క్రిస్టొఫర్ నొలన్ అభిమానులకు శుభ వార్త, కొత్త చిత్రం ప్రకటన

స్టార్ హీరోలుకు, దర్శకులకు అభిమానులు ఉంటారు, కాని కొందరు దర్శకులకు వీరాభిమానులు ఉంటారు. ఆ డైరక్టర్స్ సినిమా రిలీజ్ అయితే ఒకటికి నాలుగు సార్లు చూస్తారు. ఆ సినిమా పై డిస్కషన్స్ రోజులు తరబడి పెడతారు. సోషల్ మీడియాలో రచ్చ రచ్చ చేస్తారు. అలాంటి అరుదైన సినిమా డైరక్టర్స్ లో ఒకరు క్రిస్టోఫర్ నోలన్ (Christopher Nolan). నోలన్ కు మన దేశంలో కూడా చాలా మంది అభిమానులు ఉన్నారు. ఆయన తీసిన 'బ్యాట్ మ్యాన్ బిగిన్స్', 'ది డార్క్ నైట్', 'ది డార్క్ నైట్ రైజెస్', 'డంకర్క్' చిత్రాలకు ఇక్కడ మంచి ఓపినింగ్స్ వచ్చాయి. అదిరిపోయే రివ్యూలు వచ్చాయి. ఇక్కడ కూడా బ్లాక్ బస్టర్స్ అయ్యాయి. ఆ స్దాయిలో నోలన్ కు వీరాభిమానులు ఉన్నారు.

'ఇంటర్ స్టెల్లార్', 'టెనెట్' అర్థం కాలేదని విమర్శిస్తూనే నాలుగైదు సార్లు సినిమాలు చూసిన ప్రేక్షకులూ ఉన్నారు. హాలీవుడ్ నుంచి వచ్చిన ఈతరం దర్శకుల్లో ప్రేక్షకులపై ఎక్కువ ప్రభావం చూపిన దర్శకుడు క్రిస్టోఫర్ నోలన్ అనటంలో అతిశయోక్తి లేదు. ఆయన తీసిన తాజా సినిమా 'ఓపెన్ హైమర్' ఏకంగా ఆస్కార్ నే తెచ్చిపెట్టింది. అమెరికన్ శాస్త్రవేత్త, అణు బాంబు సృష్టికర్త 'ఓపెన్ హైమర్' జీవితం ఆధారంగా, ఆయన పేరుతో తెరకెక్కించి ప్రపంచాన్ని మరోసారి తన వైపు తిప్పుకున్న దర్శకుడు ఈయన.

ప్రతిష్టాత్మక ఆస్కార్‌ అవార్డుల్లో ఈసారి 'ఓపెన్ హైమర్' సినిమా మెరిసింది. ఉత్తమ నటుడు, దర్శకుడు, చిత్రం, సహాయ నటుడు, ఒరిజినల్ స్కోర్, ఫిల్మ్ ఎడిటింగ్, సినిమాటోగ్రఫీ.. ఇలా ప్రధాన విభాగాల్లో పురస్కారాలు కైవసం చేసుకుంది. ఈ క్రమంలో ఆయన నెక్ట్స్ చేయబోయే చిత్రం ఏమిటనేది ప్రపంచ సినిమా అభిమానులు ఎదురుచూడటం లో వింతేముంది.

