్లాలో టీచర్‌పై ఆటో డ్రైవర్ కత్తితో దాడి.. నగలు దోపిడీ

ఘటన వివరాలు

హరిత (35) అనే ప్రభుత్వ ఉపాధ్యాయురాలు బాలాయపల్లి మండలం గొట్టిగాడి గ్రామంలోని ప్రాథమిక పాఠశాలలో పనిచేస్తున్నారు. ప్రతిరోజూలాగే ఈరోజు అంటే గురువారం కూడా స్కూలుకు వెళ్లేందుకు ఆమె గూడూరులో ఆటో ఎక్కారు. అయితే, మార్గమధ్యలో గూడూరు రూరల్ మండలం కందలి సమీపంలోకి రాగానే, డ్రైవర్ ఆటోను నిర్మానుష్య ప్రాంతంలోకి మళ్లించాడు.

కత్తితో దాడి..నగలు అపహరణ

నిర్మానుష్య ప్రదేశంలో ఆటో ఆపిన డ్రైవర్, ఒక్కసారిగా హరితపై కత్తితో దాడికి తెగబడ్డాడు. ఆమె ప్రతిఘటించే ప్రయత్నం చేసినా వినకుండా గాయపరిచి, ఆమె ధరించిన బంగారు ఆభరణాలను బలవంతంగా లాక్కొని అక్కడి నుంచి పరారయ్యాడు. దీంతో హరిత తీవ్ర గాయాలపాలయ్యారు.

వైద్యం .. పోలీసు దర్యాప్తు

తీవ్ర రక్తగాయాలతో ఉన్న ఉపాధ్యాయురాలిని స్థానికులు గమనించి వెంటనే గూడూరు ప్రాంతీయ ఆస్పత్రికి తరలించారు. పరిస్థితి విషమంగా ఉండటంతో, మెరుగైన చికిత్స నిమిత్తం వైద్యులు ఆమెను నెల్లూరులోని ఆస్పత్రికి రిఫర్ చేశారు. సమాచారం అందుకున్న గూడూరు రూరల్ పోలీసులు ఘటనా స్థలాన్ని పరిశీలించి కేసు నమోదు చేశారు. నిందితుడి కోసం గాలింపు చర్యలు ముమ్మరం చేశారు.