కేరళ ఎన్నికలు: గమ్యం ఒకటే .. కాని విధానాలు రెండు..

2026 కేరళ అసెంబ్లీ ఎన్నికలు రాష్ట్ర రాజకీయాల్లో కీలకంగా మారుతున్నాయి. ప్రధానంగా ఎల్‌డీఎఫ్(Left Democratic Front), యూడీఎఫ్(United Democratic Front) మధ్య తీవ్ర పోటీ నెలకొంది. ఈ రెండు కూటములూ “నూతన కేరళ” అనే ఒకే లక్ష్యంతో ముందుకెళ్తున్నాయి. అయితే ఆ లక్ష్యాన్ని సాధించడంలో స్పష్టమైన తేడాలు కనిపిస్తున్నాయి.

పదేళ్ల ప్రగతే ప్రచారాస్త్రంగా..

ఎల్‌డీఎఫ్ తన ప్రచారంలో గత పదేళ్లలో సాధించిన పురోగతినే ప్రధానంగా ప్రస్తావిస్తోంది. ఆరోగ్యం, విద్య, సంక్షేమం, మౌలిక సదుపాయాల్లో గణనీయ మార్పు తీసుకువచ్చామని చెబుతోంది. ప్రజలందరికీ నాణ్యమైన వైద్యం అందుబాటులో ఉంచాలని భావిస్తోంది. సంక్షేమం ప్రజల హక్కు అని, సామాజిక పెన్షన్లు, గృహ పథకాలు, సామాజిక భద్రతా పథకాలను విస్తరించాలనుకుంటోంది.

ఇందుకు ఎల్‌డీఎఫ్ ఆర్థికంగా ప్రభుత్వ పెట్టుబడులపై ఆధారపడుతోంది. భారీ మౌలిక సదుపాయ ప్రాజెక్టులు, పారిశ్రామిక కారిడార్లు, డిజిటల్ కనెక్టివిటీని అభివృద్ధికి ప్రధాన సాధనాలుగా చూస్తోంది. దీర్ఘకాలిక ప్రణాళికల ద్వారా ఉపాధి అవకాశాలు సహజంగానే పెరుగుతాయని నమ్ముతోంది.

‘పాలనా లోపాలను సరిదిద్దాలి’

ఇక యూడీఎఫ్ తన ప్రచారాన్ని “పుతుయుగం” నినాదంతో ముందుకు తీసుకెళ్తోంది. కొత్త ప్రారంభం అవసరమని గట్టిగా చెబుతోంది. ప్రస్తుత పాలనలో లోపాలను సరిదిద్దాల్సిన అవసరం ఉందని వాదిస్తోంది. సమర్థత, పారదర్శకత, ఆర్థిక క్రమశిక్షణపై ఎక్కువ దృష్టి పెడుతోంది.

ఆరోగ్య రంగంలో యూడీఎఫ్ విధానం కొంత భిన్నంగా ఉంది. ప్రభుత్వ సేవలతో పాటు ప్రైవేట్ రంగ భాగస్వామ్యాన్ని పెంచాలని భావిస్తోంది. సేవల నాణ్యతను మెరుగుపరచడం, వెయిటింగ్ సమయాన్ని తగ్గించడం, జవాబుదారీతనాన్ని పెంచడం వంటి అంశాలపై దృష్టి సారిస్తోంది.

ఇక ఆర్థిక విధానంలో యూడీఎఫ్ ప్రైవేట్ పెట్టుబడులను ఆకర్షించడంపై దృష్టి పెడుతోంది. వ్యాపార సౌలభ్యాన్ని మెరుగుపరచడం, అధికారిక అడ్డంకులను తగ్గించడం ద్వారా అభివృద్ధి సాధ్యమని చెబుతోంది. ఉద్యోగాల విషయంలో తక్షణ అవకాశాలను సృష్టించేందుకు ప్రైవేట్ రంగానికి ప్రాధాన్యత ఇస్తోంది.

సంక్షేమం విషయంలో రెండు కూటములూ ఒకే హామీ ఇస్తున్నాయి. అయితే ఎల్‌డీఎఫ్ వాటిని విస్తరించాలనుకుంటే, యూడీఎఫ్ వాటి అమలులో సమర్థతను పెంచి, దీర్ఘకాలిక ఆర్థిక స్థిరత్వం అవసరమని యూడీఎఫ్ ప్రస్తావిస్తోంది.

మహిళల ఉపాధి పెంపుపై ఎల్‌డీఎఫ్ ప్రత్యేక దృష్టి పెట్టింది. మహిళలకు 50 శాతం ఉద్యోగాలు కల్పించాలనే లక్ష్యాన్ని ప్రతిపాదించింది. ఇది ఆర్థికాభివృద్ధితో పాటు సామాజిక సమానత్వాన్ని కూడా పెంచే ప్రయత్నం.

మౌలిక సదుపాయాల కల్పనలో ఇద్దరి అభిప్రాయాలు ఒకేలా ఉన్నా.. ఖర్చులు, రుణాల విషయంలో యూడీఎఫ్ ప్రశ్నలు లేవనెత్తుతోంది. పారదర్శకత, ప్రాధాన్యత అంశాలను ముందుకు తెస్తోంది.

మొత్తంగా ఈ ఎన్నికల్లో పోటీ సంక్షేమం vs అభివృద్ధి మధ్య కాకుండా రెండింటినీ ఎలా బ్యాలెన్స్ చేయాలన్న అంశంపైనే ఉంటుంది. తమను మరోసారి ఆశీర్వదిస్తే కేరళను మరింత అభివృద్ధి చేస్తామని ఎల్‌డీఎఫ్ హామీ ఇస్తుంటే.. యూడీఎఫ్ మాత్రం మెరుగైన పాలనకు హామీ ఇస్తోంది.

అంతిమంగా “నూతన కేరళ” నిర్మాణం ఎవరి చేతుల్లో ఎలా జరుగుతుందన్నదే అసలు ప్రశ్న.