డే కేర్ సెంటర్లు- తల్లిదండ్రులూ ఈ జాగ్రత్తలు తప్పనిసరి!

నగరాలు, పట్టణాలలో జీవనం వేగంగా సాగుతోంది. భార్యాభర్తలిద్దరూ పని చేస్తే జీవనం గడవని కుటుంబాలు కొన్నైతే ఇంట్లో ఆలనా పాలనా చూసే వాళ్లు లేని కాపురాలు మరికొన్ని. ఉద్యోగాలు, ప్రయాణాలు, ఇంటి పనులు – వీటన్నిటిలో తల్లిదండ్రులు పిల్లలతో గడిపే సమయం తగ్గిపోతోంది. ముఖ్యంగా ఇద్దరూ ఉద్యోగాలు చేసే దంపతులకు, చిన్నారుల సంరక్షణ పెద్ద సవాలుగా మారింది. ఈ లోటును పూడ్చటానికి డే కేర్ సెంటర్లు ఒక పెద్ద ఆశ్రయం. కానీ నోయిడాలో జరిగిన తాజా సంఘటన ఆ విశ్వాసాన్ని కుదిపేసింది.

ఢిల్లీకి సమీపంలోని నోయిడాలో జరిగిన ఈ ఘటన కంటనీరు తెప్పిస్తోంది. నోయిడాకు చెందిన ఓ దంపతులు తమ 15 నెలల పాపను స్థానిక డే కేర్ సెంటర్‌కి పంపి ఉద్యోగాలకు వెళతారు. ఎప్పటిలాగే ఒకరోజు సాయంత్రం ఇంటికి తెచ్చాక బిడ్డ దుస్తులు మార్చే సమయంలో వంటిపై గాయాలు, కొరికిన మచ్చలు గమనించారు.

ఈ విషయం తెలిసినా డే కేర్ సెంటర్ యాజమాన్యం పట్టించుకోలేదు. ప్రశ్నించినందుకు తల్లిదండ్రులపైనే దురుసుగా ప్రవర్తించారు. దీంతో ఆ తల్లిదండ్రులు పోలీసులకు ఫిర్యాదు చేశారు. నిందితురాలిని అదుపులోకి తీసుకుని విచారిస్తే మరిన్ని విషయాలు బయటకు వచ్చాయి. ఈలోగా చిన్నారిని కొట్టి హింసించిన వీడియో సామాజిక మాధ్యమాల్లో వైరల్ అయింది. డేకేర్ సెంటర్ యాజమాన్యాన్ని పోలీసులు అదుపులోకి తీసుకున్నారు. ఈ సంఘటన చూసిన వారందరికీ "డే కేర్ సెంటర్లు నిజంగా భద్రమేనా?" అన్న ప్రశ్న మదిలో మిగిలిపోయింది.

డే కేర్ సెంటర్లు ఉద్యోగులైన తల్లిదండ్రులకు ఒక సహాయక వేదిక. పిల్లలకు భద్రత, సరైన ఆహారం, ఆటలు, ప్రాథమిక విద్యా అలవాట్లు – ఇవన్నీ ఒకేచోట లభిస్తాయి. కానీ ఈ భద్రతే ప్రశ్నార్థకమైతే?

తల్లిదండ్రులు ఇష్టం లేకపోయినా పరిస్థితుల వత్తిడితో ఇలాంటి సెంటర్లను ఆశ్రయిస్తారు. కానీ నోయిడా ఘటన వంటి సంఘటనలు నమ్మకాన్ని దెబ్బతీస్తాయి.

-2023లో హైదరాబాద్‌లోని ఒక ప్రైవేట్ డే కేర్ సెంటర్‌లో 2 ఏళ్ల బాలుడిని సిబ్బంది చెంపదెబ్బ కొట్టిన వీడియో బయటకు వచ్చింది.

-2021లో చెన్నైలో, నిద్రపోలేదని చిన్నారిని తలుపు వెనుక బంధించిన ఘటన వెలుగులోకి వచ్చింది.

-2019లో ఢిల్లీ లోని ఒక డే కేర్ సెంటర్‌లో సీసీటీవీ ఫుటేజీలో బాలికను దుప్పటితో కప్పి ఊపిరాడకుండా చేసిన దృశ్యాలు బయటపడ్డాయి.

ఈ సంఘటనలు ఒక్కొక్కసారి వార్తల్లోకి వస్తున్నా, వాస్తవంలో ఇవి జరగకుండా ఆపే పటిష్టమైన వ్యవస్థ లేకుండా పోయింది.

తమ పిల్లల్ని ఏదైనా డే కేర్ సెంటర్ కి పంపుతున్నప్పుడు తల్లిదండ్రులు ఆ సెంటర్ కి లైసెన్స్, రిజిస్ట్రేషన్ ఉందో లేదో గమనించాలి. ప్రభుత్వ అనుమతితో నడుస్తుందో లేదో చూడాలి. సిబ్బంది వెరిఫికేషన్, క్రిమినల్ బ్యాక్‌గ్రౌండ్ చెక్, శిక్షణ సర్టిఫికేట్లు తప్పనిసరి.

సీసీటీవీ పర్యవేక్షణ – లైవ్ యాక్సెస్ లేదా రికార్డింగ్‌ అందించే సౌకర్యం ఉందో చూడాలి.

సదుపాయాల పరిశీలన – ఆహారశుభ్రత, నిద్రించే ప్రదేశం, ఫస్ట్ ఎయిడ్ బాక్స్ తప్పనిసరి.

పిల్లల ప్రవర్తనలో మార్పులు గమనించడం – భయం, మౌనం, ఏడుపు ఎక్కువ కావడం వంటి సంకేతాలను నిర్లక్ష్యం చేయకూడదు.

ప్రభుత్వం చేయాల్సినవి

డే కేర్ సెంటర్లపై తరచూ తనిఖీలు చేసి, ఉల్లంఘనలపై కఠిన చర్యలు తీసుకోవాలి.

చైల్డ్ ప్రొటెక్షన్ హెల్ప్‌లైన్‌ను మరింత సమర్థంగా ఉపయోగించాలి.

పిల్లల సంరక్షణపై తల్లిదండ్రులు, సిబ్బందికి ప్రత్యేక అవగాహన కార్యక్రమాలు అవసరం.

డే కేర్ సెంటర్లు అవసరం ఉన్నప్పటికీ, వాటి భద్రతపై నిరంతర పర్యవేక్షణ, కఠిన నిబంధనలు తప్పనిసరి. పిల్లల భవిష్యత్తు, మనసు రెండూ సున్నితమైనవే. ఒక నిర్లక్ష్యం జీవితాంతం మచ్చలా మిగిలిపోకుండా జాగ్రత్తపడటం అందరి బాధ్యత.