భగ భగ మండే ఎండల్లో శేషాచలపు కొండల్ని చుట్టొద్దామా !

(భూమన్)

శ్వేత (Sri Venkateswara Employees Training Academy (SVETA) సంచాలకుడిగా బాధ్యతలు తీసుకున్న తర్వాత విశ్రాంత జీవనానికి నేనిచ్చే స్ఫూర్తి కొంత కుంటు పడుతున్నదేమోనని ఇంత కాలం కొంచెం బెంగగా ఉండేది. శ్వేతలో ఉండటం వల్ల కొన్ని మంచిపనులు చేయొచ్చు , తరిగొండ వెంగమాంబ పుస్తకాలను , పాటలను విస్తృతంగా ప్రచారం చేయటమేగాకుండా , అజ్ఞాతంగా ఉన చాలా సమాచారాన్ని రాబట్టవచ్చునని ఒక పట్టుదల. రాగానే అజ్ఞాత సంకీర్తనాచార్యుడు సారంగపాణి ప్రాజెక్టుకూడ మొదలు పెట్టినాను. ఈ సంకీర్తలన్నింటినీ వెలుగులోకి తీసుకురావాలి. మా ఉద్యోగులకు మరింత మెరుగయిన శిక్షణ ఇవ్వాలని వొక ప్రణాళిక రచించుకోవటం వల్ల ఈ మధ్య కొంచెం నా అడుగులకు ఆటంకం వచ్చింది.

ఇప్పుడిప్పుడే కోలుకొని కొంచెం తీరిక చేసుకుని మొన్న కుమార ధార పోయొస్తే ఈ రోజు మా అటవీ ఉద్యోగుల పట్టుదల , 'కొత్త ట్రెక్ సార్' అని ఊరిస్తే , సరేనని మా ఆఫీసు స్టాఫ్ ని వెంటబెట్టుకుని గంగుడుపల్లెకు బయలుదేరినాము.

రాత్రి వరకు ఏమి పోతామబ్బా ఈ మండే ఎండలకని బాగా వెనకాడినాను. కొత్త ట్రెక్ ఊరిసున్నది కదా. మేమెవరం చూడలేదు సార్ మీరు తప్పనిసరిగా రావాల్సిందే ! పైగా మేకపోతుపట్టినాము , నిరాశపరచకండి అంటే కదిల్నాము. పైగా ఈ ట్రెక్ మేమే మొదట చేసిన వాళ్ళము అవుతాము.

ఇంతకు మునుపు ఈ పల్లెకు అనుకుని ఉన్న గుర్రప్పకొండకు నాలుగైదు మార్లు ట్రెక్ చేసివచ్చినాను. సరిగ్గా ఆ గుర్రప్పకొండకు ఎదురుగా చాలా ఎత్తయిన కొండ చూడ్డానికి భలే బాగుంది.దీనిపేరు జెర్రిపోతు కట్ట.

దారి దారంతా జారుడు , ఎక్కుడు , మట్టి ఏమాత్రం అజాగ్రత్తగా ఉన్నా పడిపోతాము. జాగ్రత్తలు చెప్పుకుంటూ పోతున్నాము. మా వాళ్లకు కొత్తయినా చాలా ఉత్సాహంగా హాయిగా నడుస్తున్నారు. కొత్తకదా మరోప్రపంచం చూసినట్టుంది. కొండంతా బోడిగావుంది. ఎక్కడో మచ్చుకు అక్కడక్కడా పచ్చటి చెట్లు , కంప కంపగా ఉంది. ఐతేనేం ఆ రాతివరసలు , నీళ్లుకారిన వంకలు , జారుడు బండలు , వింత వింత రాతి ఆకారాలు , ఊడలు మమ్మల్ని మరింత ఊపెక్కిస్తున్నాయి.

మాతోపాటు గంగుడుపల్లె షణ్ముగం ఉన్నాడు. అతడు పశువుల కాపరి. దాదాపు 30 మంది తమ పశు వుల్ని అట్లా అడవులకు తోలేస్తారట. అక్కడే మేసి , చిన్నబావిలో నీరుతాగి సంవత్సరం పొడవూ ఆ కొండల్లోనే సేదతీరతాయట. ఊరికి పిల్చుకుపోరు , పాలు పితకరు , కోడెదూడలను మాత్రం అమ్ముకుంటారట.

ఎందుకయ్యానని అడిగితే జల్లికట్టులో వీటిని పోటీకి దింపటంకోసమనిచెబితే ఆశ్చర్యపోయినాను. ఈ పల్లెల్లో జల్లికట్టు ఎక్కువ సందడిగా ఉంటుంది. ప్రతిసంవత్సరం జోరుగా జరుగుతాయి. వారినికి రెండు రోజులు ఈ కొండలు తిరిగి చూసుకొని వస్తాడట. అవి ఇతన్ని గుర్తుపట్టి పిలవగానే దగ్గరకు రాగానే మేమంతా నోళ్లు వెళ్లబెట్టినాము. భలే గుర్తుపడతాయట యజమానిని. పరాయివాడికి దరిదాపుల్లో కూడా ఉండవట. అందువల్ల వాటిని ఎవరూ తోలుకుపోయే ప్రమాదమే లేదు. ఈ కథ మాకు కొత్త. చదివే మీకు కొత్తే.

