రాజమండ్రిలో మళ్ళీ కల్తీ కోరలు..పాలల్లో డిటర్జెంట్, యూరియా
కఠిన ఆదేశాలు జారీ చేసిన కలెక్టర్.
రాజమండ్రిలో కల్తీ పాల మాఫియా సామాన్యుల ప్రాణాలతో చెలగాటమాడుతోంది. ఇటీవలే కల్తీ పాలు తాగి 16 మంది మృతి చెందిన ఘటన మరువకముందే, తాజాగా నిర్వహించిన తనిఖీల్లో విస్తుపోయే నిజాలు వెల్లడయ్యాయి. ఆహార పరిరక్షణ అధికారులు సేకరించిన నమూనాల్లో ప్రమాదకరమైన రసాయనాలు ఉన్నట్లు తేలడంతో స్థానికులు తీవ్ర భయాందోళనలకు గురవుతున్నారు. అధికారుల నిర్లక్ష్యంపై ప్రజల్లో ఆగ్రహం వ్యక్తమవుతుండగా, జిల్లా యంత్రాంగం కఠిన చర్యలకు సిద్ధమైంది.
ల్యాబ్ నివేదికల్లో విస్తుపోయే నిజాలు
ఆహార పరిరక్షణ అధికారులు రాజమండ్రి పరిసర ప్రాంతాల్లో 190 పాల నమూనాలను సేకరించి లాబరేటరీలకు పంపారు. వీటిలో 9 నమూనాల్లో తీవ్రస్థాయిలో కల్తీ జరిగినట్లు నిర్ధారణ అయింది. 9 మంది వ్యాపారుల వద్ద సేకరించిన ఈ పాలల్లో డిటర్జెంట్, యూరియా, పిండి పదార్థాలు కలిపినట్టు నివేదికలు స్పష్టం చేశాయి. తెల్లగా కనిపించే ఈ విషం ప్రజల ఆరోగ్యాన్ని నిలువునా దెబ్బతీస్తోంది.
విషాదం నుంచి తేరుకోకముందే
ఫిబ్రవరి 16న జరిగిన కల్తీ పాల ఘటనలో ఇప్పటికే 16 మంది ప్రాణాలు కోల్పోయారు. ఆ సమయంలో పాలు తాగిన వారిలో 20 మంది కిడ్నీ సంబంధిత అనూరియా (Anuria) వ్యాధి బారిన పడ్డారు. ప్రస్తుతం ఇద్దరు చిన్నారులు ప్రైవేట్ ఆసుపత్రిలో మృత్యువుతో పోరాడుతూ చికిత్స పొందుతున్నారు. ఇన్ని ప్రాణాలు పోతున్నా కల్తీని అరికట్టడంలో వ్యవస్థలు విఫలమవుతున్నాయని స్థానికులు మండిపడుతున్నారు.
అధికారుల కొరత..పెచ్చరిల్లుతున్న కల్తీ
ఆహార కల్తీని నియంత్రించాల్సిన విభాగంలో తీవ్రమైన సిబ్బంది కొరత వేధిస్తోంది. మొత్తం తూర్పుగోదావరి జిల్లాకు కేవలం ఒక్క ఫుడ్ ఇన్స్పెక్టర్ మాత్రమే ఉండటం గమనార్హం. జిల్లా అంతటా తనిఖీలు నిర్వహించడం ఒక్కరితో సాధ్యం కాకపోవడంతో కల్తీ వ్యాపారులు ఆసరాగా చేసుకుని రెచ్చిపోతున్నారని ఆరోపణలు వెల్లువెత్తుతున్నాయి.
కలెక్టర్ సీరియస్.. రూ. 5 లక్షల జరిమానా
రాజమండ్రిలో కల్తీ పాలు మరోసారి వెలుగులోకి రావడంపై తూర్పుగోదావరి జిల్లా కలెక్టర్ కీర్తి చేకూరి తీవ్రస్థాయిలో స్పందించారు. ఇప్పటికే కల్తీ పాలు తాగి పలువురు ప్రాణాలు కోల్పోయిన విషాదం మరువకముందే, మళ్లీ పాలల్లో డిటర్జెంట్, యూరియా వంటి ప్రమాదకర రసాయనాలు కలపడంపై ఆమె ఆగ్రహం వ్యక్తం చేశారు. ప్రజల ఆరోగ్యంతో, ముఖ్యంగా పసిపిల్లల ప్రాణాలతో ఆడుకునే కల్తీ మాఫియాను ఎట్టిపరిస్థితుల్లోనూ వదిలిపెట్టబోమని ఆమె హెచ్చరించారు.
కఠిన నిబంధనలు..భారీ జరిమానాలు
కల్తీని అరికట్టేందుకు కలెక్టర్ కీర్తి చేకూరి అత్యంత కఠినమైన నిబంధనలను తెరపైకి తెచ్చారు. ఇకపై జిల్లాలో లైసెన్స్ లేకుండా ఎవరైనా పాల విక్రయాలు జరిపితే, వారికి ఏకంగా ఐదు లక్షల రూపాయల భారీ జరిమానా విధిస్తామని స్పష్టం చేశారు. కేవలం జరిమానాలతోనే సరిపెట్టకుండా, నిబంధనలు ఉల్లంఘించే వారిపై క్రిమినల్ కేసులు నమోదు చేయాలని ఆదేశించారు. పాల వ్యాపారులందరూ తప్పనిసరిగా ఆహార భద్రత ప్రమాణాలను పాటించాలని, లేనిపక్షంలో కఠిన చర్యలు తప్పవని అల్టిమేటం జారీ చేశారు.
నిరంతర తనిఖీలకు ఆదేశం
జిల్లావ్యాప్తంగా ఆహార కల్తీ నియంత్రణపై కలెక్టర్ ప్రత్యేక దృష్టి సారించారు. కేవలం పట్టణ ప్రాంతాలకే పరిమితం కాకుండా, జిల్లాలోని మారుమూల గ్రామాల వరకు ఉన్న పాల సేకరణ కేంద్రాలు, డెయిరీ ఫామ్స్లో నిరంతర తనిఖీలు చేపట్టాలని అధికారులను ఆదేశించారు. సిబ్బంది కొరత ఉన్నప్పటికీ, ప్రత్యేక బృందాలను ఏర్పాటు చేసి ఆకస్మిక దాడులు నిర్వహించాలని, ఎక్కడ చిన్న అనుమానం వచ్చినా వెంటనే నమూనాలను సేకరించి ల్యాబ్లకు పంపాలని అధికారులకు దిశానిర్దేశం చేశారు.
Next Story