సంక్రాంతి పిండివంటలు రెడీ..
అరిశలు, చక్రాల్లేకుండా సంక్రాంతి పిండి వంటా!?
ఆంధ్రాలో ప్రతి ఇంటా పిండి వంటే.. ఈ 5 రకాలు ఉండాల్సిందే..
సంక్రాంతి అంటే పంట ఇంటికొచ్చిన సంబరం.. రెక్కలు వచ్చి ఎగిరిపోయిన పిల్లలు ఇంటికొచ్చే సంతోషం.. ఇంటిల్లిపాది ముత్యాల ముగ్గుల సందడి.. చలిమంటలు, పొలిమండలు, బోగిపళ్లు, పులగం, చెరకుగడలు, కొత్త బట్టలు.. చిన్నా పెద్దా అనే తేడా లేకుండా ప్రతి ఇల్లూ పండగే. ఎవరి స్థాయిలో వారి సంతోషమే. వీటన్నింటితో పాటు సంక్రాంతికి ఇంటింటా నూనె మరిగే చప్పుడు, పిండి వంటల సవ్వళ్లు. ఈ పండగకు పిండి వంటలు లేని ఇల్లుండదంటే అతిశయోక్తి కాదు.
పల్లెయినా, పట్టణమైనా…
సంక్రాంతికి వారం రోజుల ముందే ప్రతి ఇంట్లో పిండి వంటల తయారీ మొదలవుతుంది. బియ్యం నానబెట్టడం నుంచి బెల్లం పాకం వరకు, కొబ్బరి తురుము నుంచి నువ్వుల వాసన వరకు — ప్రతి దశ ఒక పండగే.
ఒక్కో పిండి వంట… ఒక్కో కథ..
అరిశలు: ఒక్కో ప్రాంతానికి ఒక్కో పేరున్నా సంక్రాంతి పిండి వంటల్లో రాజులాంటివి అరిశ. కోస్తాలో అరిశలు లేదా అరెశలు, రాయలసీమలో అత్తరసలు (Athrasalu) అంటుంటారు.
కొత్త బియ్యపు పిండి, బెల్లం పాకం, నువ్వులు- ఈ మూడింటి కలయికే అరిశలు. ఇంటి పెద్దవాళ్ల పర్యవేక్షణలో, ఓర్పుతో చేసే ఈ వంట, పండగకు వచ్చిన బంధువులకి ప్రత్యేక విందు.
అప్పాలు / చెక్కలు
కరకరలాడే చెక్కలు సంక్రాంతి పిండి వంటల్లో ప్రత్యేకం.
పచ్చిమిర్చి, జీలకర్ర, కరివేపాకు వాసనతో చేసే ఈ వంట, చలి కాలంలో వేడి వేడిగా తింటే ఆహ్లాదమే.
జంతికలు లేదా చక్రాలు..
మినప జంతికలు సంక్రాంతి సమయంలో ఇంట్లో ఉండే శాశ్వత అల్పాహారం.
పిల్లల చేతుల్లో, పెద్దల చేతుల్లో — జంతికలు తినని సంక్రాంతి ఊహించలేం.
కజ్జికాయలు
బెల్లం, కొబ్బరి తురుము, గసగసాల మిశ్రమంతో చేసే కజ్జికాయలు పండగ తీపిని మరింత పెంచుతాయి.
వేడి వేడిగా నూనెలో నుంచి తీసిన కజ్జికాయ వాసన ఇంటంతా నిండిపోతుంది.
బొబ్బట్లు
పూర్ణం నిండిన బొబ్బట్లు సంక్రాంతి తీపి జ్ఞాపకం. శనగపప్పు–బెల్లం మిశ్రమంతో చేసిన పూర్ణం, మైదా పొరలో దాచుకుని టవాపై కాల్చే బొబ్బట్లు — పండగకు వచ్చిన అతిథులకు తప్పనిసరి వంట.
రుచికన్నా పెద్దది సంప్రదాయం
ఈ పిండి వంటలు కేవలం తిండి మాత్రమే కాదు. అమ్మమ్మల జ్ఞాపకాలు ఈ వంటలు. కుటుంబం అంతా కలిసి పనిచేసే క్షణాలు. బంధుత్వాలను మరింత దగ్గర చేసే విందులు. ఇప్పుడు బేకరీలు, స్వీట్స్ షాపులు వచ్చినా —ఇంట్లో చేసిన పిండి వంటల రుచి, ఆ మమకారం ఎక్కడా దొరకదు.
అందుకే సంక్రాంతి వచ్చిందంటే చాలు… ఇంటి వెచ్చదనం, పిండి వంటల వాసన గుర్తుకొస్తాయి.
Next Story