ఈ కొండల్లో నాలుగైదు వరసలపైకి పోతున్నాము. మధ్య మధ్యలో ముళ్లపంది పెంటికలు , మేకలు , దుప్పులు , కణుతుల పెంటికలు కనిపిస్తే వీటి కథేమిటని అడిగితే , జింకలు , కణుతులను బాగా వేటాడటం వల్ల సంఖ్య బాగా తరిగిపోతున్నదని బాధగా చెప్పినాడు. చుట్టుపక్కలవారు అడవి జీవాలను బాగా మరిగినట్టు చెప్పినాడు. ఎలుగుబంట్లువున్నా పెద్దగా ఊర్లమీదికి రావట.

పశువుల మంద సేదతీరేస్థలము , కరోనా కాలంలో పశువులకు వైద్యంచేసిన ఆనవాలు చూపించినాడు. ఆ సమయంలో తమ పల్లెల్లో ఎవరూ పాలు తాగేవారు కాదు.

మాటల్లో పైకి వచ్చేసినాము. పెద్ద గండ్రటి ఆకారం. దాన్నే జెర్రిపోతు గుండు అంటారు. దాని దాకాపోయినాము కానీ. తాడుపట్టుకుని పైకి ఎక్కాలి ఆ తాడు గట్టిగాలేదు. ఎక్కడ తెగిపోతుందోనని వారిస్తే ఎక్కడానికి సాహసించలేదు. ఆ పని అటవీ కార్మికుడు రమణ చేసినాడు. పైన దీపపు గూడుందని , ప్రతిసంవత్సరం కార్తీక పౌర్ణమినాడు గ్రాముస్తులు దీపం వెలిగిస్తారని తెలిసింది. ఏమలవాట్లు , ఎటువంటి నమ్మకాలు పల్లెజనానికి అంతరిస్కు తీసుకుని , ఇట్టాంటిపనీ నగరి ముక్కు , యోగులు పర్వతంలోనూ చేస్తున్నారు.

మనిషి ఎంతటి సాహసి , పట్టుదల గలిగినవాడు , మనకే తెలియదు ఈ కొండలు , గుట్టలు , అడవులు , జలపాతాలు , సెలయేర్లు తిరిగితే అనేకానేక పాఠాలు నేర్చుకుని రావొచ్చు. వానలు , చల్లటి కాలం అడవులు , కొండలు తిరగటం , జలపాతాల్లో ఈదులాడటం మహారంజుగావుండే , ఈ సీజన్లో , చుక్కనీరుకూడా దొరకని చోట , మండే ఎండల్లో ఈ సౌందర్యాన్ని చూసి రావటం ఒక గొప్ప అనుభవం. చెట్లన్నీ ఎండిపోయి , మరికొన్ని విరిగిపోయి , కాళ్లకు కంపచుట్టుకుంటూ అట్లా నడుస్తూ ఈ కాలపు సౌందర్యాన్ని తనివితీరా చూడటం ఒక మహదానందం ! మనోహరం !

మా ట్రెక్శీను భగవాన్ మా ఆఫీసు సిబ్బంది , రమేష్ , లక్ష్మీనారాయణ , కుమార్ , లక్ష్మీనారాయణ రెడ్డి , ప్రభాకర రెడ్డి , మా గ్రంథాలయసిబ్బంది రాజు , పవన్ , మా బ్రాడ్ కాస్టింగ్ ఈశ్వర్ రెడ్డి , మా డ్రైవరు వెంకటేష్ ఈ మండే ఎండల్లో రావటం , తొలిసారిగా ఇట్టాంటి అనుభవానికి పరవశించి గొప్ప అనుభూతి పొందటం ఒక సీనియర్ ట్రెక్కర్గా చాలా సంతోషమనిపించింది.

మా వెంకటరెడ్డి , అప్పిరెడ్డి కిందినుండి రెండు మార్లు తిరిగి మంచి అల్పాహారం , మాంసాహారంతో విందుచేయటం గొప్ప కొసమెరుపు.

ఇట్టాంటి ట్రెక్కింగుల వల్ల మధుమేహానికి దూరమవుతారని , ప్రకృతి గొప్ప ఆరోగ్యశక్తినిస్తుందని చెబితే మళ్లీ మళ్లీ వస్తామనీ సంకల్పం చెప్పుకున్నారు. వానాకాలంలో అడవుల్లోకి పోయిరావటంకాదు. వొక్కమారు భగ భగ మండే ఎండల్లో కొండలు , కోనలు , అడవులు తిరిగి రండి. గొప్ప జీవనసత్యం బోధపడుతుంది.

(భూమన్ శ్వేత (Sri Venkateswara Employees Training Academy (SVETA) సంచాలకులు)