చంద్రబాబును వదలను..ప్రతి కేసునూ రీ-ఓపెన్ చేయిస్తా: జడ శ్రావణ్ కుమార్
ప్రభుత్వ భూములను, ప్రజా ఆస్తులను అప్పనంగా తమ బినామీలకు పప్పుబెల్లాల్లా పంచుతున్నారని ఆరోపించారు.
రాష్ట్ర రాజకీయాల్లో మరోసారి న్యాయపోరాట సెగలు రాజుకున్నాయి. ముఖ్యమంత్రి చంద్రబాబు నాయుడుపై ఉన్న అవినీతి కేసుల విషయంలో జై భీమ్ రావు భారత్ పార్టీ అధ్యక్షుడు, ప్రముఖ న్యాయవాది జడ శ్రావణ్ కుమార్ ఊహించని సంచలన సవాల్ విసిరారు. ’చంద్రబాబు తనపై ఉన్న కేసులను కొట్టేయించుకోవచ్చు కానీ.. కాలం ఎప్పుడూ ఒకేలా ఉండదు.. 2029లోనైనా సరే ఆయనపై ఉన్న ప్రతి కేసునూ రీ-ఓపెన్ చేయించి తీరుతాను‘ అంటూ భీష్మ ప్రతిజ్ఞ చేశారు. అంతటితో ఆగక, ఒకవేళ తాను ఆ కేసులను తిరిగి విచారణకు తీసుకురావడంలో విఫలమైతే, తన గౌరవప్రదమైన న్యాయవాద వృత్తినే వదిలేస్తానని శ్రావణ్ కుమార్ చేసిన ప్రకటన ఇప్పుడు ఏపీ రాజకీయ వర్గాల్లో పెను దుమారం రేపుతోంది. కూటమి పాలనలో ప్రభుత్వ ఆస్తుల దుర్వినియోగాన్ని ప్రశ్నిస్తున్న తనపై అక్రమ కేసులు పెడుతున్నారని వాపోయిన ఆయన, ఈ పోరాటంలో వెనక్కి తగ్గే ప్రసక్తే లేదని స్పష్టం చేశారు.
ముఖ్యమంత్రి చంద్రబాబు నాయుడు తనపై ఉన్న అవినీతి కేసులను ఒక్కొక్కటిగా కొట్టేయించుకుంటున్నారని, న్యాయస్థానాలను సైతం మేనేజ్ చేస్తూ విచారణ నుంచి తప్పించుకుంటున్నారని జడ శ్రావణ్ కుమార్ తీవ్రస్థాయిలో ధ్వజమెత్తారు. ఈ సందర్భంగా ఆయన ఒక సంచలన ప్రకటన చేశారు. రాష్ట్ర ప్రజలకు నేను మాటిస్తున్నా.. చంద్రబాబుపై ఉన్న ప్రతి కేసునూ రీ-ఓపెన్ చేయించి తీరుతాను. ఒకవేళ అది సాధ్యం కాకపోతే నా గౌరవప్రదమైన న్యాయవాద వృత్తినే వదిలేస్తాను అంటూ భీష్మ ప్రతిజ్ఞ చేశారు. 2029లోనైనా సరే ఆయన బోనులో నిలబడాల్సిందేనని శ్రావణ్ కుమార్ హెచ్చరించారు.
ప్రభుత్వ ఆస్తులు.. బినామీల పప్పుబెల్లాలు
ప్రజల ఆస్తుల పరిరక్షణ విషయంలో కూటమి ప్రభుత్వం పూర్తిగా విఫలమైందని శ్రావణ్ కుమార్ మండిపడ్డారు. ప్రభుత్వ భూములను, ప్రజా ఆస్తులను అప్పనంగా తమ బినామీలకు పప్పుబెల్లాల్లా పంచుతున్నారని ఆరోపించారు. రాష్ట్ర ఖజానాను లూటీ చేస్తున్నారని, దీనిపై ప్రశ్నిస్తున్న తనపై అక్రమంగా కేసులు పెడుతూ నోరు నొక్కే ప్రయత్నం చేస్తున్నారని ఆయన వాపోయారు. ఈ అవినీతి భాగోతంలో ముఖ్యమంత్రి చంద్రబాబుకు ఉపముఖ్యమంత్రి పవన్ కల్యాణ్ అతిపెద్ద భాగస్వామిగా మారారని ఆయన నిశిత విమర్శలు చేశారు.
మహిళల భద్రతపై ప్రశ్నల వర్షం
రాష్ట్రంలో మహిళల భద్రత అటకెక్కిందని, కూటమి నేతలే మహిళలపై వేధింపులకు పాల్పడుతుంటే ప్రభుత్వం కళ్లు మూసుకుని కూర్చుందని శ్రావణ్ కుమార్ నిలదీశారు. తప్పు చేసిన వారిపై చర్యలు తీసుకోవడంలో ప్రభుత్వం ఎందుకు వెనకాడుతోందని ఆయన ప్రశ్నించారు. ప్రభుత్వ ఆస్తులను దుర్వినియోగం చేస్తూ, మహిళల ఆత్మగౌరవంతో ఆడుకుంటున్న నేతలను చూస్తూ ఊరుకోవాలా అని ప్రశ్నించిన ఆయన, న్యాయం జరిగే వరకు తన పోరాటం ఆపనని స్పష్టం చేశారు.
