విజయ్ అఫిడవిట్లలో వ్యత్యాసాలు: ఎన్నికల ముందు కొత్త న్యాయ చిక్కులు..

తమిళనాడు అసెంబ్లీ ఎన్నికల వేళ.. నటుడు-రాజకీయ నాయకుడు విజయ్ మరోసారి వివాదంలో చిక్కుకున్నారు. తమిళగ వెట్రి కజగం అధినేతగా ఉన్న ఆయన సమర్పించిన రెండు ఎన్నికల అఫిడవిట్లలో ఉన్న వ్యత్యాసాలు ఇప్పుడు న్యాయపర పరిశీలనకు దారి తీసాయి.

వివరాలు భిన్నంగా..

పెరంబూర్, తిరుచిరాపల్లి తూర్పు నియోజకవర్గాల కోసం ఆయన వేర్వేరు తేదీలలో అఫిడవిట్లు సమర్పించారు. మార్చి 30న పెరంబూర్‌కు, ఏప్రిల్ 2న తిరుచిరాపల్లి తూర్పుకు అఫిడవిట్ దాఖలు చేశారు. అయితే ఈ రెండు పత్రాలలో కీలక అంశాలపై విభిన్న వివరాలు ఉండటం గమనార్హం.

ముఖ్యంగా క్రిమినల్ కేసుల విషయంలో స్పష్టమైన వ్యత్యాసం కనిపిస్తోంది. పెరంబూర్ అఫిడవిట్‌లో తనపై ఎలాంటి కేసులు లేవని విజయ్ పేర్కొన్నారు. కానీ తిరుచిరాపల్లి అఫిడవిట్‌లో మాత్రం రెండు ఎఫ్‌ఐఆర్‌లు పెండింగ్‌లో ఉన్నట్లు వెల్లడించారు. ఇందులో ఒకటి మదురై జిల్లాలోని కూడకోవిల్ పోలీస్ స్టేషన్‌లో, మరొకటి చెన్నైలోని పెరవల్లూరు పోలీస్ స్టేషన్‌లో నమోదైన కేసు.

ఇటీవల జరిగిన ఒక ప్రచార కార్యక్రమంలో భద్రతా సిబ్బంది ప్రవర్తన వల్ల ప్రజలకు ఇబ్బందులు కలిగిన ఘటనకు సంబంధించి ఈ కేసుల్లో ఒకటి నమోదైనట్లు సమాచారం. ఈ అంశం ఇప్పుడు రాజకీయంగా కూడా చర్చనీయాంశంగా మారింది.

ఆర్థిక వివరాల్లో కూడా వ్యత్యాసం..

పెరంబూర్ అఫిడవిట్ ప్రకారం, ఎన్నికల ఖర్చుల కోసం ఇండియన్ ఓవర్సీస్ బ్యాంక్ సాలిగ్రామం శాఖలో రూ.1 లక్షతో ఒకే బ్యాంకు ఖాతా తెరవబడింది. కానీ తిరుచిరాపల్లి పత్రంలో మరో అదనపు ఖాతా కూడా ఉన్నట్లు పేర్కొన్నారు. తిరుచ్చి మెయిన్ బ్రాంచ్‌లో రూ.90వేల నిల్వతో రెండో ఖాతా ఉన్నట్లు తెలిపారు.

ఈ విధంగా ఒకే అభ్యర్థి రెండు వేర్వేరు అఫిడవిట్లలో విభిన్న వివరాలు ఇవ్వడం న్యాయపరంగా సమస్యాత్మకమని నిపుణులు చెబుతున్నారు. ప్రజా ప్రాతినిధ్య చట్టం 1951 ప్రకారం, ఎన్నికల అఫిడవిట్‌లో తప్పుడు సమాచారం ఇవ్వడం లేదా వివరాలను దాచిపెట్టడం తీవ్రమైన నేరంగా పరిగణించబడుతుంది.

చట్టంలోని సెక్షన్ 125A ప్రకారం, ఈ విధమైన ఉల్లంఘనలకు ఆరు నెలల వరకు జైలు శిక్ష లేదా జరిమానా లేదా రెండూ విధించే అవకాశం ఉంది. ముఖ్యంగా పెరంబూర్ అఫిడవిట్‌లో కేసులను వెల్లడించకపోవడం ఆధారంగా ప్రత్యర్థులు అభ్యంతరాలు లేవనెత్తే అవకాశం ఉంది.

మొత్తంగా, ఎన్నికల ముందు ఈ వివాదం విజయ్ రాజకీయ ప్రయాణంపై ప్రభావం చూపే అవకాశముంది. ఈ అంశం ఎలా మలుపుతీసుకుంటుందో చూడాలి.