బంధాలను బలోపేతం చేసే పండుగ “హోస తడకు”

ఉగాది పండుగ తర్వాతి రోజు కర్ణాటకలో “హోస తడకు” అనే ప్రత్యేక సంప్రదాయం చాలా ఏళ్లుగా కొనసాగుతోంది. ఉగాది రోజున భక్తి, పూజలు, శాకాహారం ప్రధానంగా ఉంటే, మరుసటి రోజు మాత్రం మాంసాహారంతో నూతన సంవత్సరాన్ని ఆహ్వానిస్తారు.

విభేదాలకు స్వస్తి..

“హోస” అంటే కొత్త, “తడకు” అంటే మాంసం. గ్రామీణ ప్రాంతాల్లో ఈ రోజుకు ఎంతో ప్రాధాన్యం ఉంటుంది. బంధువులు, స్నేహితులు మాంసాహార వంటకాలను తయారు చేసి పరస్పరం పంచుకుంటారు. పాత విభేదాలను మరిచి, కొత్తగా సంబంధాలను బలోపేతం చేసుకునే రోజుగా ఈ పండుగను భావిస్తారు.

పాత మైసూరు ప్రాంతాల్లో- మండ్య, మైసూరు, హాసన్, బెంగళూరు ప్రాంతాల్లో ఈ పండుగకు ప్రత్యేక స్థానం ఉంది. ముఖ్యంగా రైతులు, శ్రామిక వర్గాలు ఈ రోజును ఎంతో ఆనందంగా జరుపుకుంటారు.

హోస తడకు రోజున తెల్లవారుజాము నుంచే మాంసం దుకాణాల వద్ద భారీ రద్దీ కనిపిస్తుంది. కోడి, మేక, గొర్రె మాంసానికి భారీ డిమాండ్ ఉంటుంది. కొన్ని చోట్ల ముందుగానే ఆర్డర్లు తీసుకుంటారు. అర్ధరాత్రి నుంచే మాంసం సిద్ధం చేయడం ప్రారంభమవుతుంది. ఉదయం 10 గంటలకల్లా మాంసం పూర్తిగా అమ్ముడైపోతుంది.

గ్రామాల్లో “గుడ్డె మాంసం” అనే ప్రత్యేక విధానం ఇప్పటికీ కొనసాగుతోంది. ఒక మేకపోతు లేదా గొర్రెపోతును వధించి, దాని అన్ని భాగాలను కలిపి సమానంగా పంచుకుంటారు. దీనివల్ల ప్రతి ఒక్కరికీ సమానంగా మాంసం అందుతుంది. ఈ మిశ్రమంతో చేసిన కూరకు ప్రత్యేక రుచి ఉంటుందని ప్రజలు చెబుతారు.

పండుగ ఖర్చులను తగ్గించుకునేందుకు ప్రజలు ముందుగానే డబ్బు ఆదా చేసే పద్ధతులను అనుసరిస్తారు. కొందరు నెలవారీగా కొంత మొత్తాన్ని చెల్లించి, పండుగ రోజున మాంసం, బియ్యం, నూనె, మసాలాలు వంటి అవసరమైన వస్తువులను పొందుతారు. దీంతో ఒకేసారి భారీ ఖర్చు చేయాల్సిన అవసరం ఉండదు.

ఈ పండుగలో భోజనంతో పాటు వినోదం కూడా ముఖ్య భాగమే. కుటుంబ సభ్యులు, స్నేహితులు కలిసి పాతకాలపు ఆటలు ఆడుతూ, సరదాగా గడుపుతారు. ఇళ్లలో ఆనంద వాతావరణం నెలకొంటుంది.

మొత్తంగా హోస తడకు కేవలం మాంసాహార విందు మాత్రమే కాదు. ఇది కుటుంబ బంధాలను బలోపేతం చేసే, కొత్త సంవత్సరాన్ని ఉత్సాహంగా ఆహ్వానించే ప్రత్యేకమైన పండుగగా నిలుస్తోంది.