ఏపీలో ‘హై సెక్యూరిటీ హైవే’ రోడ్లు ఎక్కడెక్కడ రాబోతున్నాయి?

దేశంలో హైవేలు వేగంగా విస్తరిస్తున్నాయి. ఎక్స్‌ప్రెస్‌వేలు పెరుగుతున్నాయి. పోర్టులు, పరిశ్రమలు, రాజధానుల చుట్టూ కొత్త రహదారి మార్గాలు రూపుదిద్దుకుంటున్నాయి.

ఈ క్రమంలో ఇటీవల మరో పదం ఎక్కువగా వినిపిస్తోంది — హై సెక్యూరిటీ హైవే.

అసలు దీని అర్థం ఏమిటి?

ఆంధ్రప్రదేశ్‌లో ఇటువంటి రోడ్లు ఉన్నాయా?

భవిష్యత్‌లో ఏపీకి ఇవి అవసరమా? ఈ ఫీచర్‌లో చూద్దాం.

మామూలుగా మన లెక్కలో హైవే అంటే ఓ పెద్దరోడ్డు. తొందరగా వెళ్లడానికి వీలైన ఓ ప్రయాణ మార్గం. కానీ ఇప్పుడు కొన్ని రోడ్లు కేవలం ప్రయాణం కోసం మాత్రమే ఉండడం లేదు. అవి దేశ ఆర్థిక వ్యవస్థకు కీలక మార్గాలుగా మారుతున్నాయి. హై సెక్యూరిటీ హైవే అంటే… భద్రతా పరంగా అత్యంత కట్టుదిట్టంగా రూపొందించిన రహదారి.

♦ఎక్కడ పడితే అక్కడ వాహనాలు రోడ్డు ఎక్కకుండా నియంత్రణ

♦రహదారి పొడవునా ఫెన్సింగ్

♦CCTV కెమెరాల నిఘా

♦ఎమర్జెన్సీ సేవలు త్వరగా అందే వ్యవస్థ

♦కీలక ప్రాంతాలకు వేగవంతమైన సురక్షిత కనెక్టివిటీ

ఇవి ముఖ్యంగా పోర్ట్ నగరాలు, డిఫెన్స్ జోన్లు, ఇండస్ట్రియల్ కారిడార్లకు అవసరం.

స్పష్టంగా చెప్పాలంటే… ఆంధ్రప్రదేశ్‌లో ఇప్పటివరకు “హై సెక్యూరిటీ హైవే” అని అధికారికంగా ప్రకటించిన రహదారి లేదు. కానీ కొన్ని ప్రాంతాల్లో భద్రతా ప్రమాణాలు పెరుగుతున్నాయి. కొన్ని ప్రాజెక్టులు ఆ దిశగా సాగుతున్నాయి. వాటిలో

1. అమరావతి: రాజధాని ప్రాంతంలో సెక్యూరిటీ కారిడార్ అవసరం. రాజధాని అమరావతి అభివృద్ధి పునఃప్రారంభం నేపథ్యంలో క్యాపిటల్ ప్రాంతంలో రోడ్లు ప్రత్యేక ప్రాధాన్యతను సంతరించుకున్నాయి.

-అమరావతి చుట్టూ ప్రతిపాదిత ఇన్నర్ రింగ్ రోడ్. భవిష్యత్‌లో యాక్సెస్ కంట్రోల్డ్ ప్రమాణాలతో రూపొందే అవకాశం ఉంది.

-ప్రభుత్వ భవనాలు, అసెంబ్లీ, హైకోర్టు వంటి కీలక కేంద్రాలకు సురక్షిత కనెక్టివిటీ అవసరం పెరుగుతోంది.

అందువల్ల అమరావతి రోడ్లు ఒక రకంగా “క్యాపిటల్ సెక్యూరిటీ నెట్‌వర్క్”గా మారే అవకాశముంది.

2. విశాఖ: పోర్ట్ నగరానికి ప్రత్యేక భద్రతా రోడ్లు అవసరం. విశాఖపట్నం పెద్ద నగరం. ప్రధాన పోర్ట్ హబ్. నేవీ కమాండ్ కేంద్రం కూడా ఇక్కడే ఉంది. పోర్ట్ నుంచి కార్గో రవాణా పెరుగుతోంది. డిఫెన్స్ లాజిస్టిక్స్ కూడా కీలకంగా మారుతోంది.

