తమిళనాడులో పెరుగుతున్న టీనేజ్ గర్భధారణలు

తమిళనాడులో బాలికల టీనేజ్ గర్భధారణలు పెరుగుతున్నాయి. రాష్ట్రంలో మొత్తం గర్భధారణలు తగ్గుతున్నప్పటికీ, 13 నుంచి 19 సంవత్సరాల మధ్య వయస్సున్న బాలికల గర్భధారణలు మాత్రం గణనీయంగా పెరిగాయి. ఇది ఆరోగ్య నిపుణులను ఆందోళనకు గురిచేస్తోంది.

ప్రభుత్వ గణాంకాల ప్రకారం 2019–20లో రాష్ట్రంలో మొత్తం గర్భధారణలు సుమారు 10.2 లక్షలు ఉండగా, 2023–24 నాటికి అవి 9.5 లక్షలకు తగ్గాయి. అయితే ఇదే సమయంలో టీనేజ్ గర్భధారణలు 11,772 నుంచి 14,360కు పెరిగాయి. ఐదేళ్లలో దాదాపు 20 శాతం పెరుగుదల నమోదైంది. మొత్తం గర్భధారణల్లో టీనేజ్ గర్భధారణల శాతం కూడా 1.1 నుంచి 1.5 శాతానికి పెరిగింది.

చిన్న వయసులో గర్భం దాల్చడం వల్ల బాలికలు అనేక ఆరోగ్య సమస్యలను ఎదుర్కొంటారు. ముఖ్యంగా రక్తహీనత, ముందస్తు ప్రసవం, తల్లికి ఇతర ఆరోగ్య సమస్యలు వచ్చే ప్రమాదం ఎక్కువగా ఉంటుందని వైద్యులు చెబుతున్నారు.

బాల్య వివాహాలు కూడా కారణం..

ప్రభుత్వ గణాంకాల ప్రకారం 18 ఏళ్ల లోపు బాలికల ప్రసవాలు కొన్ని జిల్లాల్లో ఎక్కువగా నమోదవుతున్నాయి. ముఖ్యంగా నాగపట్టినం, తిరునెల్వేలి, తిరుచ్చి, వెల్లూరు జిల్లాల్లో ఈ కేసులు అధికంగా ఉన్నాయి.

సమాచార హక్కు చట్టం ద్వారా వెలుగులోకి వచ్చిన వివరాల ప్రకారం.. తిరునెల్వేలి జిల్లాలో 2021 నుంచి 2023 మధ్య 34 నెలల కాలంలో 1,448 మంది 18 ఏళ్ల లోపు బాలికలు ప్రసవించారు. అయితే చాలా సందర్భాల్లో బాల్య వివాహాలు అధికారికంగా నమోదు కాకపోవడం వల్ల అన్ని కేసులు రికార్డుల్లో కనిపించకపోవచ్చని అధికారులు భావిస్తున్నారు.

ఒక గ్రామం కథ..

నాగపట్టినం జిల్లా సమీపంలోని ఒక గ్రామానికి చెందిన 17 ఏళ్ల కవియా (పేరు మార్చబడింది) గత సంవత్సరం 11వ తరగతి చదువు మానేసింది. ఒక యువకుడితో స్నేహం ఉందని గ్రామంలో ప్రచారం రావడంతో కుటుంబ సభ్యులు ఆందోళన చెందారు. కొద్ది నెలల్లోనే ఆమెకు పెళ్లి చేశారు. 2025 ప్రారంభంలో ఆమె గర్భవతి అయింది.

ఆమె ప్రభుత్వ ఆసుపత్రిలో సురక్షితంగా ప్రసవించినప్పటికీ, చదువు మాత్రం తిరిగి ప్రారంభం కాలేదు. ఇలాంటి ఘటనలు గ్రామీణ ప్రాంతాల్లో ఎక్కువగా జరుగుతున్నాయని అధికారులు చెబుతున్నారు.

డ్రాప్‌అవుట్ ప్రభావం..

అమ్మాయిలు చదువు మానేస్తే కుటుంబాలు త్వరగా పెళ్లి చేయాలని భావిస్తాయి. చాలాసార్లు అధికారులు స్పందించే సమయానికి ఆ బాలిక ఇప్పటికే గర్భవతిగా ఉంటుందని ఆరోగ్య కార్యకర్తలు చెబుతున్నారు.

కొన్ని సందర్భాల్లో బాలికలు లైంగిక దాడికి గురైనా కుటుంబాలు భవిష్యత్తు భయంతో వారి పెళ్లి చేసి అత్తారింటికి పంపిస్తున్నాయి. దీంతో వారు చదువు కొనసాగించలేకపోతున్నారు. కొందరు బాలికలు చిన్న వయసులోనే తల్లులుగా మారుతున్నారు.

ఆరోగ్య మంత్రి ఆందోళన..

రాష్ట్రంలో టీనేజ్ గర్భధారణలు పెరుగుతున్నాయని తమిళనాడు ఆరోగ్య మంత్రి కూడా అంగీకరించారు. గత ఐదేళ్లలో మొత్తం గర్భధారణలు 7 శాతం తగ్గినప్పటికీ, టీనేజ్ గర్భధారణలు దాదాపు 20 శాతం పెరిగాయని తెలిపారు. 2023–24లో మాత్రమే 13 నుంచి 19 సంవత్సరాల మధ్య 14,360 మంది బాలికలు గర్భవతులయ్యారని చెప్పారు.

ఈ సమస్యకు ప్రధాన కారణాలుగా బాల్య వివాహాలు, లైంగిక దాడులు, ఆరోగ్యంపై అవగాహన లేకపోవడం ఉన్నాయని ఆయన పేర్కొన్నారు. టీనేజ్ గర్భధారణలు ఒక కుటుంబానికే కాదు, సమాజ అభివృద్ధికే కూడా ఆటంకం కలిగిస్తాయని అన్నారు.

నివారణ చర్యలకు నిపుణుల సూచనలు..

ఆసుపత్రి సేవలు మాత్రమే ఈ సమస్యను తగ్గించలేవని నిపుణులు చెబుతున్నారు. సమాజ స్థాయిలో నివారణ చర్యలు తీసుకోవడం అవసరమని వారు సూచిస్తున్నారు. ముఖ్యంగా బాల్య వివాహాలను అడ్డుకోవడం, బాలికల చదువును కొనసాగించేలా చర్యలు తీసుకోవడం అత్యంత ప్రభావవంతమైన మార్గమని పేర్కొంటున్నారు.

ప్రాంతాల వారీగా సమస్య ఎక్కువగా ఉన్న జిల్లాలను గుర్తించి ప్రత్యేక చర్యలు తీసుకోవాలని ఆరోగ్య కార్యకర్తలు సూచిస్తున్నారు. అలా చేస్తే టీనేజ్ గర్భధారణలను తగ్గించే అవకాశం ఉంటుందని వారు భావిస్తున్నారు.