మీ ఫోన్ ఎవరికైనా ఇస్తున్నారా? ఈ ఘోరం చూడండి!

మానవత్వంతో సాయం చేసిన తోటి ప్రయాణికుడినే మోసం చేయబోయి, దొరికిపోతాననే భయంతో రన్నింగ్ బస్సులో నుంచి దూకి ఓ యువకుడు మృతి చెందాడు. చిలకలూరిపేట నుంచి ఒంగోలు వైపు వెళ్తున్న ఆర్టీసీ బస్సులో జరిగిన ఈ విస్తుపోయే ఘటన వివరాలు ఇలా ఉన్నాయి.

ఏం జరిగిందంటే..

మేదరమెట్ల వద్ద బస్సు ఎక్కిన గోపీనాథ్ అనే యువకుడు.. తనకు అత్యవసరంగా రూ. 200 ఫోన్‌పే కావాలని, నగదు ఇస్తానని ప్రయాణికులను కోరాడు. మురళీకృష్ణ అనే ప్రయాణికుడు మానవత్వంతో స్పందించి గోపీనాథ్ చెప్పిన నంబర్‌కు రూ. 200 పంపగా, అందుకు ప్రతిగా గోపీనాథ్ నగదు చెల్లించాడు. ఈ క్రమంలో మురళీకృష్ణ ఫోన్‌పే పిన్ (PIN) టైప్ చేస్తుండగా గోపీనాథ్ గమనించాడు. అనంతరం తన ఫోన్ డెడ్ అయిందని, అత్యవసర కాల్ చేసుకోవాలని మురళీకృష్ణ ఫోన్‌ను తీసుకున్నాడు. కాల్ మాట్లాడుతున్నట్లు నటిస్తూ.. అంతకుముందు తను చూసిన పాస్‌వర్డ్‌ను ఉపయోగించి మురళీకృష్ణ అకౌంట్ నుంచి వేరే నంబర్‌కు రూ. 90,000 అక్రమంగా బదిలీ చేశాడు.

కొద్దిసేపటికి అనుమానం వచ్చి మురళీకృష్ణ తన ఫోన్ చెక్ చేయగా.. భారీ మొత్తంలో డబ్బు ట్రాన్స్‌ఫర్ అయినట్లు మెసేజ్ చూసి అవాక్కయ్యాడు. వెంటనే గోపీనాథ్‌ను నిలదీశాడు. బస్సులోని మిగతా ప్రయాణికులు కూడా అలెర్ట్ అవ్వడంతో, తన మోసం బయటపడిందని గ్రహించిన గోపీనాథ్ తీవ్ర భయాందోళనకు గురయ్యాడు. బస్సు ఆపకముందే కిటికీలోంచి ఒక్కసారిగా బయటకు దూకేశాడు. తీవ్ర గాయాలపాలైన అతడిని ఒంగోలు జీజీహెచ్ (GGH) ఆసుపత్రికి తరలించగా, అక్కడ చికిత్స పొందుతూ మృతి చెందాడు. పోలీసులు కేసు నమోదు చేసి దర్యాప్తు చేస్తున్నారు.

ప్రయాణాల్లో అపరిచితులకు సహాయం చేసేముందు ఒక్క నిమిషం ఆలోచించండి. మీ మానవత్వమే మీకు శాపంగా మారే ప్రమాదం ఉంది. చిలకలూరిపేట - ఒంగోలు బస్సులో జరిగిన ఈ దారుణ సంఘటన మనందరికీ ఒక కనువిప్పు. మిమ్మల్ని మీరు కాపాడుకోవడానికి ఈ జాగ్రత్తలు పాటించండి.

ఫోన్ పిన్ (PIN) గోప్యత: ఫోన్‌పే, జీపే వంటి యాప్స్ వాడుతున్నప్పుడు మీ సీక్రెట్ పిన్ ఎంటర్ చేసేటప్పుడు ఎవరూ చూడకుండా స్క్రీన్‌ను కవర్ చేయండి.

అపరిచితులకు ఫోన్ వద్దు: తెలియని వ్యక్తులు 'అర్జుంట్ కాల్' అని అడిగితే మీరే నంబర్ డయల్ చేసి, స్పీకర్ మోడ్‌లో ఉంచి మాట్లాడమనండి. ఫోన్ మాత్రం వారి చేతికి ఇవ్వకండి.

పాస్‌వర్డ్ లాక్: మీ మొబైల్‌లోని పేమెంట్ యాప్స్‌కు ఖచ్చితంగా ఫింగర్ ప్రింట్ లేదా ఫేస్ లాక్ పెట్టుకోండి.

మెసేజ్‌లపై కన్నేయండి: మీ అకౌంట్ నుంచి ఏదైనా ట్రాన్సాక్షన్ జరిగినప్పుడు వచ్చే మెసేజ్‌లను వెంటనే గమనించండి. అనుమానం వస్తే వెంటనే బ్యాంక్ లేదా పోలీసులకు ఫిర్యాదు చేయండి.

ఒక్క క్షణం అశ్రద్ధ మీ జీవితకాల సంపాదనను దూరం చేయవచ్చు. ఈ సమాచారాన్ని మీ మిత్రులకు, కుటుంబ సభ్యులకు షేర్ చేసి వారిని అప్రమత్తం చేయండి.