ఈ నేపథ్యంలో విశాఖలోని పోర్ట్ కనెక్టివిటీ రోడ్లపై ట్రాఫిక్ నియంత్రణ, భద్రతా నిఘా, ప్రత్యేక ప్రోటోకాల్స్ అవసరం పెరుగుతోంది.

VCIC: విశాఖ–చెన్నై ఇండస్ట్రియల్ కారిడార్ ప్రాధాన్యం పెరుగుతోంది. ఆంధ్రప్రదేశ్‌లో పెట్టుబడుల భవిష్యత్ మ్యాప్‌లో ముఖ్యమైన ప్రాజెక్ట్ Visakhapatnam–Chennai Industrial Corridor (VCIC). పోర్ట్ నుంచి పరిశ్రమలకు సరుకుల తరలింపు వేగంగా సాగాలంటే స్మార్ట్ హైవే నెట్‌వర్క్ అవసరం పెరుగుతుంది. ఇక్కడే హై సెక్యూరిటీ హైవే తరహా ప్లాన్స్ ముందుకు వస్తున్నాయి.

NH-16: ఏపీకి ప్రధాన రవాణా వెన్నెముక

కోల్‌కతా నుంచి చెన్నై వరకు వెళ్లే NH-16. ఏపీకి అత్యంత కీలక కారిడార్. ఇది పూర్తిగా ఎక్స్‌ప్రెస్‌వే కాదు. కానీ నిఘా వ్యవస్థలు, ట్రాఫిక్ మానిటరింగ్ క్రమంగా పెరుగుతున్నాయి.

రెండు తెలుగు రాష్ట్రాలకు ఇది లైఫ్ లైన్. హైదరాబాద్ నుంచి విజయవాడ వరకు ఈ రోడ్డు సాగుతుంది. ప్రస్తుతం NH-65ను హై సెక్యూరిటీ హైవేగా మార్చే యోచన ఉంది. ప్రభుత్వ నోటిఫికేషన్ ఇంకా రాలేదు. త్వరలో వచ్చే అవకాశం ఉంది రవాణా శాఖ అధికారులు చెబుతున్నారు. NH-65 అనేది పుణే–హైదరాబాద్–విజయవాడ కారిడార్. ఇది విజయవాడ మీదుగా పోతుంది. అమరావతి ప్రాంతానికి దగ్గరగా ఉంటుంది. అందువల్ల భవిష్యత్‌లో ట్రాఫిక్ పెరిగితే ఈ మార్గాన్ని స్మార్ట్ హైవేగా అప్‌గ్రేడ్ చేసే ఆలోచన చురుగ్గా సాగుతోంది. డీపీఆర్ కూడా రెడీ అయిందని సమాచారం.

అది జరిగితే యాక్సెస్ కంట్రోల్, ఫెన్సింగ్, CCTV నెట్‌వర్క్, ఎమర్జెన్సీ రెస్పాన్స్ వంటి మార్పులు రావాల్సి ఉంటుంది. ఇప్పటికీ NH-65పై విస్తరణ పనులు, బైపాస్లు కొనసాగుతున్నాయి. ఇవి భవిష్యత్ అభివృద్ధికి బేస్‌గా మారే అవకాశముంది.

అమరావతి రాజధాని అభివృద్ధి, విశాఖ పోర్ట్ ఎకానమీ విస్తరణ, ఇండస్ట్రియల్ కారిడార్ల పెరుగుదల- ఈ మూడు కారణాల వల్ల ఆంధ్రప్రదేశ్‌లో భవిష్యత్‌లో హై సెక్యూరిటీ ప్రమాణాలతో కూడిన రోడ్లు అవసరం పెరుగుతాయి.

హై సెక్యూరిటీ హైవే అనే పదం ఇప్పటికీ అధికారిక కేటగిరీ కాదు. కానీ అమరావతి, విశాఖ, VCIC వంటి ప్రాజెక్టుల నేపథ్యంలో ఆంధ్రప్రదేశ్‌లో ఈ తరహా రోడ్ల అవసరం భవిష్యత్‌లో పెరిగే అవకాశం ఉంది.