ఓ బైక్ మెకానిక్ సలహా తాత, ముగ్గురు మనవల ప్రాణాలు తీసింది
ప్రాణాంతకమైన సలహా ఇచ్చిన మెకానిక్ను పోలీసులు అదుపులోకి తీసుకున్నారు.
చిత్తూరు జిల్లా పుంగనూరు పట్టణంలో ఆదివారం ఉదయం పెను విషాదం వెలుగు చూసింది. ఊహించని విధంగా ఒకే కుటుంబానికి చెందిన నలుగురు వ్యక్తులు నిద్రలోనే విగతజీవులయ్యారు. త్యాగరాజ వీధిలో నివసించే కుటుంబ సభ్యుల్లో ఒకరు తన బైక్ ఇంజిన్ బోర్ (Repair) చేయించగా, బండి సెట్ కావాలంటే రాత్రంతా స్టార్టింగ్లోనే ఉంచాలి అని మెకానిక్ ఇచ్చిన సలహా ఆ కుటుంబానికి మరణ శాసనమైంది. మెకానిక్ మాటను నమ్మిన యజమాని, బైక్ను ఇంట్లోనే స్టార్ట్ చేసి, తలుపులన్నీ బిగించి నిద్రపోయారు. అదే వారు చేసిన అతిపెద్ద తప్పిదమైంది.
గది నిండా విషవాయువు.. నిద్రలోనే అంతం
ద్విచక్ర వాహనం రాత్రంతా మూసి ఉన్న గదిలో స్టార్టింగ్లో ఉండటంతో సైలెన్సర్ నుంచి ప్రాణాంతకమైన కార్బన్ మోనాక్సైడ్ వాయువు భారీగా వెలువడింది. గాలి బయటకు వెళ్లే దారి లేకపోవడంతో, ఆ గది ఒక గ్యాస్ ఛాంబర్లా మారిపోయింది. నిద్రలో ఉన్న తాత రామచంద్రయ్య (70), మనవడు కార్తీక్ (15), మనవరాళ్లు చందన (8), చరిత (8) ఆ విషవాయువును పీల్చారు. కార్బన్ మోనాక్సైడ్ రక్తంలో కలిసినప్పుడు మనిషికి స్పృహ తప్పుతుంది తప్ప, ఎలాంటి నొప్పి లేదా మెలకువ రాదు. అలా ఆ నలుగురు నిద్రలోనే మృత్యుఒడికి చేరుకున్నారు.
దర్యాప్తు చేపట్టిన పోలీసులు
ఉదయం ఎంతకీ తలుపులు తీయకపోవడంతో స్థానికులు కిటికీలోంచి చూడగా నలుగురు అపస్మారక స్థితిలో పడి ఉండటం గమనించారు. వెంటనే పోలీసులకు సమాచారం అందించగా, వారు తలుపులు పగులగొట్టి లోపలికి వెళ్లి మృతదేహాలను స్వాధీనం చేసుకున్నారు. ప్రాణాంతకమైన సలహా ఇచ్చిన మెకానిక్ను పోలీసులు అదుపులోకి తీసుకున్నారు. వాహనాన్ని ఎప్పుడూ మూసి ఉన్న గదిలో స్టార్ట్ చేయకూడదు అనే కనీస జ్ఞానం లేని మెకానిక్ నిర్లక్ష్యం వల్లే ఈ ఘోరం జరిగిందని పోలీసులు ప్రాథమికంగా నిర్ధారించారు.
