Photos- Ravi pedapolu
కడియపులంకల్లో 'పూల కల్లోలం'!
పూలు గుసగుసలాడేనని.. సైగ చేసేనని...
కడియపు లంక పూలు చూసి ప్రముఖ పారిశ్రామిక దిగ్గజం రతన్ టాటా మురిసిపోయారంటే అబ్బురమేముంటుందీ! ఆయనా మనిషే కదా.. ముచ్చట పడక ఏం చేస్తారు..
అక్కడి మొక్కలు, పూలు చూస్తే ఎవరు మాత్రం మనసు పారేసుకోకుండా ఉంటారు.. చెప్పండి..
ఏడాదిలో మిగతా టైం సంగతేమో గాని డిసెంబర్ నుంచి మూడు నెలల పాటు కడియపులంక పూల నర్సరీలు చూస్తే మతులు పోవాల్సిందే.. మరులుగొనాల్సిందే..
రాజమండ్రికి పది కిలోమీటర్ల దూరంలో కడియం ఉంటుంది.
ఇక్కడ పచ్చదనం పిలిస్తే పలుకుతుంది. అదో ఎవర్గ్రీన్ ప్రాంతం..
అక్కడి నుంచి ఓ నాలుగైదు కిలోమీటర్లు పోతే కడియపులంక, బుర్రిలంక, పొట్టిలంక వంటి పలు గ్రామాల్లో అడుగుపెట్టగానే గాలి మారిపోతుంది. మనసు మైమరుస్తుంది. మనకు తెలియకుండానే అడుగులు నెమ్మదిస్తాయి. శబ్దాలు మారుతుంటాయి. కనుచూపు మేర ఎటుచూసినా ఆకుపచ్చ రంగు చీర పరిచినట్టు పచ్చదనమే. అదో మౌనలోకం.. మొక్కలతో మాట్లాడే ఓ మౌన లోకం.
ఇక్కడికి వచ్చేవాళ్లు మొక్కలు చూడటానికి వస్తారు గాని వెళ్లేప్పుడు మాత్రం ఏదో ఒక భావాన్ని మోసుకుపోతారు.
కారణం, ఇక్కడ పెరిగే మొక్కలు, పూలు. మనల్ని ఎక్కడికో తీసుకువెళ్తాయి. ఎటు చూసినా పూల సుగంధమే.
ఈ ఎవర్గ్రీన్ నర్సరీలలో అడుగు పెట్టగానే కనిపించేది క్రమబద్ధమైన పచ్చదనం. ఏరి కూర్చినట్టు వరుసల్లో మొక్కలు చూస్తుంటే ఔరా ప్రకృతి ఇంత అందంగా ఉంటుందా! అని ముక్కున వేలేసుకుంటాం.
వేల సంఖ్యలో మొక్కలు ఉన్నా ఎక్కడా గందరగోళం ఉండదు. చిన్న మొక్కల నుంచి పెద్ద సైజు మొక్కల వరకూ—అన్నీ ఒకే ప్రాంగణంలో... అవెన్యూ ప్లాంట్స్, బాంబూ వేరైటీస్, పండ్ల మొక్కలు, ఇండోర్–ఔట్డోర్ ప్లాంట్స్, పామ్స్, ఆర్నమెంటల్స్… ఒకటి కాదు, ఎన్నో ప్రపంచాలు అన్నీ ఒకేచోట.
ఈ కాలం పూల కాలం. పూల రంగుల్లో కేవలం అందమే కాదు, ఓ భావం ఉంది. కొన్ని పువ్వులు చూసిన వెంటనే చిన్ననాటి జ్ఞాపకాలు గుర్తొస్తాయి.
కొన్ని పువ్వులు మనల్ని తెలియని ప్రశాంతతలోకి తీసుకెళ్తాయి. పూల దగ్గర మనం ఎక్కువ మాట్లాడం. మనసే మాట్లాడుతుంది.
నర్సరీ దారుల్లో నడుస్తుంటే అడుగులు నెమ్మదిస్తాయి. ఆకుల మధ్య గాలి, పూల పరిమళం.. ఇవన్నీ కలసి మనకు తెలియకుండానే ఓ భావుకతకు లోనవడం ఖాయం..
కడియం నర్సరీలకు ప్రత్యేక గుర్తింపు ఉంది. సంవత్సరాలుగా మొక్కలు పెంచిన నైపుణ్యం ఇక్కడ కనిపిస్తుంది. నాణ్యమైన మొక్కలు, వివిధ సైజుల్లో సరఫరా చేసే సామర్థ్యం, కస్టమర్ అవసరాన్ని అర్థం చేసుకునే పద్ధతి.. ఇవన్నీ ఈ నర్సరీల ప్రత్యేకతను చాటుతాయి.
ఇక్కడ మొక్క కొనడం మాత్రమే కాదు—ఆ మొక్క ఎలా బతకాలి, ఎలా పెరగాలి అన్న ఆలోచన కూడా ఉంటుంది. ఇది వ్యాపారం కన్నా ఒక బాధ్యతలా అనిపిస్తుంది.
పచ్చదనం అంటే అలంకారం కాదు… జీవనశైలి అంటున్నారు నిర్వాహకులు.. వాళ్ల మాటలు వింటుంటే నర్సరీకి ఒకసారైనా వెళ్లి రావాలని అనిపిస్తుంది.
మొక్కల కోసం కాకపోయినా మనసు కోసమైనా..
అటువైపు ఎప్పుడైనా వెళ్లినపుడు ఓ లుక్కేయండి.. మతి పోవాల్సిందే సుమండీ!!
(ఫోటోలు- కడియపు లంక నుంచి రవి పెదపోలు, ది ఫెడరల్ ఆంధ్రప్రదేశ్)
Next Story