రజనీ అభిమానులకు కోపం తెప్పించిన ‘టీవీకే’ నాయకుడు

'తలైవర్' (నాయకుడు) అని పిలువబడే రజనీ, తమిళనాడులో 'అసలైన సూపర్ స్టార్'గా దాదాపు ఒక పౌరాణిక స్థాయిని అందుకున్నారు. ఆయన సినిమాలు అన్ని వర్గాల ప్రేక్షకులను ఆకట్టుకున్నాయి.

2017-2020 మధ్య, ఆయన రజినీ మక్కల్ మండ్రాన్ని నడిపి, పూర్తిస్థాయి రాజకీయ ప్రవేశం గురించి ఆలోచించినప్పుడు, యావత్ రాష్ట్రం ఉత్కంఠగా ఎదురుచూసింది. కోవిడ్-19 మహమ్మారి సమయంలో ఆరోగ్య సమస్యలు, ఇన్ఫెక్షన్ ప్రమాదాన్ని కారణంగా చూపి ఆయన చివరికి తప్పుకున్నారు. అది పిరికితనం కాదు, నిజమైన బాధ్యతా స్ఫూర్తి అని ఆయన విధేయులు అన్నారు.

2024లో, నటుడు విజయ్ ఒక కొత్త రాజకీయ పార్టీని స్థాపించారు. "రజినీ చేయలేని పనిని తలపతి పూర్తి చేశాడు" నిర్భయమైన కొత్త తరం నాయకుడిగా - లేదా కమాండర్‌గా ఆయన అభిమానులు భావించారు.. వర్ణించారు

కమల్ హాసన్‌ను రజినీకాంత్‌కు తక్షణ ప్రత్యర్థిగా, అజిత్ కుమార్‌ను విజయ్‌కు సమకాలీన ప్రత్యర్థిగా చూస్తారనేది గమనించదగ్గ విషయం. కానీ, అభిమానుల మధ్య రజినీ-విజయ్ వైరం లోలోపల ఎప్పుడూ ఉంటూనే ఉంది.

విజయ్ 'తమిళగా వెట్రి కజగం' (టీవీకే)ను ప్రారంభించి, తనను తాను వ్యవస్థ వ్యతిరేక శక్తిగా ప్రకటించుకున్నప్పుడు, సంవత్సరాలుగా సోషల్ మీడియాలో కేవలం ఆయా అభిమానుల మధ్య మాత్రమే రాజుకుంటున్న తలైవర్-తలపతి వైరం బహిరంగం రాజకీయంగా మారింది. రజినీ అభిమానులు విజయ్‌పై వారసత్వంతో లబ్ధి పొందుతున్నాడని ఆరోపించగా, విజయ్ అభిమానులు మీ నాయకుడికి లేని ధైర్యం తమ హీరోకి ఉందని వాదించారు.

గత వారం, ఒక టీవీకే నిరసన సభలో, సీనియర్ కార్యకర్త ఆదవ్ అర్జున హద్దులు దాటారు. డీఎంకే మొదటి కుటుంబం రజినీకాంత్‌ను "బెదిరించి", ఆయన రాజకీయ కలలను వదులుకునేలా ఒత్తిడి చేసిందని ఆయన ఆరోపించారు. వ్యవస్థను మార్చాలనే కోరిక రజినీకాంత్‌కు ఉన్నప్పటికీ, అటువంటి ఒత్తిడిని తట్టుకోవడానికి విజయ్‌కు ఉన్న "మానసిక బలం", ధైర్యం ఆయనకు(రజనీకి) లేవని ఆయన పేర్కొన్నారు. ఈ వ్యాఖ్యలు రెచ్చగొట్టేవిగా ఉండటంతో, రజినీ అభిమానులు వెంటనే ఎదురుదాడికి దిగారు.

“రజినీకాంత్ నీచ రాజకీయాలు చేయలేదు. మహమ్మారి సమయంలో లక్షలాది మంది అభిమానుల ప్రాణాలను కాపాడటానికి ఆయన వైదొలిగారు. అదే నిజమైన మానసిక బలం” వెల్లూరు రజని ఫ్యాన్స్ క్లబ్ ప్రకటించింది. రజినీకాంత్‌ను లక్ష్యంగా చేసుకున్నందుకు నిర్మాత ధనంజయన్ గోవింద్, అర్జునను బహిరంగంగా విమర్శించారు.

