చిరునవ్వుతో విధులకు హాజరై.. గుండెపోటుతో విగతజీవిగా మారి!
సంక్రాంతి ముంగిట సచివాలయ ఉద్యోగి ఆకస్మిక మృతి.. పని ఒత్తిడే ప్రాణం తీసిందా?
ఆ ఇంట్లో సంక్రాంతి సంబరాలు మొదలవ్వాలి.. కొత్త బట్టలు, పిండివంటల సందడి ఉండాలి. కానీ, విధి ఆ కుటుంబంపై పగబట్టింది. నిత్యం ప్రజల సమస్యల పరిష్కారం కోసం శ్రమించే ఒక సచివాలయ ఉద్యోగి, పని ఒత్తిడి తట్టుకోలేక విధి నిర్వహణలోనే కుప్పకూలిపోయారు. విశాఖలోని ఆరిలోవ సచివాలయంలో టౌన్ ప్లానింగ్ సెక్రటరీగా పనిచేస్తున్న సుంకర ఉదయ్కుమార్(40) గుండెపోటుతో ఆకస్మికంగా మృతి చెందడం స్థానికంగా కలకలం రేపింది.
ఆ నిమిషం ఏం జరిగింది?
సింహాచలం ప్రాంతానికి చెందిన ఉదయ్కుమార్ మంగళవారం ఉదయం ఎప్పటిలాగే చిరునవ్వుతో విధులకు హాజరయ్యారు. అయితే ఆ ఉదయం ఆయనకు చేదు అనుభవాలు ఎదురయ్యాయి. తూర్పు జోన్ జెడ్సీ శివప్రసాద్ నిర్వహించిన కాన్ఫరెన్స్ కాల్లో ఆయన పాల్గొన్నారు. "సరిగా పనిచేయని వారిపై క్లస్టర్ల వారీగా రిపోర్టులు తీసి చర్యలు తీసుకుంటాం.. అప్పగించిన పని చేయాల్సిందే" అంటూ ఉన్నతాధికారుల నుంచి వచ్చిన హెచ్చరికలు ఉదయ్కుమార్ను తీవ్ర ఆందోళనకు గురిచేసినట్టు తెలుస్తోంది. అలా ఆ కాల్ ముగిసిన వెంటనే, జెడ్సీ పర్యటన నిమిత్తం ముడసర్లోవ పార్కు సమీపంలో ఎదురుచూస్తున్న ఉదయ్కుమార్ ఒక్కసారిగా ఛాతీ పట్టుకుని కుప్పకూలిపోయారు. తోటి సిబ్బంది హుటాహుటిన ఆస్పత్రికి తరలించినా ఫలితం లేకపోయింది. ఆయన అప్పటికే గుండెపోటుతో మరణించినట్లు వైద్యులు ధృవీకరించారు.
పని ఒత్తిడి.. ఉక్కిరిబిక్కిరి చేస్తున్న టార్గెట్లు!
ఉదయ్కుమార్ అకాల మృతికి ప్రభుత్వ యంత్రాంగం పెంచుకుంటూ పోతున్న పని ఒత్తిడే కారణమని తోటి సిబ్బంది కన్నీటిపర్యంతమవుతున్నారు. బి.పి.ఎల్ (BPL), ఎల్.ఆర్.ఎస్ (LRS), మాస్టర్ ప్లాన్ రోడ్ల వంటి భారీ బాధ్యతలకు తోడు.. నిత్యం సచివాలయ సర్వేలు, ఎన్నికల విధులు ఉద్యోగులపై మోయలేని భారంగా మారాయని వారు ఆవేదన వ్యక్తం చేస్తున్నారు. కనీసం పండుగ సెలవుల్లో కూడా ప్రశాంతత లేకుండా, ఉదయం నుంచి రాత్రి వరకు ఫోన్ కాన్ఫరెన్స్లతో అధికారులు ఉక్కిరిబిక్కిరి చేస్తున్నారని వారు వాపోతున్నారు. నిర్ణీత సమయంలోగా టార్గెట్లు పూర్తి చేయకపోతే మెమోలు ఇస్తామంటూ ఉన్నతాధికారులు చేస్తున్న హెచ్చరికలు ఉద్యోగుల గుండెల్లో గుబులు రేపుతున్నాయి. "కనీసం ఊపిరి తీసుకోలేనంతగా ఒత్తిడి పెంచి, అన్ని పనులకు ఒకేసారి గడువు విధిస్తే ప్రాణాలు పణంగా పెట్టాలా?" అని సహోద్యోగులు ప్రభుత్వాన్ని సూటిగా ప్రశ్నిస్తున్నారు.
వర్ణనాతీతమైన శోకం: సంక్రాంతి ముంగిట ఆరిపోయిన దీపం!
ఉదయ్కుమార్ మరణవార్త విన్న వెంటనే ఆస్పత్రికి చేరుకున్న కుటుంబ సభ్యుల ఆర్తనాదాలతో ఆ ప్రాంతమంతా కన్నీటి సంద్రమైంది. పండుగ పూట కొత్త బట్టలు, పిండివంటల సందడి ఉండాల్సిన ఆ ఇంట్లో.. ఉదయ్కుమార్ విగతజీవిగా పడి ఉండటం చూసి భార్యాపిల్లలు గుండెలవిసేలా రోదించడం అక్కడున్న ప్రతి ఒక్కరినీ కలిచివేసింది. "సంక్రాంతి జరుపుకోవాల్సిన ఇంట్లో ఇలా మృత్యువుతో విషాదం నింపావా.. మమ్మల్ని అనాథలను చేసి వెళ్లిపోయావా" అంటూ వారు బోరున విలపిస్తుంటే ఆస్పత్రి ప్రాంగణం మూగబోయింది. ఒక సామాన్య మధ్యతరగతి ఉద్యోగిగా తన కుటుంబం కోసం ఎన్నో ఆశలు, ఆశయాలతో శ్రమించిన ఉదయ్కుమార్.. చివరకు అధికారుల వేధింపులు, పని ఒత్తిడి అనే సుడిగుండంలో పడి అర్థాంతరంగా తనువు చాలించడం తీరని విషాదాన్ని మిగిల్చిందనే విమర్శలు వెల్లువెత్తుతున్నాయి.
