అస్సాం బీజేపీ సోషల్ మీడియా కో–కన్వీనర్ తొలగింపు..

అస్సాం ముఖ్యమంత్రి హిమంత బిస్వా శర్మకు సంబంధించిన వివాదాస్పద వీడియోను సోషల్ మీడియాలో అప్‌లోడ్ చేసిన రాష్ట్ర బీజేపీ సోషల్ మీడియా టీం కో–కన్వీనర్‌ను తొలగించినట్లు పార్టీ సీనియర్ లీడర్ ఒకరు వెల్లడించారు.

వీడియోలో ఏముంది?

వీడియోలో ముఖ్యమంత్రి శర్మ రైఫిల్‌తో ఇద్దరు వ్యక్తులపై కాల్పులు జరుపుతున్నట్లు చూపించారు. ఒక వ్యక్తి తలకు టోపీ ధరించి ఉండగా, మరొకరు గడ్డంతో కనిపించారు. వీడియోకు “పాయింట్–బ్లాంక్ షాట్” అనే శీర్షిక ఇవ్వడం తీవ్ర విమర్శలకు దారితీసింది. ఈ వీడియో AI–జనరేటెడ్ అని తర్వాత వెల్లడైంది.

ఎలా అప్‌లోడ్ అయ్యింది?

శనివారం సాయంత్రం అస్సాం బీజేపీ అధికారిక X (ట్విట్టర్) ఖాతాలో ఈ వీడియో పోస్టు అయింది. రాజకీయంగా పెద్ద ఎత్తున వ్యతిరేకత రావడంతో కొద్ది గంటల్లోనే దాన్ని తొలగించారు. సరైన అనుమతి లేకుండా, పరిశీలన లేకుండానే ఈ పోస్టు పెట్టారని పార్టీ తెలిపింది.

బాధ్యుడిపై చర్య..

ఈ వీడియోను అప్‌లోడ్ చేసిన వ్యక్తిని రాన్ వికాష్ గౌరవ్‌‌గా గుర్తించారు. ఆయనను వెంటనే సోషల్ మీడియా కో–కన్వీనర్ పదవి నుంచి తొలగించారు. సున్నితమైన విషయాలపై పోస్టులు పెట్టడానికి ముందు పార్టీ అధ్యక్షుడు లేదా సీఎం కార్యాలయం నుంచి అనుమతి తప్పనిసరి. అయితే ముఖ్యమంత్రి హిమంత బిస్వా శర్మ మొదట ఈ వీడియో గురించి తనకు తెలియదని చెప్పారు. తనపై కేసు నమోదైతే ఎదుర్కొనేందుకు సిద్ధమని, అవసరమైతే జైలుకు వెళ్లడానికైనా వెనుకాడనని వ్యాఖ్యానించారు.