మలయాళ నటుడు, దర్శకుడు శ్రీనివాసన్
మలయాళ సినిమాకు శ్రమ, ఆలోచనలు, మనసు అర్పించిన శ్రీనివాసన్
మలయాళ చిత్ర పరిశ్రమ కోల్పోయిన అమూల్యమైన మేధస్సు
మలయాళ చిత్ర పరిశ్రమలో ఓ శూన్యం ఏర్పడింది. ప్రముఖ నటుడు, దర్శకుడు, రచయిత శ్రీనివాసన్ ఇక లేరు. దాదాపు ఐదు దశాబ్దాల పాటు మలయాళ సినిమాకు తన శ్రమ, తన ఆలోచనలు, తన మనసు అర్పించిన శ్రీనివాసన్ (69) తుదిశ్వాస విడిచారు. గతకొన్ని రోజులుగా అనారోగ్యంతో బాధ పడుతోన్న ఆయన (Sreenivasan) శనివారం కన్నుమూశారు. ఈ లెజెండ్ మరణం — కేవలం ఒక వ్యక్తి కోల్పోవడం కాదు. అది ఒక సినీ సంస్కృతి, ఒక మానవీయ దృష్టికోణం అంతరించిపోవడమే.
48 ఏళ్ల సినిమా ప్రయాణం… 200కి పైగా పాత్రలు
1956లో కన్నూరు జిల్లా పట్టియంలో జన్మించిన శ్రీనివాసన్, 1977లో వచ్చిన ‘మణిముజక్కం’ సినిమాతో నటుడిగా తన ప్రయాణాన్ని ప్రారంభించారు. ఆరంభంలోనే సహజ నటనతో ప్రేక్షకులను ఆకట్టుకున్న ఆయన, 1980వ దశకంలో మలయాళ పరిశ్రమలో ఒక బలమైన గుర్తింపును సంపాదించారు.
దాదాపు 48 సంవత్సరాల సినీ జీవితంలో 200కి పైగా సినిమాల్లో నటించి, ప్రతి పాత్రకు ఒక నిజాయితీని జోడించారు. హీరో అయినా, సహాయక పాత్ర అయినా, నెగటివ్ షేడ్స్ ఉన్న క్యారెక్టర్ అయినా — శ్రీనివాసన్ పాత్ర అంటే అందులో ఓ కొత్తదనం కనిపించేది.
నటనకే పరిమితం కాలేదు… రచనలోనూ విప్లవమే
శ్రీనివాసన్ నటుడు మాత్రమే కాదు. ఆయన ఒక బలమైన రచయిత . 1984లో వచ్చిన ‘ఓడారుథమ్వా అలరియం’ వంటి చిత్రాలకు స్క్రిప్ట్ రాస్తూ, మలయాళ సినిమాలో కంటెంట్కు ప్రాధాన్యం తెచ్చారు. వినోదం పేరుతో అబద్ధాలను కాదు — సమాజంలో ఉన్న అసలైన సమస్యలను తెరపై పెట్టడమే ఆయన లక్ష్యం.
‘వడక్కునొక్కియంత్రం’ – ఒక కల్ట్ క్లాసిక్
1989లో శ్రీనివాసన్ స్వీయ దర్శకత్వంలో వచ్చిన ‘వడక్కు నోక్కియంత్రం’ ఇది సినిమా కాదు… ఒక మానసిక అధ్యయనం. బ్లాక్ కామెడీ రూపంలో, మానవ అసూయ, అనుమానం, మానసిక సంక్లిష్టతలను అద్భుతంగా చూపించిన ఈ చిత్రం, మలయాళ సినీ చరిత్రలో శాశ్వతంగా నిలిచిపోయింది. ఈ సినిమాకు కేరళ రాష్ట్ర ఉత్తమ చిత్రం అవార్డు రావడం యాదృచ్ఛికం కాదు.
జాతీయ అవార్డు గెలిచిన సామాజిక స్పృహ
‘చింతవిష్టయాయ శ్యామల’ ఈ చిత్రం శ్రీనివాసన్ను కేవలం దర్శకుడిగా కాదు — ఒక సామాజిక చింతనకారుడిగా నిలబెట్టింది. ఈ సినిమాలో ఆయన నటించడమే కాకుండా దర్శకత్వం వహించి, జాతీయ అవార్డును సొంతం చేసుకున్నారు. సాధారణ మనిషి జీవితంలోని ఒత్తిళ్లు, బాధ్యతలు, వ్యవస్థలోని క్రూరత — ఇవన్నీ చాలా మృదువుగా, కానీ లోతుగా చెప్పారు.తెలుగులో ఈ సినిమా ఆవిడే శ్యామల టైటిల్ తో రీమేక్ అయ్యింది.
చివరి దశలోనూ సినిమాలనే వదలని కళాకారుడు
మార్చి 2022లో కార్డియాక్ స్ట్రోక్కు గురై, శస్త్రచికిత్స చేయించుకున్నప్పటికీ శ్రీనివాసన్ సినిమాలకు దూరం కాలేదు. ఆరోగ్యం సహకరించకపోయినా, నటనపై ప్రేమ తగ్గలేదు. 2023లో వచ్చిన ‘కురుక్కన్’ సినిమాలో తన కుమారుడు ధ్యాన్ శ్రీనివాసన్తో కలిసి కనిపించారు. 2025 జూన్ 15న విడుదలైన ‘నన్సీ రాణి’ చిత్రం — ఆయన చివరి తెరపై కనిపించిన సినిమా. అదే ఆయనకు ప్రేక్షకులిచ్చిన చివరి సెల్యూట్.
వారసత్వం కొనసాగుతోంది… వినీత్ & ధ్యాన్
శ్రీనివాసన్ ఆలోచనలు, సినిమా ప్రేమ ఆయన కుమారుల్లో కొనసాగుతోంది. వినీత్ శ్రీనివాసన్ — నటుడు, దర్శకుడు, రచయిత, గాయకుడిగా మలయాళ పరిశ్రమలో తనదైన ముద్ర వేశారు. ధ్యాన్ శ్రీనివాసన్ కూడా నటుడిగా ప్రేక్షకుల ముందుకు వస్తున్నారు. కానీ… శ్రీనివాసన్ స్థానం మాత్రం ఎవరికీ భర్తీ చేయలేనిది. ఒక నటుడు వెళ్లిపోయాడు… కానీ ఆయన సినిమాలు మిగిలాయి శ్రీనివాసన్ సినిమాలు వినోదం మాత్రమే కాదు.
అవి మనల్ని ప్రశ్నిస్తాయి.
మనల్ని ఆలోచింపజేస్తాయి.
మనలోని మనిషిని కదిలిస్తాయి.
ఓ యుగం ముగిసింది.
కానీ శ్రీనివాసన్ సృష్టించిన సినిమా ఆలోచన — ఎప్పటికీ మనకు నిలిచే వారసత్వం. ఆయనకు ఫెడరల్ వినమ్ర నివాళులు అర్పిస్తోంది.
Next Story