'ఓపెన్ హైమర్' చిత్రం తర్వాత క్రిస్టోఫర్ నోలన్ చేయబోయే చిత్రం టైటిల్ బయిటకు వచ్చింది. కొంత కాలంగా నోలన్ తదుపరి చిత్రంపై ర‌క‌ర‌కాల వార్తలు, ఊహాగానాలు సాగుతున్నాయి. ఆఖరికి యూనివర్సల్ పిక్చర్స్ X ఖాతాలో అధికారిక ప్రకటన చేసింది. నోలన్ నెక్ట్స్ 'ది ఒడిస్సీ' అనే చిత్రాన్ని తెర‌కెక్కిస్తారని ప్రకటించింది. ఈ చిత్రం సరికొత్త IMAX ఫిల్మ్ టెక్నాలజీని ఉపయోగించి ప్రపంచవ్యాప్తంగా ప‌లు దేశాల్లో షూట్ చేస్తారు. ఈ చిత్రంలో టామ్ హాలండ్ , మాట్ డామన్ నటించనున్నారు. అన్నే హాత్వే, జెండయా, లుపిటా న్యోంగో, రాబర్ట్ ప్యాటిన్సన్ , చార్లిజ్ థెరాన్ కూడా కీలక పాత్రల్లో నటిస్తార‌ని స‌మాచారం.

క్రిస్టోఫర్ నోలన్ , అతని భార్య ఎమ్మా థామస్‌ల కలిసి స్క్రిప్టు రాసి నిర్మించనున్నారు. 2025 ప్రథమార్థంలో ఈ చిత్రం నిర్మాణం ప్రారంభమవుతుంది. టైటిల్ లో సూచించినట్లుగా, ది ఒడిస్సీ అనేది హోమర్ యొక్క పురాతన గ్రీకు పురాణ కవిత ది ఒడిస్సీపై ఆధారపడి తయారు చేసిన కథ ఇది. ఇది గ్రీకు వీరుడు ఒడిస్సియస్ ట్రోజన్ యుద్ధం తరువాత ఇంటికి వెళ్ళే సమయంలో అతని కథను వివరిస్తుంది.

ది ఒడిస్సీని ఇలా వెండి తెరకు ఎక్కించటం ఇదే మొదటిసారి కాదు . ఇది గతంలో కూడా తీసారు. 1911లో మొదటిసారిగా సైలెంట్ సినిమాగా తీసాకరు. ఆ తర్వాత, 1954లో కిర్క్ డగ్లస్ నటించిన యులిసెస్ వచ్చింది . 2000 వ్యంగ్య హాస్య చిత్రం ఓ బ్రదర్, వేర్ ఆర్ట్ యు? తీసారు. ఇప్పుడు మరోసారి ఈ కవిత ఆధారంగా ఈ చిత్రం కథ నోలన్ స్టైల్ లో తయారు అవుతోంది.

ఇక రొటీన్ చిత్రాలు తీయటానికి నోలన్ ఎప్పుడూ ఇష్టపడరు. అలాగే హాలీవుడ్‌ చిత్రాలంటే సాధారణంగా ముందుగా గుర్తొచ్చేవి.. సూపర్‌ హీరోలు, యాక్షన్‌ సన్నివేశాలే. కానీ కాలంతో ప్రయోగ చిత్రాలు చేస్తూ హాలీవుడ్‌లో, అంతర్జాతీయంగా తనదైన ముద్ర వేశారు దర్శకుడు క్రిస్టోఫర్‌ నోలన్. ఆయన చిత్రాలకు ప్రత్యేక అభిమానులు అందుకే ఉంటారు. ఇప్పుడు ఒడస్సీతో మరోసారి ప్రయోగం చేస్తారనడంలో సందేహం లేదు . అలాగే ఈ ఒడస్సీ చిత్రంలో హీరోయిజానికి కొద‌వేమీ ఉండ‌దంటున్నారు. విధేయత, మోసం, దైవ సంకల్పానికి వ్యతిరేకంగా పోరాటం వంటి అంశాల‌తో సినిమా ఆద్యంతం ర‌క్తి క‌ట్టిస్తుందని హాలీవుడ్ మీడియా అంటోంది. యూనివర్సల్ బ్యాన‌ర్ లో క్రిస్టోఫర్ నోలన్ కి ఇది రెండో చిత్రం. 17 జూలై 2026న థియేట‌ర్ల‌లో రిలీజ్ ప్లాన్ చేసి ఎనౌన్స్ చేసారు.