Maharashtra Politics | సీఎం ఎవరో ప్రజలకు తెలుసు..

మహారాష్ట్ర కొత్త ముఖ్యమంత్రి పేరు ఖరారైందని అయితే పార్టీ సీనియర్ నాయకత్వం నుంచి నిర్ధారణ కోసం ఎదురుచూస్తున్నామని ఆ పార్టీ నేత రావుసాహెబ్ దాన్వే పేర్కొన్నారు. కాబోయే సీఎం ఎవరో మహారాష్ట్ర ప్రజలకు తెలుసుని కూడా చెప్పారు కేంద్ర మాజీ మంత్రి దన్వే. డిసెంబర్ 5 సాయంత్రం దక్షిణ ముంబైలోని ఆజాద్ మైదాన్‌లో కొత్త మహాయుతి ప్రభుత్వం ప్రమాణ స్వీకారోత్సవం జరుగుతుందని, ఈ కార్యక్రమానికి ప్రధాని నరేంద్ర మోదీ హాజరవుతారని రాష్ట్ర బీజేపీ చీఫ్ చంద్రశేఖర్ బవాన్‌కులే తెలిపారు. డిసెంబరు 5న ముఖ్యమంత్రి, డిప్యూటీలు మాత్రమే ప్రమాణ స్వీకారం చేస్తారా? లేక మంత్రులు కూడా ప్రమాణ స్వీకారం చేస్తారా? అనే విషయం ఇంకా తెలియదని చెప్పారు.

రేసులో ఫడ్నవీస్..

ముఖ్యమంత్రి ఎవరనే దానిపై ఇంకా ఎటువంటి ప్రకటన రానప్పటికీ, గత ఏక్‌నాథ్ షిండే నేతృత్వంలోని ప్రభుత్వంలో రెండుసార్లు ముఖ్యమంత్రిగా, డిప్యూటీ సీఎంగా పనిచేసిన దేవేంద్ర ఫడ్నవీస్ సీఎం రేసులో ముందున్నారని బీజేపీ వర్గాల నుంచి అందుతున్న సమాచారం. దన్వే ఒక ప్రాంతీయ వార్తా ఛానెల్‌కు ఇచ్చిన ఇంటర్వ్యూలో.. “మహారాష్ట్ర తదుపరి ముఖ్యమంత్రి ఎవరు కాబోతున్నారో ప్రజలకు కూడా తెలుసు. మా పార్టీ సీనియర్ నాయకులు అదే వ్యక్తి పేరు ఖరారు కోసం మేము ఎదురుచూస్తున్నాము.’’ అని చెప్పారు. క్యాబినెట్ కూర్పుపై మాట్లాడుతూ.. "రాష్ట్ర మంత్రివర్గంలో ఎవరిని చేర్చుకోవాలనేది ముఖ్యమంత్రి నిర్ణయం తీసుకుంటారు" అని పేర్కొన్నారు.

షిండే ఆరోగ్యం.. ఊహాగానాలు

మహారాష్ట్ర ఆపద్ధర్మ ముఖ్యమంత్రి ఏక్‌నాథ్ షిండే శుక్రవారం సతారా జిల్లాలోని తన స్వగ్రామమైన డేర్‌కు వెళ్లారు. కొత్త రాష్ట్ర ప్రభుత్వం రూపుదిద్దుకుంటున్న తీరు పట్ల ఆయన సంతోషంగా లేరు. తన గ్రామంలో తీవ్ర జ్వరంతో బాధపడుతున్న షిండే కోలుకుంటున్నారని, ఆదివారం సాయంత్రం ముంబైకి తిరిగి వస్తారని ఆయన సన్నిహితుడొకరు చెప్పారు. షిండే అనారోగ్యరీత్యా ప్రమాణ స్వీకారం వాయిదా పడొచ్చన్న అనుమానాల నేపథ్యంలో దాన్వే ఇలా ఉన్నారు. ‘‘ఆపద్ధర్మ ముఖ్యమంత్రి ఆరోగ్యం రాష్ట్ర పరిపాలన పనితీరుకు ఆటంకం కలిగించదు. మన్మోహన్ సింగ్ దేశ ప్రధానిగా ఉన్నప్పుడు (యూపీఏ ప్రభుత్వ హయాంలో) ఆయనకు గుండె శస్త్రచికిత్స జరిగింది. అడ్మినిస్ట్రేషన్ పని చేస్తూనే ఉంది.’’ అని చెప్పారు.

శాసనసభా పక్ష నేతను ఇంకా ఎన్నుకోని బీజేపీ ..

మహాయుతి మిత్రపక్షాలు శివసేన, నేషనలిస్ట్ కాంగ్రెస్ పార్టీ (NCP) ఇప్పటికే వరుసగా షిండే, అజిత్ పవార్‌లను తమ శాసనసభా పక్ష నాయకులుగా ప్రకటించాయి. అయితే అతిపెద్ద మహాయుతి భాగస్వామ్యమైన బీజేపీ శాసనసభా పక్ష నేత పేరును ఇంకా వెల్లడించలేదు. ముఖ్యమంత్రి బీజేపీకి చెందిన వారని, తన పార్టీ, శివసేన రెండు మిత్రపక్షాల నుంచి డిప్యూటీ సీఎంలు ఉంటారని ఎన్‌సిపి అధినేత అజిత్ పవార్ అన్నారు. గత ప్రభుత్వంలో పవార్ డిప్యూటీ సీఎంగా ఉన్నారు.

డిసెంబర్ 2 మధ్యాహ్నం 1 గంటలకు తమ శాసనసభా పక్ష నాయకుడిని ఎన్నుకోవాలని శనివారం నిర్ణయించినట్లు బీజేపీ సీనియర్ నాయకుడు పీటీఐకి తెలిపారు. “అయితే ఇప్పుడు సమావేశం డిసెంబర్ 3 లేదా 4కి వాయిదా వేయవచ్చని పేరు చెప్పడానికి ఇష్టపడని నాయకుడొకరు చెప్పారు.

మాకు సమాచారం లేదు: భుజ్‌బల్

తాను నాసిక్‌లో ఉన్నానని, ప్రమాణ స్వీకారోత్సవం గురించి తనకు ఎలాంటి సమాచారం లేదని ఎన్సీపీ సీనియర్ నేత ఛగన్ భుజ్‌బల్ తెలిపారు. "మా నాయకులు అజిత్ పవార్, ప్రఫుల్ పటేల్ , సునీల్ తట్కరే మాకు ఎటువంటి సమాచారం ఇవ్వలేదు," అని చెప్పారు.

నవంబర్ 23న వెలువడిన అసెంబ్లీ ఎన్నికల్లో బీజేపీ, శివసేన, ఎన్సీపీల మహాయుతి కూటమి ఘనవిజయం సాధించి అధికారాన్ని నిలబెట్టుకుంది. 288 మంది సభ్యుల సభలో సాధారణ మెజారిటీ సంఖ్య 145 కాగా, బీజేపీ ఒంటరిగా 132 సీట్లు, శివసేన 57, ఎన్సీపీ 41 సీట్లు గెలుచుకున్నాయి.

అయితే ముఖ్యమంత్రి ఎవరనే విషయంలో కూటమిలో ఏకాభిప్రాయం కుదరకపోవడంతో ప్రభుత్వ ఏర్పాటు ఆలస్యమైంది. ఫడ్నవీస్ ముఖ్యమంత్రిగా తమకు ఆమోదయోగ్యం అని ఎన్సీపీ ఇప్పటికే ప్రకటించింది.