లిల్లీ పువ్వు ఆకారంలో అమరావతి ’ఐకానిక్‘ భవనం

అమరావతి ఐకానిక్ శాసనసభ భవనం కేవలం అలంకారప్రాయమైన కట్టడమే కాదు.. రేపటి తరానికి దిక్సూచిగా నిలిచే ఒక అత్యాధునిక పరిపాలనా కేంద్రం. ఈ భవనాన్ని ప్రధానంగా మూడు విభాగాలుగా విభజించి.. అత్యున్నత ప్రమాణాలతో తీర్చిదిద్దుతున్నారు. భవనంలోని గ్రౌండ్ ఫ్లోర్ (తొలి అంతస్తు) ప్రజాప్రతినిధుల గొంతుక వినిపించే అసెంబ్లీ హాల్‌కు వేదిక కానుంది. దానికి సరిగ్గా పైన ఉన్న మొదటి అంతస్తులో శాసన మండలి (కౌన్సిల్) హాల్‌ను ఏర్పాటు చేస్తున్నారు. సభాపతులు.. సభ్యులు.. సందర్శకుల కోసం ప్రత్యేక ప్రవేశ మార్గాలను ఏర్పాటు చేస్తూ.. ఎక్కడా రద్దీ లేకుండా పకడ్బందీగా డిజైన్ చేశారు.

ఈ ’ప్రజాస్వామ్య దేవాలయం‘ లోపల అడుగుపెడితే మనం ఒక డిజిటల్ ప్రపంచంలో ఉన్నామా అనే అనుభూతి కలుగుతుంది. సభ్యుల సీట్ల వద్ద అత్యాధునిక టచ్ స్క్రీన్లు.. బయోమెట్రిక్ ఓటింగ్ సిస్టమ్.. పేపర్‌లెస్ కార్యకలాపాలకు వీలుగా డిజిటల్ మౌలిక సదుపాయాలను సిద్ధం చేస్తున్నారు. సందర్శకుల కోసం ప్రత్యేకంగా ఏర్పాటు చేసిన గ్యాలరీల ద్వారా, సభా మర్యాదలకు భంగం కలగకుండా సామాన్య ప్రజలు కూడా సభా దృశ్యాలను వీక్షించే వెసులుబాటు ఉంటుంది. సభ్యుల మధ్య చర్చలు, చట్టాల రూపకల్పన వంటివి అత్యంత పారదర్శకంగా, సాంకేతిక పరిజ్ఞానంతో మేళవించి సాగేలా ఈ భవనాన్ని ఒక ’స్మార్ట్ అసెంబ్లీ‘ గా ప్రభుత్వం తీర్చిదిద్దుతోంది.