మదురైలోని రజినీ అభిమానులు అర్జున క్షమాపణ కోరుతూ భారీ పోస్టర్లను ఏర్పాటు చేశారు. మాజీ రజినీ మక్కల్ మండ్రం ముఖ్య సమన్వయకర్త అర్జున మూర్తి, విజయ్‌కు ఒక బహిరంగ లేఖ జారీ చేస్తూ, ఇలాంటి “అపరిపక్వ శక్తులు” టీవీకేకు రాజకీయ భారంగా మారుతున్నాయని హెచ్చరించారు.

బీజేపీ నాయకులు నైనార్ నాగేంద్రన్, కేంద్ర మంత్రి ఎల్. మురుగన్, ఏఐఏడీఎంకే అధినేత ఎడప్పాడి కె. పళనిస్వామి కూడా ఈ డిమాండ్‌కు గొంతు కలిపారు. ఒక సాంస్కృతిక దిగ్గజాన్ని అగౌరవపరిచినందుకు టీవీకేపై ఆరోపిస్తూ, తక్షణమే క్షమాపణ చెప్పాలని వారు డిమాండ్ చేశారు.

రజనీకాంత్ స్వయంగా సంయమనం పాటించారు. సుదీర్ఘమైన ఖండన గానీ, పత్రికా సమావేశం గానీ నిర్వహించలేదు. ఈ రోజు (మార్చి 17) ఆయన, అర్జున వ్యాఖ్యలు "నిజానికి విరుద్ధం", "పరువు నష్టం కలిగించేవి" అని ఖండిస్తూ తీవ్రమైన పదజాలంతో కూడిన ఒక ప్రకటనను విడుదల చేశారు. తనకు మద్దతుగా నిలిచిన రాజకీయ, సినీ ప్రముఖులకు ధన్యవాదాలు తెలుపుతూ, "నన్ను బ్రతికిస్తున్న దేవుళ్ళు" అని పిలిచిన "లక్షలాది మంది అభిమానులకు" కూడా రజనీకాంత్ కృతజ్ఞతలు తెలిపారు.

రజనీ మద్దతుదారులు #AadhavArjunaApologise అనే హ్యాష్‌ట్యాగ్‌ను ట్రెండ్ చేస్తూ, నియోజకవర్గాల వారీగా టీవీకే అభ్యర్థులకు వ్యతిరేకంగా ప్రచారం చేస్తామని బహిరంగంగా బెదిరిస్తున్నారు. విజయ్ అభిమానులు పాత క్లిప్‌లతో ధైర్యంగా ఎదురుదాడి చేస్తూ, రజనీ విధేయులు ద్వంద్వ ప్రమాణాలను పాటిస్తున్నారని ఆరోపిస్తూ, విజయ్ ఎల్లప్పుడూ సూపర్‌స్టార్‌ను గౌరవించారని వాదిస్తున్నారు.

సీనియర్ జర్నలిస్ట్ సావిత్రి కన్నన్ అర్జున వ్యాఖ్యలను సమర్థించారు. "రాజకీయాల్లోకి ప్రవేశించే ధైర్యం రజినీకి లేదు. విజయ్ నిజమైన ధైర్యంతో వచ్చారు. ఈ మాట చెప్పడంలో ఎలాంటి తప్పు లేదు. ఎన్నికల సమయంలో ఇలాంటి ప్రకటనలు చేస్తుంటారు, వాటిని వక్రీకరించే అవకాశం కూడా ఉంటుంది," అని ఆయన అన్నారు.

ఆయన చేసిన ఈ సూటి సమర్థన రజినీ విధేయులలో కొత్త ఆగ్రహాన్ని రేకెత్తించింది. తమిళనాడు అసెంబ్లీ ఎన్నికలకు కేవలం కొన్ని వారాల ముందు, టీవీకే ఉద్దేశపూర్వకంగా రజినీకి ఉన్న లక్షలాది మంది అభిమానులను రెచ్చగొడుతోందని వారు ఆరోపిస్తున్నారు.

ద్రవిడ పార్టీలకు పరిణతి చెందిన, అందరినీ కలుపుకొనిపోయే ప్రత్యామ్నాయంగా తనను తాను నిలబెట్టుకోవడానికి టీవీకే ప్రయత్నిస్తోంది. అర్జునను అదుపు చేయడంలో విఫలమవడం ద్వారా, రజినీని ఆరాధించే లక్షలాది మంది తటస్థ ఓటర్లను దూరం చేసుకునే ప్రమాదాన్ని ఆ పార్టీ కొనితెచ్చుకుంది. తమిళనాడులోని ఈ విచ్ఛిన్నమైన ఎన్నికల క్షేత్రంలో, ప్రజల అభిప్రాయంలో 3-5 శాతం మార్పు కూడా డజన్ల కొద్దీ సీట్ల ఫలితాలను నిర్ణయించగలదు.